Марк 11 - Инжил

11 бетӏер Гӏиса Иерусалим шагьаралде лъугьунев вуго

¹ Гьел Иерусалималде щолел рукӏана. Зайтуналъул магӏарда аскӏор ругел Бетфагиялде ва Бетаниялде гӏагарлъидал, кӏиго муридги аскӏове ахӏун,

² Гӏисаца гьезда абуна: – Гьудуб нилъеда цебе бугеб росулъе а нуж. Росулъе лъугьаралго, цо бакӏалда бухьун батила жеги чи тӏад рекӏинчӏеб кӏудияб кӏерт. Рухьадасаги бичун, гьебги бачун рачӏа.

³ Нужеца гьабулеб щибилан гьикъулев чи ккани, гьесда абе нижер Тӏадегӏанав Гӏисае къваригӏун бугин гьеб; кватӏичӏого нахъе биччазе бугиланги абе.

^4-5 Гьел ана. Гьениб гьезда батана къотӏноб цо чиясул кавуялда бухьараб кӏудияб кӏерт. Рухьадаса гьеб бичулел рукӏаго, гьенир рахъун чӏун рукӏарал гӏадамаз гьикъана: – Нужеца гьабулеб щиб? Щай нужеца гьеб кӏерт рухьадаса бичулеб?

⁶ Гӏисаца малъухъе кьуна муридаз гьезие жаваб. Цинги доз гьалги риччан тана.

⁷ Кӏерт Гӏисахъе бачун бачӏана. Гьелъул гьодиде рехана гьез жидерго партал, ва Гӏисаги гьелда тӏад рекӏана.

⁸ Гӏемерисез, тӏаса бахъун ретӏел букӏана нухда тӏибитӏулеб. Цогидаз абуни, магъилъ ругел гъутӏбуздаса къотӏун, гӏурччинал гӏаркьалаби рукӏана гьесда цере тӏиритӏулел.

⁹ Гьесда цере-цере унезги хадур рачӏунезги турки ахӏулеб букӏана: – Гьошанна! Бетӏергьанасул къудраталдалъун витӏун вачӏунев вугесда баркат лъеги!

¹⁰ Тӏаде гӏунтӏулеб бугеб нилъер эмен Давудил Парччахӏлъиялда баркат лъеги! Гьошанна! Тӏадегӏанав Аллагьасе рецц!

¹¹ Иерусалималде щваравго, Гӏиса Мукъадасаб Рокъове лъугьана ва, киса-кибего бер щвезабун, хал-шал гьабуна. Маркӏачӏубер рукӏкӏинехъин букӏиндал, анцӏила кӏиявго чапарги вачун, Гӏиса Бетаниялде тӏадвуссана.

Тӏад пихъ гьечӏеб инжиралъул гъветӏ

¹² Нахъисеб къоялъ радакьго вахъун Бетаниялдаса вачӏунаго, Гӏиса вакъана.

¹³ Рикӏкӏадасанго гьесда бихьана тӏад тӏамах бараб цо инжиралъул гъветӏ. Гъотӏода пихъ гьечӏодайилан аскӏове индал, тӏамах гурони, цониги инжир батичӏо: инжир барщизе заман щун букӏинчӏо жеги.

¹⁴ Цинги Гӏисаца гъотӏода абуна: – Дуда тӏад бижун пихъ тӏокӏаб лъицаниги киданиги квине хъван батугеги. Гьеб рагӏана гьесул муридаздаги.

Гӏисаца даранчагӏи Мукъадасаб Рокъоса къватӏире гъола

¹⁵ Гьале Иерусалималде щвана гьел. Мукъадасаб Рокъове лъугьун, гьенир даран-базаралда рукӏарал гӏадамал къватӏире гъезе лъугьана Гӏиса; гӏарац хисулел чагӏазул столал ва къурбаналъе хъвезе маккал ричулел чагӏи тӏад гӏодор чӏолел бакӏал кӏалагъоркье чӏвазаруна.

¹⁶ Мукъадасаб Рукъалъул азбаралъусан гӏадамаз къайи баччизеги гьукъана гьес.

¹⁷ Цинги Гӏисаца, гьезие малъа-хъвай гьабун, абуна: – Тӏехьалда хъван гьечӏищ: «Гьаб Дир рукъалда цӏар букӏине буго киналго халкъазул как-диналъул рукъ», – абун. Нужецайин абуни гьаб хъачагъазул нохъоялде сверизабун буго.

¹⁸ Гӏисал гьеб калам рагӏидал, диниял гӏалимзабиги чӏахӏиял кашишзабиги ургъизе лъугьана гьев тӏагӏинавизе рес киндай батилаян. Гьесукьа хӏинкъун рукӏана гьел, щайгурелъул Гӏисал гӏелмуялъ тӏолабго халкъ хӏикмалъизабун букӏиндал.

¹⁹ Бакъ тӏерхьунеб гӏужалда шагьаралдаса къватӏире рахъана Гӏисаги муридзабиги.

Инжиралъул гъветӏ бакъван батула

²⁰ Нахъисеб къоялъ радал тӏадруссун рачӏунаго балагьидал, доб инжиралъул гъветӏ кьолболъанго бакъван бугоан.

²¹ Гӏисаца абун рукӏарал рагӏабиги ракӏалде щун, Пётрица гьесда абуна: – Я Мугӏалим! Балагье, сон нагӏана кьураб инжиралъул гъветӏ бакъван бугеб куц.

²² Гӏисаца гьезда абуна: – Аллагьасде божи-иман цӏуне нужеца.

²³ Хӏакълъун абулеб буго дица нужеда: рекӏелъе щаклъиги ккезе биччачӏого, жинца абухъе лъугьине букӏиналдаги божун, пуланав чияс гьаб мегӏералда абуни, гьаниса бахъун ун ралъдалъе кӏанцӏеян, мегӏер гьесие мутӏигӏлъизе буго.

²⁴ Гьединлъидалин дица нужеда абулеб бугеб: дугӏадулъ нужеца Аллагьасда щиб гьарулеб бугониги, нуж божа гьес нужер гьари тӏубан бугилан. Тӏубазеги бугебха гьеб!

^25-26 Гьари-дугӏаялъе Аллагьасда цере чӏараб мехалъ, нужер ццин бугел гӏадамал ратани, гьезда тӏасалъугьа, гьебмехалъ Зобалазда вугев нилъер Эменги лъугьине вуго нужер къосиналда тӏаса.

«Лъица дуе ихтияр кьураб?»

²⁷ Нахъеги Иерусалималде щвана гьел. Мукъадасаб Рокъов жанив тирулев Гӏиса вугеб мехалъ, гьесда аскӏоре рачӏана чӏахӏиял кашишзаби, диниял гӏалимзаби, чӏухӏби-хӏакимзаби.

²⁸ Гьез Гӏисада гьикъана: – Гьаб хӏалтӏи гьабизе ихтияр бугебищ дур? Лъица дуе гьеб ихтияр кьураб? – абун.

²⁹ Гӏисаца гьезие жавабалъе абуна: – Дицаги кьела нужее цо суал. Нужеца гьелъие жаваб кьуни, гьебмехалъ бицина дица нужеда лъица дие гьеб ихтияр кьурабали.

³⁰ Лъадалъ ччун рахъун гӏадамал рацӏцӏад гьаризе ихтияр Яхӏяе кисан щун букӏараб: зобалаздасанищ яги гӏадамаздасанищ? Кье дие жаваб.

³¹ Цоцазда гьоркьоб хабар ккана гьезул. «Зобалаздасан букӏанин абуни, гьес нилъеда абилагури, гьедин батани, щайха нуж Яхӏяда божичӏелилан.

³² Гӏадамаздасан букӏанин абуни...» Гьедин абизеги, халкъалъукьа хӏинкъун рукӏана гьел, киназго Яхӏя хӏакъав авараглъун рикӏкӏунев вукӏиндал.

³³ Жидеда лъаларилан жаваб кьола Гӏисае гьез. Гӏисаца гьездаги абула: – Дица нужедаги бицинаро лъил ихтияралдалъун гьаб хӏалтӏи гьабулеб бугебали.