Марк 10 - Инжил

10 бетӏер Гӏисаца ригьнал хӏакъалъулъ бицуна

¹ Гьениса вахъун Ягьудиялъул ракьалде щола Гӏиса ва Иорданалъул добцояб рахъалда бугеб улкаялде уна. Нахъеги бакӏарула гьесда аскӏобе гӏемераб халкъ. Гӏисаца, жиндирго гӏадаталда рекъон, гьенибги гьабуна гӏадамазе вагӏза-насихӏат.

² Гӏисал хӏалбихьизе рачӏун, фарисеяз гьесда гьикъана: – Динияб къануналъ изну кьолебищ росас чӏужу йиччан тезе? – абун.

³ Мусал къануналда кин бугебилан гьикъана гьезие жавабалъе Гӏисаца.

⁴ Гьез абуна: – Мусаца изну кьун буго, «цӏар тӏамиялъе нугӏлъи гьабулеб кагъат кодобе кьолеб бугони, чӏужу йиччан тезе бегьулилан».

⁵ Гӏисаца гьезда абуна: – Мусаца нужее гьеб Къанун хъвана нужер чанкӏкӏи сабаблъун.

⁶ Дуниял бижараб мехалдасаго Аллагьас рижана бихьинчиги чӏужугӏаданги.

^7-8 «Гьединлъидал эбел-эменги рехун тун, бихьинчи чӏела жиндирго чӏужуялде вуссун, ва гьел кӏиялго цолъун, цого лъугьина». Гьелдаса хадур кӏиго рукӏунаро гьел, цого рукӏуна.

⁹ Хӏасил, Аллагьас цолъизабураб инсанас батӏалъизабизе бегьуларо.

¹⁰ Цинги рокъобги гьикъана муридаз гьелъулго хӏакъалъулъ.

¹¹ Гӏисаца гьезие жаваб гьабуна: – Чӏужуги йиччан тун, цогидай ячарав чи, жиндирго йикӏарай чӏужуялда цеве мунагьалъукье ккола. Гьеб мунагьги зиналъун рикӏкӏуна.

¹² Росасдаса ятӏалъун цогидасе арай гӏаданги зиначӏужу ккола.

Гӏисаца лъималазе дугӏа гьабула

¹³ Жидерго лъимал рукӏана гӏадамаз Гӏисахъе рачун рачӏунел, гьезда цо квер хъвайилан гьарун. Муридаз гьел риччалел рукӏинчӏо.

¹⁴ Гьеб бихьидал, Гӏисал ццин бахъана. Гьес абуна: – Лъимал дихъе рачӏине риччай, гьезие квекӏен гьабуге нужеца. Гьединазейин Аллагьасул Парччахӏлъи щун бугеб!

¹⁵ Хӏакълъун абулеб буго дица нужеда: Аллагьасул Парччахӏлъи лъимаца гӏадин къабул гьабичӏев чиясе гьенибе нух гьечӏо.

¹⁶ Гӏисаца гьел лъимал каранде къана, тӏад кверал рахъун, гьезда баркат лъегиян дугӏа гьабуна.

Аллагьасул Парччахӏлъиги инсанасул бечелъиги

¹⁷ Гӏиса гьениса унаго, цо чи вачӏана векерун ва, гьесда цеве накабаздаги чӏун, гьикъана: – Я лъикӏав Мугӏалим! Абадияб рукъалъул бутӏа щвеялъе щиб дица гьабизе кколеб?

¹⁸ Гӏисаца гьесда абуна: – Щай дуца дида лъикӏавилан абулеб? Щивниги лъикӏав вукӏунаро, цохӏо Аллагь гурони!

¹⁹ Дуда лъалагури Аллагьасул амруял: «чи чӏваге», «зина гьабуге», «цӏогьодуге», «гьересинугӏлъи гьабуге», «даран-базаралъулъ хӏилла-рекӏкӏ гьабуге», «эбел-инсул адаб-хъатир гьабе».

²⁰ Дов чияс Гӏисае жаваб гьабуна: – Я Мугӏалим! Гӏолохъанаб мехалдасаго тӏуразарулел руго дица гьел амруял.

²¹ Гьев чи рекӏее гӏедал, гьесухъги валагьун, Гӏисаца абуна: – Цо жо буго дуе камун: инеги ун, дурго бугеб кинабго боцӏи-рикъзи биче ва мискин-пакъирасе садакъаде кье, гьелъухъ дуе насиблъила зобалазул хазина. Цинги дихъе вачӏа, дида цадахъ вилълъине.

²² Гӏисал рагӏабаз ракӏ лъукъарав гьев чи къваридго нахъе ана. Щайгурелъул гьев вукӏун вуго кутакалда бечедав чи.

²³ Гьебмехалъ сверухъ ругел гӏадамазухъги валагьун, Гӏисаца жиндирго муридазда абуна: – Бечедав чиясе Аллагьасул Парччахӏлъиялде ворчӏизе захӏмалъулеб куц!

²⁴ Гьелъ муридал хӏикмалъизаруна. Гӏисаца нахъеги гьезда абуна: – Ле дир лъимал! Аллагьасул Парччахӏлъиялде лъугьине захӏмалъизе бугеб куцха!

²⁵ Рукӏкӏадул ролъиялъусан лъугьине вараниялъего бигьа букӏина, Аллагьасул Парччахӏлъиялде ворчӏизе бечедав чиясеялдаса.

²⁶ Цӏакъго хӏикмалъун хутӏарал гьез цоцазда абулеб букӏана: – Гьедин батани, хвасарлъизе кӏолев чигӏаги щивдайха?

²⁷ Гьезухъги валагьун, Гӏисаца абуна: – Гӏадамазда гьеб кӏолареб, амма Аллагьасда кӏолебха! Аллагьасда хӏалкӏолареб жо щибниги гьечӏелъул!

²⁸ Гьебмехалъ Пётрица гьесда абуна: – Гьале, кинабго рехун тун, ниж дуда цадахъ рилълъана...

²⁹ Гӏисаца гьесие жаваб кьуна: – Хӏакълъун абулеб буго дица нужеда: дие гӏоло ва Рохалил хабаралъе гӏоло мина-рукъги, вацал-яцалги, эбел-эменги, чӏужу-лъималги, хур-ахги рехун тарав цониги чи хутӏизе гьечӏо,

³⁰ гьелъухъ хӏатта гьанже дуниялалъул рокъоб гӏазаб-гӏакъубаялдаго цадахъ, – гьелдаса нусцӏулго цӏикӏкӏун мина-рукъги, вацал-яцалги, эбел-эменги, лъимал-агьлуги, хур-ахги щвечӏого, ва доба ахираталъул рокъоб абадияб гӏумруги насиблъичӏого.

³¹ Цере рукӏарал чангиял тӏарамагъаде ккела, тӏарамагъада рукӏаразул чангиял цере ккела.

Гӏазаб-гӏакъубаялъул хӏакъалъулъ – лъабабизеги

³² Иерусалималдехун ралагьун унел рукӏана гьел. Гӏиса цеве-цеве вукӏана. Гьесда хадур рачӏунаго, гьесул муридал рахӏат хун рукӏана. Гьесда хадуб бачӏунеб халкъги хӏинкъун букӏана. Анцӏила кӏиявго чапарги аскӏове ахӏун, нахъеги байбихьана гьес жиндиего ккезе бугелъул хӏакъалъулъ бицине:

³³ – Гьале нилъ Иерусалималде унел руго. Гьенив Гӏадамил Лъимер кьезе вуго чӏахӏиял кашишзабаздаги диниял гӏалимзабаздаги кодове ва гьезги гьев чӏвазе къотӏила. Цинги гьев кьела цогидаб халкъалъул гӏадамазда кодове.

³⁴ Гьезги инжит-хӏакъир гьавила, тӏаде тударила, цӏалаца вухила, цинги чӏвала ва лъабабилеб къоялъ хваралъуса вахъина гьев.

Зебедайил васазул гьариялъе Гӏисал жаваб

³⁵ Гьебмехалъ гьесда аскӏове вачӏуна Зебедайил кӏиявго вас – Якъубги Иоаннги. Гьез абула: – Я Мугӏалим! Нижее бокьун буго нижеца гьарараб жо дуца тӏубазе.

³⁶ Гӏисаца гьикъана: – Дица щиб гьабизе нужее бокьун бугеб?

³⁷ Гьез абуна: – Къудраталъул тахиде мун вахараб мехалъ, цояв кваранаб рахъалда, цогидавги квегӏаб рахъалда, дуда аскӏор гӏодор чӏезаре ниж.

³⁸ Гӏисаца гьезда абуна: – Нужедаго лъалеб гьечӏо нужеца гьарулеб бугеб жо. Кӏвеладай нужеда дица гьекъезе бугеб лълъарги гьекъезе, дица бахине бугеб гӏорги бахине?

³⁹ Кӏвелилан жаваб кьуна гьез. Гӏисаца абуна: – Дица гьекъезе бугеб лълъарги гьекъезе ккезе буго нужеца, дица бахине бугеб гӏорги бахине ккезе буго.

⁴⁰ Амма дир кваранабги квегӏабги рахъалда гӏодор чӏезариялъул иш дида бараб гьечӏо, Бетӏергьанасул хӏукмуялда бараб буго.

⁴¹ Гьеб хабар рагӏарабго, хутӏарав анцӏавго муридасул ццин бахъана Якъубидаги Иоаннидаги.

⁴² Аскӏореги ахӏун, Гӏисаца гьезда абуна: – Нужеда лъалагури цогидал халкъазул парччахӏзабийилан рикӏкӏунел гӏадамаз халкъалда тӏад ханлъи гьабулеблъи, чӏухӏби-хӏакимзабазги гӏадамазда тӏад жидерго ихтияр билълъанхъизабулеблъи.

⁴³ Амма нужеда гьоркьоб гьедин букӏине бегьуларо. Нужеда гьоркьоса лъиениги бищунго кӏудиявлъун вукӏине бокьани, гьев цогидазе хъулухъалъе чӏа абе.

⁴⁴ Нужеда гьоркьоса бищунго цеве вукӏине бокьаравги киназего лагълъун вукӏа абе.

⁴⁵ Щайгурелъул Гӏадамил Лъимерги лъицаниги жиндие хъулухъ гьабизе вачӏун гьечӏо. Гьев вачӏун вуго цогидазе хъулухъ гьабизе ва гӏемеразе гӏоло рецӏалие жиндирго рухӏ кьезе.

Гӏисаца бецав Бартимайида канлъи бихьизабула

⁴⁶ Гьале гьел Иерихоналде щола. Цинги, жиндирго муридалгун цадахъ Гӏиса гьениса къватӏиве вахъунеб мехалъ, гӏемераб халкъ букӏана гьесда хадуб бачӏунеб. Гьенив нухлул ракьанда кӏусун ватана Бартимай (Тимайил вас) абулев цо бецав гьардухъан.

⁴⁷ Назареталдаса Гӏиса жинда цевесан унев вукӏинги лъан, ахӏдезе лъугьана гьев: – Я, Давудил вас Гӏиса! Гурхӏа мун дида!

⁴⁸ Вуцӏцӏун чӏайилан абуна гьесда гӏадамаз. Амма гьев дагьабги гьаракь борхун ахӏдезе лъугьана: – Я, Давудил вас! Гурхӏа мун дида!

⁴⁹ Гьенивги лъалхъун, Гӏисаца абуна гьев чи жинда аскӏове вачейилан. Гӏадамаз Бартимайида абуна: – Гьа, ракӏ гӏодобе биччай гьанже! Вилълъа, мун жиндихъе вачеян абулеб бугин дос.

⁵⁰ Тӏад букӏараб гӏабаги гӏодобе рехун, гьев кӏанцӏун тӏаде вахъана ва Гӏисада аскӏове вачӏана.

⁵¹ Гӏисаца гьесда гьикъана: – Дица щиб гьабизе дуе бокьун бугеб? Бецас жаваб гьабуна: – Я, Раббуни! Беразда нахъеги канлъи бихьизе бокьун буго.

⁵² Гӏисаца гьесда абуна: – А гьанже. Дурго божи-иманалъ сахлъизавуна мун. Гьебсагӏат беразда канлъиги бихьун, Гӏисада хадув къокъана гьев чи.