Лука 24 - Инжил

24 бетӏер Гӏиса хабалъ ватичӏо

¹ Анкьил тӏоцебесеб къоялъ, цӏакъ цудунго рахъун ва цебеккунго хӏадурун букӏараб махӏгьуинаб нахги босун, гьел руччаби Гӏисал хабаде ана.

² Нохъодул хобалъул кӏалтӏа букӏараб гамачӏ нахъе гиризабун батана гьезда.

³ Жанире лъугьиндал, Тӏадегӏанав Гӏисал жаназаги батичӏо.

⁴ Гьелда хӏикмалъун, хаган гьел рукӏаго, гьале гьезда цеве чӏана цӏакъго кенчӏолел гӏабаби ретӏарав кӏиго чи.

⁵ Хӏинкъуца холаго, руччаби бутӏрул гӏодоре къулун чӏедал, доз гьазда абуна: – Хваразда гьоркьов щай нужеца чӏагояв чи валагьулев?

⁶ Гьев гьанив гьечӏо. Гьев хваралъуса вахъана. Ракӏалда бугищ Галилеялда вугеб мехалъго Гӏисаца нужеда абулеб букӏараб:

⁷ Гӏадамил Лъимералъе къадар бугин гьев мунапикъзабазул кверде кьезе, хъанчида ван хвезавизе ва хун лъабабилеб къоялъ чӏаголъизеги.

⁸ Гӏисаца абун рукӏарал гьел рагӏаби ракӏалде щвана руччабазда.

⁹ Хабалалъа тӏадруссун щведал, гьез гьеб хабар бицана Гӏисал анцӏила цо чапарасдаги ва киналго цогидал муридаздаги.

¹⁰ Гьел руччаби рукӏана: Магдалаялдаса Марямги, Иоаннаги, Якъубил эбел Марямги ва цогидалги – гьезин бицараб гьеб чапарзабазда.

¹¹ Чапарзабазда ккана гьез гӏантал жал рицунел ругилан, ва руччабазда гьал божичӏо.

¹² Амма Пётр гьебсагӏатго векерун ана хабалалъе. Жаниве къулун валагьидал, хӏебтил мусру гурони, щибниги батичӏо гьесда гьениб ва хӏикмалъун тӏадвуссун вачӏана.

Кӏиго муридасдаги вихьула Гӏиса

¹³ Гьебго къоялъ Гӏисал кӏиго мурид унев вукӏана Иерусалималдаса анцӏила цо километралъ рикӏкӏад бугеб Эммаус абулеб росулъе.

¹⁴ Кинабго лъугьа-бахъаралъул бицунеб букӏана гьез.

¹⁵ Гаргадулел, дагӏбадулел гьел рукӏаго, вачӏун Гӏиса гьезда цадахъ вилълъине лъугьана.

¹⁶ Амма гьезда цебе пардав лъугьун букӏана, гьединлъидал Гӏиса гьезда лъачӏо.

¹⁷ Гьес гьикъана гьезда: – Сундул бицунаго нуж рачӏунел ругел? Пашманго рачӏунел рукӏарал гьел кӏиялго лъалхъана.

¹⁸ Гьезда гьоркьоса Клеопа абун цӏар бугес абуна: – Гьал къоязда Иерусалималде рачӏаразда гьоркьов цохӏо мун ватила гьениб ккараб ишалъул хӏакъалъулъ рагӏичӏев чи.

¹⁹ – Сундул хӏакъалъулъ? – ан гьикъана гьес. – Назареталдаса Гӏисал хӏакъалъулъ, – ан абуна гьез. – Гьев вукӏана Аллагьасдаги тӏолабго халкъалдаги жиндир ишазулги рагӏулги хӏалкӏолъи бихьарав авараг.

²⁰ Цинги нилъер чӏахӏиял кашишзабазги чӏухӏби-хӏакимзабазги гьесие чӏвазе къотӏизе хӏукму гьабизабуна, ва гьев хъанчида вазе витӏана.

²¹ Вай, нижерни хьул букӏана гьев Исраилил халкъ тархъан гьабизе вачӏарав чи ватилилан. Амма гьелдалъун лъугӏичӏо иш: гьале лъабабилеб къо буго гьеб лъугьа-бахъин ккаралдаса.

²² Нижер цо-цо руччабаз бицараб хабаралъ хагазарун руго ниж. Жакъа радал цудунго рахъун Гӏисал хабаде ун рукӏана гьел.

²³ Амма гьезда хабалъ Гӏисал жаназа батун гьечӏо. Зодисан рещтӏун гьенир ратарал малаикзабаз гьев чӏаго вугин абунин жидедаян бицине рачӏана гьел руччаби.

²⁴ Цо-цо нижералги ун рукӏана хабатӏе, ва руччабазда батухъе батун буго гьездаги хоб. Амма гьев живго вихьун гьечӏо.

²⁵ Гьес гьезда абуна: – Аварагзабаз цебеккунго киналъулго хӏакъалъулъ бицун бугониги, гьелда божизе гӏураб гӏакълуги гьечӏел ракӏалги хӏинцал гӏадамал руго нуж!

²⁶ Гьединаб гӏазаб-гӏакъуба гурищ Масихӏица хӏехьезе кколеб букӏараб, гьедин гурищ Масихӏ машгьурлъизе кколев вукӏарав?

²⁷ Мусадасан байбихьун цогидал аварагзабиги ракӏалде щвезарун, Масихӏил хӏакъалъулъ Илагьияб Тӏехьалда хъван бугебщинаб жо бичӏчӏизабуна гьес гьазда.

²⁸ Гьанже гьел доб росулъе гӏагарлъулел рукӏана. Жив дагьавги цевехун ине кколеб ххвел гьабуна гьес.

²⁹ Бакъги щинкӏулеб бугин, сордоги тӏаде щолеб бугин, жидеда цадахъ чӏайилан тӏаделъана гьел гьесде. Разилъун гьезда цадахъ рокъове жаниве лъугьана Гӏиса.

³⁰ Гьенир кваназе байбихьидал, гьес, тӏаде дугӏаги гьабун, бекун чед кьуна гьезухъе.

³¹ Гьебмехалъ борхун ана гьезда цебе букӏараб пардав, ва гьезда Гӏиса лъана. Гьебсагӏат Гӏиса гьезда вихьуларевлъун лъугьана.

³² Гьез цинги цоцазда абуна: – Нухда нилъгун кӏалъалев ва Илагьияб Тӏехьалда бугеб хабар бичӏчӏизабулев гьев вукӏараб мехалъго бухӏулеб-бухӏулеб букӏинчӏищ нилъер ракӏ? – абун.

³³ Рахъун гьебсагӏатго Иерусалималде тӏадруссун ана гьел. Гьенир ратана анцӏила цо чапарги гьезда цадахъ рукӏаралги.

³⁴ Гьез бицунеб бугоан хӏакъикъаталдаги Тӏадегӏанав Гӏиса чӏаголъун вугин ва Симонида гьев вихьунги вугин.

³⁵ Гьазги бицана нухда жидеда цадахъ вачӏиналъулги, кванда нахъа бекун чед кьураб мехалъ, жидеда Гӏиса лъараб куцалъулги хӏакъалъулъ.

Цогидал чапарзабаздаги вихьана Гӏиса

³⁶ Гьелъул бицунел гьел рукӏаго, тӏаде вачӏун, ракълида хутӏагийилан саламги кьун, рукъ бакьулъ вахъун чӏана Гӏиса.

³⁷ Хӏинкъун, хӏал хисун ругел гьезда ракӏалде ккана хваразул рухӏ бугин гьебилан.

³⁸ Гӏисаца гьезда абуна: – Щай нуж рихха-хочулел? Щай нуж щакдарулел?

³⁹ Гьанире ралагье: гьале дир кверал, гьале дир хӏатӏал. Дун вуго нужеда цеве вахъун чӏун. Квер хъван хал гьабе нужецаго. Хваразул рухӏалъул рукьбиги рукьбузда гьанги букӏунебищ? Дир черхалда бихьулеб бугогури нужеда гьеб.

⁴⁰ Гьединги абун, жиндирго квералги хӏатӏалги рихьизаруна Гӏисаца гьезда.

⁴¹ Рохиялъ хаган, хӏикмалъун, божизе захӏмалъун гьел ругеб мехалъ, цо щибниги кваназе жо гьечӏищ гьанибилан гьикъана Гӏисаца.

⁴² Гьез Гӏисахъе бегьана бежараб ччугӏил кесек.

⁴³ Босун, гьалги ралагьун, квана Гӏисаца гьеб.

⁴⁴ Гӏисаца гьезда абуна: – Мусал къануналдаги цогидал аварагзабазул тӏухьдуздагун Туркабазул Хирияб Тӏехьалдаги дир хӏакъалъулъ хъван бугебщинаб ритӏухълъана. Гьедин ккезе бугилан бицун букӏана нужеда цадахъ вугеб мехалъ дица.

⁴⁵ Илагьияб Тӏехьалда хъван бугебаб бичӏчӏуледухъ, гьезул ракӏал кантӏизаруна Гӏисаца цинги.

^46-47 Гьес абуна: – Хӏасил, Илагьияб Тӏехьалда хъван буго – Масихӏица гӏазаб-гӏакъуба хӏехьезе ккезе бугилан, хун лъабабилеб къоялъ гьев чӏаголъизе вугилан ва Иерусалималдасан байбихьун киналго халкъазда, мунагьал чурулев Аллагьасде руссайилан, гьесул вакилзабилъун лъугьун, лъазабизеги бугилан.

⁴⁸ Гьелъие нугӏзал руго нуж.

⁴⁹ Дир Инсуца нужее рагӏи кьун букӏарабги битӏизе буго дица нужехъе. Тӏасан бачӏараб хӏалкӏолъиялъ къвалбазегӏан шагьаралда чӏа нуж.

Гӏиса зобалазде восун уна

⁵⁰ Иерусалималдаса Бетаниялде рачана Гӏисаца гьел. Квералги зодирехун ритӏун, баркат лъегиян дугӏа гьабуна гьезие Гӏисаца.

⁵¹ Дугӏа гьабулаго дагьа-дагьавккун гьездаса рикӏкӏалъизе лъугьана ва зобалазде восун ана.

⁵² Гьесие суждаги гьабун, рохуца холаго Иерусалималде тӏадруссана гьел.

⁵³ Цинги, кидаго Мукъадасаб Рокъор чӏун, Аллагьасе рецц гьабулеб букӏана гьез.