Лука 4 - Инжил

4 бетӏер Илбисалъ хӏалбихьула Гӏиса къосинавизе

¹ Илагьияб Рухӏалъ цӏурав Гӏиса Иорданалдаса тӏадвуссана ва гьеб Рухӏалъ гьев гӏицӏаб авлахъалде вачана.

² Гьениб кӏикъого къо бана Гӏисаца. Илбисалъги хӏалбихьана гьев къосинавизе. Гьебщинаб заманаялъ богӏоллъи кӏалдибе босичӏо. Кӏикъого къо индал, ракъул хӏал бергьана гьесие.

³ Илбисалъ гьесда абуна: – Мун Аллагьасул Вас ватани, гьаб ганчӏие амру гьабе чедлъун лъугьайилан.

⁴ Гӏисаца гьелъие жаваб кьуна: – Тӏехьалда хъван буго: «Цохӏо чадица гуребин чиясе чӏаголъи кьезе бугеб».

⁵ Цинги борхалъуде вачун, гьенисан цохӏо лахӏзаталда жаниб дуниялалъул киналго пачалихъал рихьизаруна гьесда.

⁶ Гьелъ абуна: – Гьал киналго пачалихъазул парччахӏлъиги къудратги кьела дица дуе, гьеб киналъулго ихтияр дихъе щун бугелъул. Диего бокьарасе кьела дица гьеб.

⁷ Дуца дие сужда гьабуни, гьеб кинабго дур букӏине буго!

⁸ Гӏисаца жаваб кьуна: – Тӏехьалда хъван буго: «Цохӏо Аллагьасе – дурго Бетӏергьанасе гурони сужда гьабуге. Цохӏо гьесие гьабе гӏибадат!»

⁹ Илбисалъ Гӏиса Иерусалималде вачун, Мукъадасаб Рукъалъул сиялда тӏад лъуна ва гьесда абуна: – Мун Аллагьасул Вас ватани, гьаниса гъоркье кӏанцӏе!

¹⁰ Тӏехьалда хъван бугелъул: «Аллагьас малаикзабазе амру гьабун буго мун цӏунейилан»

¹¹ ва: «Гьез мун кодов ккун восила, ганчӏидацин дур хӏетӏе тункичӏого букӏине».

¹² Гьелъие жавабалъе Гӏисаца абуна: – «Дурго Бетӏергьан Аллагьасул хӏалбихьуге», – янги абун буго Тӏехьалда.

¹³ Гӏисал хӏалбихьун лъугӏарабго, санагӏатаб заман тӏаде щвезегӏан, гьесда аскӏоса нахъе ана илбис.

Галилеялда Гӏисал вагӏза-насихӏат

¹⁴ Жиндилъ Илагьияб Рухӏ цӏубарав Гӏиса цинги Галилеялде тӏадвуссана. Тӏолабго сверухълъиялдаго гьасул хӏакъалъулъ хабар тӏибитӏун батана.

¹⁵ Гьезул синагогабазде ун, гьас вагӏза гьабуна, халкъалда гьоркьоб гьасул цӏар машгьурлъана.

¹⁶ Жиндиего тарбия-лъай щвараб Назарет шагьаралде вачӏана ва гьенивги, кидаго гӏадин, шамат къоялъ синагогаялъуве ун, минбаралде вахана гӏадамазе Илагьияб Тӏехь цӏализе.

¹⁷ Ишая аварагасул Тӏехь кьуна гьесухъе. Гьадинаб калима бугеб бакӏги батун, цӏалана гьес:

¹⁸ «Дилъ Бетӏергьанасул Рухӏ буго, гьес дие ихтияр кьуна мискиназда Рохалил хабар бицине. Гьес дун витӏана асирлъуда ругезда нуж тархъанлъанилан лъазабизе, нужеда канлъи бихьанилан бецаздаги лъазабизе, зулмуялда гъоркь ругелалги хвасар гьаризе,

¹⁹ Аллагьасул рахӏмат рещтӏунеб мех тӏаде щолеб бугиланги лъазабизе».

²⁰ Цинги Илагьияб Тӏехь гьес, дандеги чӏван, динияб хъулухъалъул чиясухъе кьуна, ва насихӏат гьабизе гӏодов чӏана. Синагогаялъур данделъарал киназулго берал гьесдехун руссун рукӏана.

²¹ Гьебмехалъ Гӏисаца байбихьана: – Жакъа гьеб калимаялъухъ гӏенеккун нуж рукӏаго, ритӏухълъана гьелда рехсараб амру.

²² Гӏадамазе гьеб рекӏее гӏуна ва гьел гӏажаиблъизаруна Гӏисал кӏалдисан рачӏарал баркат бугел рагӏабаз. Амма гьез абуна: – Юсупил вас вуго гурищ гьав?

²³ Гӏисаца гьезда абуна: – Гьайгьай, «тохтирас цин живго сахлъизавизе ккола», – ян кици тӏамила нужеца дие. «Капернаумалда дуца гьабунилан нижеда рагӏарабщинаб иш гьаниб инсул ракьалдаги гьабе», – янги абила нужеца дида.

²⁴ Хадуб гьес абуна: – Хӏакъаб рагӏи буго нужее: цониги авараг рикӏкӏунаро жиндирго инсул ракьалда.

^25-26 Хӏакълъун абулеб буго дица нужеда: Иляс аварагасул заманаялда, лъабго соналъги анлъго моцӏалъги зодисан цӏадал къатӏра тӏинкӏичӏого тӏолабго ракьалде гӏасияб ракъи рещтӏараб мехалъ, Исраилил халкъалда гьоркьор гӏемерал къоролзаби рукӏаниги, Сидон улкаялъул Царепат шагьаралдаса цо къоролалъе гӏоло гурони витӏун вукӏинчӏо Аллагьас Иляс.

²⁷ Элиша аварагасул заманаялда, барасалъ унтарал гӏадамал Исраилил халкъалда гьоркьор гӏемер рукӏаниги, Сириялдаса цо Наъман абулев чи гурони, вацӏцӏалъизавичӏо гьес.

²⁸ Гьеб рагӏарабго синагогаялъур рукӏарал гӏадамал ццидаца гьалаглъизаруна.

²⁹ Тӏаде рахъун гьез Гӏиса шагьаралдаса къватӏиве вачана жидерго шагьар тӏад бараб магӏарда бугеб кьурулъа гъоркье рехизейилан.

³⁰ Амма, гӏадамазул руккалилъа ворчӏун, нахъе ана Гӏиса.

Гӏисаца Капернаумалда сахлъизавула женалъ ккурав цо чи

³¹ Цинги Галилеялъул шагьар Капернаумалде ана ва шамат къояз гьезие вагӏза гьабизе лъугьана.

³² Гӏисал вагӏзабаз хӏикмалъизарун рукӏана гьел. Цо хӏалкӏолъи жиндилъ бугев чияс гӏадин малъулеб букӏана гьес.

³³ Синагогаялъув вукӏун вуго хъубаб ва квешаб женалъ ккурав цо чи.

³⁴ – Вахӏ! Нижедасан дуе къваригӏараб щиб, Назареталдаса Гӏиса! – ян ахӏдезе лъугьана гьев. – Ниж гъуризе вачӏун вуго мун! Дида лъала мун щивали, мун вуго Аллагьасул мукъадасав илчи!

³⁵ Амма Гӏисаца жен чӏезабуна: – Кӏал къай дуца! Нахъе а мун гьесул чорхолъа! – янги абун. Синагогаялъул бакьулъ гьев чиги гӏодов ккезавун, гьесие щибго заралги гьабичӏого, гьесул чорхолъа къватӏибе ана жен.

³⁶ Киналго гӏажаиблъун хутӏана. Цоцада гаргадулел рукӏана гьел: – Гьесул рагӏабазул магӏна щиб? Гьесулъ буго жундузе амру гьабизе кӏолеб хӏалкӏолъиги къудратги, гьелги инсанасул чорхолъа къватӏире лъугьунел руго.

³⁷ Сверухълъиялда киса-кибего тӏибитӏана Гӏисал хӏакъалъулъ хабар.

Гӏемерал унтарал гӏадамал сахлъизарула Гӏисаца

³⁸ Цинги, синагогаялъуса къватӏиве лъугьун, Симонил бакӏалде ана Гӏиса. Кутакаб цӏа-каналъул унтуца бусаде ккун ятана Симонил якьад. Гьей сахлъизаеян гьарана Гӏисада.

³⁹ Тӏаде къулун гьес гьелъул цӏа-кан инабуна. Гьебсагӏат тӏаде яхъун якьад гьазие квен-тӏехалда квалквадизе лъугьана.

⁴⁰ Бакъ тӏерхьунеб гӏужалъ гӏадамаз гьесухъе рачун рачӏана батӏи-батӏиял гӏузрабаз унтарал чагӏи. Тӏад квер лъун, гьел киналго сахлъизаруна гьес.

⁴¹ Гьебмехалъ гӏемерисезул чорхолъа жундул нахъе унел рукӏана: «Мун Аллагьасул вас вуго!» – янги ахӏулаго. Гьезда лъалеб букӏиндал Гӏиса Масихӏ вугевлъи, гьез гьеб бицунгутӏизейин Гӏисаца гьел руцӏцӏун чӏезарулел рукӏарал.

⁴² Сордо рогьарабго шагьаралдаса къватӏиве вахъун, Гӏисаца нух босана гӏадан-чи гьечӏеб бакӏалде. Халкъалъул руккелал гьев валагьизе рахъана. Гьесда хадур гъедал, гьел гьардана гьениса нахъе унгейилан.

⁴³ Амма Гӏисаца гьезда абуна: – Аллагьасул Парччахӏлъиялъул хӏакъалъулъ Рохалил хабар бицине цогидал шагьараздеги ине ккола дун, гьелъие гӏололъидалха дун витӏун вугев.

⁴⁴ Гьедин, Ягьудиялъул синагогабазде ун, вагӏза-насихӏатал гьаруна гьес.