Лука 8 - Инжил

8 бетӏер Гӏисае хъулухъалъе чӏун рукӏарал руччаби

¹ Гьелдаса хадуб Гӏиса Аллагьасул Парччахӏлъи тӏаде гӏунтӏун букӏин лъазабулаго ва Рохалил хабар бицунаго шагьаразда ва росабалъ тирулев вукӏана. Анцӏила кӏиявго чапарги вукӏана гьесда цадахъ.

² Гӏисада цадахъ рукӏана гьес сахлъизарурал ва жундуздаса рацӏцӏад гьарурал руччаби: жиндир чорхолъа гьес анкьго илбис бачахъарай Магдалина абураб тӏокӏцӏар бугей Марямги,

³ Гьеродил рукъалъул иш тӏадкъарав Хуза абулев чиясул лъади Иоаннаги, Сусаннаги ва цогидалги, жидер боцӏи-рикъзиялдасан кумек гьабун, гьезие хъулухъалъе чӏун рукӏарал руччаби.

Хуриб хьон хьалев чиясул мисал

⁴ Цо нухалъ гӏемераб халкъ бакӏарун букӏана гьесда аскӏобе. Мисал бачун гьадинаб хабар бицана Гӏисаца гьезие:

⁵ – Хуриб хьон хьазе вахъун вукӏанила цо чи. Хьалаго-хьалаго цо-цо мугьал нухде рортанила. Хӏатӏикь мерхьунел рукӏарал гьел мугьал роржун рачӏун хӏанчӏаз рищанила.

⁶ Цо-цо мугьал ракьул хъал гурони тӏад гьечӏеб тӏалде кколел рукӏанила. Тӏаде раккаралго ракъванила гьел, ракьулъ регьел букӏинчӏелъул.

⁷ Цогиги мугьал заз-хъарахъалда гьоркьоре кканила, хӏалигъун бижараб заз-хъарахъалъ гъанкъун реханила.

⁸ Цогидал мугьал кканила лъикӏаб ракьалде. Нус-нус мугь тӏад бугел тӏорал рижанила гьездаса. Гьедин гьеб хабарги лъугӏизабун, ахӏун абуна Гӏисаца: – Гӏундул ругезда рагӏизе биччанте гьеб! – ан.

⁹ Гьеб мисалалъул магӏна щибилан гьикъана муридаз.

¹⁰ Гӏисаца абуна: – Нуж руго Аллагьасул Парччахӏлъиялъул балъголъи лъазе рес щварал гӏадамал, амма цогидазе – мисалаздалъун кьун буго, ралагьун ругониги гьезда бихьунгутӏизе, гӏенеккун ругониги бичӏчӏунгутӏизе.

¹¹ Гьале доб мисалалъул магӏна: хуриб хьалеб хьон буго Аллагьасул рагӏи.

¹² Нухде рортарал хьодул мугьал – гьел руго Аллагьасул рагӏухъ гӏенеккулел гӏадамал, цинги бачӏун илбисалъ гьезул рекӏелъа гьеб босун уна, гьел божунгутӏизе ва хвасарлъунгутӏизе.

¹³ Ракьул хъал гурони тӏад гьечӏеб тӏалде рортарал мугьал – гьел руго Аллагьасул рагӏи рохун къабул гьабуниги, дагьабго заманаялъ гурони гьелда божуларелал, – жидер кьалбал щулиял гьечӏелъул, хӏалбихьулел къоял тӏаде гӏунтӏидал, жал ратӏалъунги чӏолел.

¹⁴ Заз-хъарахъалде гъорлъе рортарал мугьал – гьел руго Аллагьасул рагӏухъ гӏенеккулелал, – амма къокъун унеб бугеб гӏумруялъул тӏалаб-агъазалъ ва бечелъиялдаги тӏагӏам-лазаталдаги хадур хачадиялъ гьел гъоркькъинарула, гьезда тӏорги цӏубаларо.

¹⁵ Лъикӏаб ракьалде рортарал мугьал – гьел руго Аллагьасул рагӏи рагӏидал, хӏеренаб-хӏалимаб рекӏелъ гьеб цӏунулел ва гьеб сабру сабаблъун жидее бачӏинги щолел гӏадамал.

Чирахъалъул мисал

¹⁶ Рекӏараб чирахъ тӏад хьаг лъун лъицаниги бахчизабуларо, хьонбакӏалда гъоркь лъоларо. Жанире лъугьаразе канлъи букӏунедухъ борхатаб бакӏалда лъола гьеб.

¹⁷ Кинабго бахчарабщинабги тӏатунелъул, балъгоябщинабги къватӏибе загьирлъулелъул.

¹⁸ Гьединлъидал нужеца хал гьабе кин нуж дихъ гӏенеккун ругелали. Кодолъи бугесе тӏадеги кьезе буго, кодолъи гьечӏесухъа бахъизе буго бугебилан гьесда кколебги.

Гӏисахъе рачӏуна гьесул эбелги вацалги

¹⁹ Гӏисахъе рачӏана эбелги вацалги, амма халкъалъул гӏемерлъиялъ гьесда аскӏобе нух бахъизе кӏвечӏо гьезда.

²⁰ Дур эбелги вацалги мун вихьизе бокьун къватӏир чӏун ругилан абуна гьесда.

²¹ Гьес гьезда абуна: – Дир эбелги дир вацалги руго Аллагьасул рагӏи жидеда рагӏулел ва гьеб тӏубазабулел гӏадамал.

Гӏисаца гьури къотӏизабула

²² Цо къоялъ жиндирго муридазда цадахъ гьев росода рекӏана. – Рачӏа доб рахъалде рахине, – ян абуна гьес гьезда. Расаги бачун ана гьел.

²³ Гьедин унел гьал рукӏаго, Гӏиса кьижун ккана. Хӏоралда тӏад кутакаб гьури багъарана. Раса лъадал цӏолеб букӏана. Гъанкъиялда хӏинкъи букӏана.

²⁴ Аскӏоре ун, гьез Гӏиса ворчӏизавуна: – Я, Насихӏатчи! Насихӏатчи! Нилъ гъанкъизехъин руго! – ян абун. Макьидаса вигьун, гьес гьорода лъазабуна тӏокӏаб пугейилан, лъадаеги амру гьабуна гьалаглъугейилан. Гьел мутӏигӏлъана. Сихӏ къотӏун лъугьана.

²⁵ Гьебмехалъ Гӏисаца абуна: – Киб бугеб нужер божи-иман? Хӏинкъиялъ гӏажаиблъун хутӏарал гьез цоцазде ургъел бикьулеб букӏана, гьороеги карачалабазеги амру гьабулев ва гьелги жиндие мутӏигӏав гьавго кинав чийилан.

Гӏисаца сахлъизавула жундуз ккурав чи

²⁶ Гьале гьал щвана Галилеялда дандбитӏун доб рахъалда бугеб герасеназул улкаялде.

²⁷ Гьев ракъдаде рещтӏараб мехалъ, гьесда данде вачӏана цеве шагьаралда вукӏарав цо чи. Гьев вукӏана цевегоялдаса жундуз ккурав чи. Цебегоялдаса нахъе тӏад ретӏелги ретӏунароан гьес, мина-руссеналъувги чӏолароан гьев, хабалазул нохъазда букӏана гьесул чӏейи.

²⁸ Гӏиса вихьаравго чӏчӏичӏчӏидулаго-ахӏдолаго гьесда цеве кӏалагъоркье речӏчӏана, ва кӏудияб гьаракь гьабун, абуна гьес: – Тӏадегӏанав Аллагьасул Вас Гӏиса, щиб дуе дидасан къваригӏараб? Дие гӏазаб кьогейилан гьарула дица дуда!

²⁹ (Гӏисаца хъубаб женалъе амру гьабун букӏиндалха гьев чиясул чорхолъа къватӏибе лъугьаян. Чанго нухалъ хъубаб женалъ ккун вукӏиндал, кверазда рахсал ран, бохдузда маххал ран вухьунаан гьев. Амма, гьес рухьен тӏутӏураб мехалъ, женалъ гьев гӏадан-чи гьечӏеб бакӏалде хъамулаан.)

³⁰ Гӏисаца гьикъана дуда цӏар щибилан. – «Бо» буго, – ян жаваб кьуна. Гӏемерал жундул рукӏиндалха гьесул чорхолъ.

³¹ Жундуз Гӏисада гьарана жал жужахӏалъул кӏкӏалахъе гъогеян.

³² Гьениб магӏарда кваналеб букӏана болъоназул кӏудияб рехьед. Гьел болъоназда гъорлъе лъугьине риччайин гьарана жундуз Гӏисада. Гьес изну кьуна.

³³ Гьев чиясул чорхолъа къватӏире рачӏун хъубал жундул болъоназулъе лъугьана. Гьебсагӏат рехьед цо борхатаб бакӏалдасан хӏоринибе кӏанцӏана ва гьениб гъанкъана.

³⁴ Гьеб кинабго бихьун болъоназул гӏухьби лъутун ана, шагьаралдаги росабалъги гьелъул хӏакъалъулъ бицине.

³⁵ Щиб лъугьарабали лъазе гӏадамал рачӏана гьенире. Гӏисада аскӏоре щведал, гьесул хӏатӏазда цеве гӏодов чӏун ватана гьезда дов жундуз ккун вукӏарав чи: тӏад ретӏелги буго гьесда, камилаб гӏакълу-лъаялдаги вуго. Гӏадамазул рекӏелъе хӏинкъи лъугьана.

³⁶ Гьенир рукӏараз бицана жундуз ккурав чи Гӏисаца кин сахлъизавуравали.

³⁷ Герасеназул тӏолабго улкаялъул гӏадамал кутакалда хӏинкъидал, гьез Гӏисада гьарана жидеда аскӏоса нахъе айилан. Гьебмехалъ, росодаги рекӏун, тӏадвуссун ана гьев.

³⁸ Дов жундуз ккун вукӏарав чияс Гӏисада гьарана живги цадахъ вачейилан. Амма Гӏисаца гьев вачинчӏо.

³⁹ Гьес абуна: – Дурго рокъове тӏадвусса ва Аллагьас дуего гьабуралъул хӏакъалъулъ бице. Инеги ун гьев чияс кинабго шагьаралдаго бицана Гӏисаца жиндиего гьабуралъул хӏакъалъулъ.

Гӏисаца унтарайги сахлъизаюла хварайги чӏаголъизаюла

⁴⁰ Тӏадвуссун Галилеялде вачӏараб мехалъ, халкъалъул руккелалъ дандчӏвай гьабуна Гӏисада. Гьев вачӏиналъухъ ралагьун чӏун рукӏиндалха гьел киналго.

⁴¹ Гьале синагогаялъул хӏакимлъун вукӏарав Яир абулев цо чи вачӏана гьениве, Гӏисал хӏатӏазда цеве кӏалагъоркьеги речӏчӏун гьардана жиндир бакӏалде вилълъаян.

⁴² Гьев чиясул анцӏила кӏигогӏан сон барай цохӏо йигей яс йикӏана хвалде ккун унтун. Гьелъухъе унаго халкъалъул руккелалъ Гӏиса данде къазавулев вукӏана.

⁴³ Анцӏила кӏиго соналъ би къотӏичӏого ва черх бацӏцӏалъичӏого йикӏарай, лъиданиги сахлъизайизе кӏвечӏей цо чӏужугӏаданалъ,

⁴⁴ аскӏоеги ячӏун, нахъасан Гӏисал гӏабаялдасан далун букӏараб цо гӏертелалда квер хъвана. Гьебсагӏат къотӏана гьелъул чорхолъа чвахулеб букӏараб би.

⁴⁵ Гӏисаца гьикъана: – Дида квер лъица хъвараб? – ан. Киназго инкар гьабидал, Пётрица абуна: – Я, Насихӏатчи, халкъалъ мун гьоркьов вазавун вугогури, данде къазавулев вугогури.

⁴⁶ Амма Гӏисаца абуна: – Цо лъицаялиго дида квер хъвана. Дидасан гьесде цо чи сахлъизавизе кӏолеб къуват араблъи загьирлъана дие.

⁴⁷ Жиндир иш балъго хутӏичӏеблъи лъан, дой чӏужугӏадан сородилаго Гӏисада аскӏое ячӏана, гьесда цее кӏалагъоркье речӏчӏун, бицана щай жинца гьесда квер хъварабали ва кин жий гьебсагӏат сахлъараялиги.

⁴⁸ Гьес гьелда абуна: – Дурго божи-иманалъ хвасар гьаюна, яц, мун. Гьанже а дурго!

⁴⁹ Гьелдехун кӏалъалев Гӏиса вукӏаго, синагогаялъул хӏакимасул бакӏалдаса цо чи вачӏана ва инсуда абуна дур яс хванилан, гӏадада Мугӏалимасул рахӏат хвезабугейилан.

⁵⁰ Гьеб рагӏидал, Гӏисаца ясалъул инсуда абуна: – Мун хӏинкъуге, божун вукӏа. Дур яс сахлъила, – ян.

⁵¹ Гьезул бакӏалде щведал, Пётрги, Иоаннги, Якъубги ва ясалъул эбел-эменги гурони, цогидал гьес жанире риччачӏо.

⁵² Киналго, гьей ясалъухъ керен бухулаго, гӏодулел рукӏана. Амма гьес абуна: – Нуж гӏодуге. Гьей хун гьечӏо, кьижун ккун йиго, – ян.

⁵³ Гьел гьасда тӏад релъанхъизе лъугьана, гьей хун йикӏинги лъан.

⁵⁴ Амма гьес, ясалъул кверги ккун, гьелде ахӏана: – Тӏаде яхъа, ясай! – абун.

⁵⁵ Ясалъул чорхолъе рухӏ тӏадбуссун бачӏана, гьей гьебсагӏат тӏаде яхъана. Гьелъие квен кьеян абуна Гӏисаца.

⁵⁶ Гӏажаиблъун хутӏана гьелъул эбел-эмен. Амма гьеб лъугьа-бахъиналъул хӏакъалъулъ лъиданиги бицунгеян лъазабуна Гӏисаца гьезда.