Марк 1 - Инжил

1 бетӏер Яхӏя авараг халкъалда цеве вахъуна

¹ Аллагьасул вас Гӏиса Масихӏил хӏакъалъулъ Рохалил хабар гьадин байбихьулеб буго.

² Ишая аварагасул тӏехьалда ругел Аллагьасул рагӏаби ритӏухълъана: «Гьале, мун вачӏиналде дуе нух къачӏазе дирго илчи вуго дица цеве витӏулев»;

³ «Цо ахӏи буго авлахъалда рагӏулеб: – Бетӏергьанасе нух къачӏай, битӏизабе гьесда цебе шагьра!»

⁴ Гьедин вачӏана Яхӏя авараг авлахъалде. Нужерго мунагьал чуризе гӏоло, кантӏун Аллагьасде руссаян ва лъадалъ ччун рахъаян лъазабулеб букӏана гьес.

⁵ Гьесухъе бачӏунеб букӏана Ягьудиялъул улка-ракьалъулги Иерусалималъулги тӏолабго халкъ. Жидерго мунагьал рехсон хадуб, Аллагьасде руссун, гьезул мунагьал чуризе Иордан гӏурул лъадалъ ччун рахъулаан Яхӏяца гӏадамал.

⁶ Ретӏунеб ретӏелги Яхӏял варанидул квасул букӏана, рачлихъ борчунги букӏана хьвацӏил рачел. Гьес кваналеб жоги букӏана гарцӏги гӏалхул гьоцӏоги.

⁷ Гьес гӏадамазда лъазабулеб букӏана: – Дида хадувго вачӏунев вуго дидаса гӏемерго къудрат цӏикӏкӏарав. Гӏодове къулун гьесул хьитил рухьен бичизецин мустахӏикъав гьечӏо дун.

⁸ Лъадалъ ччун рахъун, рацӏцӏад гьаруна дица нуж. Гьес нуж рацӏцӏад гьарила Илагьияб Рухӏалдалъун.

Гӏиса Аллагьасул Вас вукӏин загьирлъула

⁹ Гьел къоязда Галилеялъул Назарет шагьаралдаса гьениве вачӏарав Гӏисаги Иордан гӏурул лъадалъ ччун вахъана Яхӏяца.

¹⁰ Гӏиса лъадалъа къватӏиве лъугьунаго, бихьана гьеб лахӏзаталда, зобалги кӏирикьизарун, Илагьияб Рухӏ, миккидул сураталда боржун бачӏун, гьесухъе рещтӏунеб.

¹¹ Цинги гьаракьги рагӏана зобалаздасан: – Мун вуго дие вокьулев дир Вас! Дудаса вохун вуго дун!

Илбисалъ хӏалбихьула Гӏиса къосинавизе

¹² Гьебсагӏат гьеб Рухӏалъ Гӏиса гӏицӏаб авлахъалде ине гьесизавула.

¹³ Гьеб авлахъалда кӏикъого къо бана Гӏисаца. Илбисалъги хӏалбихьана гьениб гьев къосинавизе кӏоларищали. Гьенив гӏалхул жанаваразда гьоркьовги вукӏана Гӏиса. Малаикзабиги рукӏана гьенир Гӏисае хъулухъалъе.

Гӏисал тӏоцересел муридал

¹⁴ Яхӏя авараг гвандинив тӏамун хадув Галилеялде уна Гӏиса. Гьес гьениб лъазабула Аллагьасдасан Рохалил хабар.

¹⁵ Гьес абулеб букӏана: – Болжал щвана! Аллагьасул Парччахӏлъи тӏаде гӏунтӏун буго! Нуж кантӏе, Аллагьасде русса! Гьеб Рохалил хабаралде иманги лъе!

¹⁶ Галилеялъул ралъдал рагӏалдасан унаго, Гӏисада рихьана ччугӏие гьин рехулел Симонги гьесулго вац Андрейги. Гьел рукӏана ччугӏихъаби.

¹⁷ – Дида цадахъ рилълъа, – ян абуна гьезда Гӏисаца. – Дица нуж лъугьинарила гӏадамал кколел ччугӏихъабилъун.

¹⁸ Гьенибго гьинги тун, гьебсагӏат гьел Гӏисада цадахъ уна.

¹⁹ Гьениса гӏемерго рикӏкӏалъилалде, Гӏисада рихьана Зебедайил вас Якъубги гьесулго вац Иоаннги. Ччугӏа кквезе гьин къачӏалел рукӏана гьелги росода тӏад.

²⁰ Гьездеги ахӏана Гӏисаца, жинда цадахъ рилълъаян. Жидерго эмен Зебедайги гьесул хӏалтӏухъабиги росонир тун, гьев кӏиявгоги ана Гӏисада цадахъ.

Гӏисаца унтарал гӏадамал сахлъизарула

²¹ Цинги гьел щвана Капернаум шагьаралде. Шамат къо тӏаде щварабго, синагогаялъувеги вачӏун, гьениб гӏадамазе вагӏза гьабизе лъугьана Гӏиса.

²² Гӏисал вагӏзаялъ хӏикмалъизарун рукӏана гьел. Диниял гӏалимзабаз гӏадин гуреб, цо хӏалкӏолъи жиндилъ бугев чияс гӏадин малъулеб букӏана гьес.

²³ Синагогаялъуве лъугьун вачӏана хъубаб женалъ ккурав цо чи. Гьев ахӏдезе лъугьана:

²⁴ – Нижедасан дуе къваригӏараб щиб, Назареталдаса Гӏиса! Ниж гъуризейищ мун вачӏун вугев! Дида лъала мун щивали. Илагьияв чи вуго мун! Аллагьас витӏун вуго мун!

²⁵ Амма Гӏисаца жен чӏезабуна: – Кӏал къай дуца! Нахъе а мун гьесул чорхолъа!

²⁶ Гьев чиясул нусабго лага сородизабуна шайтӏаналъ. Цинги гӏасияб гьаракьги гьабун, лъутун ана гьеб гьесул чорхолъа.

²⁷ Гьелда гӏажаиблъун-хӏикмалъун хутӏана гӏадамал. Гьез цоцазда гьикъулеб букӏана: – Гьабго щиб хӏикмат? Цӏияб гӏелмуцинищ гьаб? Хъубал жундузецин амру гьабизе кӏолеб къудрат кинаб, гьесул амруялъе мутӏигӏлъулел жундулги кинал?

²⁸ Тӏолабго Галилеялда хехго тӏибитӏун ана Гӏисал хӏакъалъулъ хабар.

Гӏисаца Пётрил якьад сахлъизаюла

²⁹ Гьебсагӏат синагогаялъуса къватӏиве вахъун, цадахъ Якъубги Иоаннги рачун, гьев ана Симонилги Андрейилги бакӏалде.

³⁰ Цӏа-каналъул унтуца бусаде ккун ятана Симонил якьад. Гьебсагӏат Гӏисада бицуна гьей унтун йигилан.

³¹ Аскӏове ун, Гӏисаца гьей, кверги ккун, йорхизаюла. Цӏа-канги ун, якьад гьазие квен-тӏехалда квалквадизе лъугьуна.

³² Бакъ тӏерхьун, маркӏачӏубер рукӏкӏарабго, киналго унтаралги хъубал жундуз ккуралги рачӏана Гӏисахъе рачун.

³³ Тӏолабго шагьар бакӏарун букӏана гьеб сордоялъ Симонил кавудахъе.

³⁴ Гӏисаца сах гьаруна батӏи-батӏияб гӏузруялъ унтарал гӏемерал гӏадамал. Чанги чиясул чорхолъа бачахъана хъубаб жен. Гьес хъубал жундул кӏалъазе риччалароан, гьезда лъалеб букӏиндалха гьев щивали.

³⁵ Нахъисеб къоялъ хъахӏлъи барабго тӏадеги вахъун, Гӏисаца нух босана гӏадан-чи гьечӏеб бакӏалде ва гьенив Аллагьасе гьари-дугӏаялде вуссун чӏана.

³⁶ Гьесул лъалкӏда хадур рахъарал Симонидаги гьасда цадахъ рукӏараздаги ватана Гӏиса.

³⁷ Гӏисада гьез абуна киналго мун валагьулел ругилан.

³⁸ Гӏисаца гьезда абуна: – Рилълъа сверухъ ругел росабалъе ва шагьаразде, гьенибги халкъалъе Рохалил хабар бицине ккола дица. Гьелъие гӏололъидалха дун гьаниве вачӏарав.

³⁹ Тӏолабго Галилеялъул ракьалде щун, синагогабазде ун, гӏадамазе вагӏза гьабуна гьес ва чангиязул чурхдулъа жундул рачахъана.

Гӏисаца вацӏцӏалъизавула барасалъ унтарав цо чи

⁴⁰ Барасалъ унтарав цо чи вачӏана Гӏисахъе ва накабазда чӏун гьардезе лъугьана: – Дуе бокьани, дуда кӏолаха дун вацӏцӏалъизавизе!

⁴¹ Гьесда гурхӏун Гӏисаца, гӏебеде битӏун квер хъвана гьесда. Цинги абуна: – Дие бокьун буго мун вацӏцӏалъизе. Вацӏцӏалъе мун!

⁴² Тӏад букӏараб чанхъги гъенон ун, гьебсагӏат вацӏцӏалъана гьев чи.

^43-44 Нахъе витӏулаго, Гӏисаца гьесда лъазабуна: – Вореха, дуца лъиданиги бицунге гьаб хӏалтӏи! Мусал къануналда рекъон, мунго вацӏцӏалъун вукӏин гӏадамазда лъазе, кашишасухъеги ун, гьесда дурго черх бихьизабе ва мунго вацӏцӏалъаралъухъ къурбанги хъвезабе.

⁴⁵ Амма гьениса нахъе аравго, гьев чи лъугьана ккараб иш киназего гьурщизе. Гьединлъидал Гӏисада кӏвечӏо тӏатун шагьаралде вачӏине, гӏадан-чи гьечӏеб бакӏалда вахча-хьван чӏезе ккана. Амма киса-кисагоги гӏемераб халкъ бачӏунаан гьесухъе.