Лука 23 - Инжил

23 бетӏер Гӏиса Пилатида цеве чӏезавула

¹ Гьел киналго, Гӏисаги вачун, рахъун Пилатихъе ана.

² Гьениб гьез Гӏисаде гӏайиб гӏунтӏизабулеб букӏана, жидер халкъ дандечӏеялде гьусулев ва къайсарасе магъало кьогеянги жив Масихӏ-Парччахӏ вугиланги абулев ватанин гьевилан.

³ Пилатица Гӏисада гьикъана: – Мунищха кколев жугьутӏазул Парччахӏ? Гӏисаца жаваб кьуна: – Дуца абулеб бугоха гьедин.

⁴ Чӏахӏиял кашишзабаздаги халкъалдаги Пилатица абуна гьав чиясе тамихӏ гьабизе гӏураб гӏайиб жинда батулеб гьечӏилан.

⁵ Амма гьез тӏаса ричӏичӏого абулеб букӏана гьес халкъ багъа-бачаризабулеб бугин, тӏолабго Ягьудиялдаго, хӏатта Галилеялдаса бахъараб гьанибе щвезегӏан, гьес жиндирго насихӏат гьабулеб букӏанин.

⁶ Галилеялъул цӏар бахъулеб рагӏидал, Пилатица гьикъана Галилеялдасацин гурищ гьав чийилан.

⁷ Гьеродил вилаяталдаса вукӏин лъайдал, Пилатица Гӏиса витӏана гьел къоязда Иерусалималде вачӏун вукӏарав Гьеродихъе.

⁸ Гӏиса вихьаравго, Гьерод цӏакъ вохана. Цебего бокьун букӏана гьесие Гӏиса вихьизе, гӏемерал харбал рагӏулел рукӏиндалха гьесул хӏакъалъулъ. Цо хӏикмат жиндаги бихьизабилародаян хьулги букӏана Гьеродил.

⁹ Гьеродица гӏемерал суалал кьуна Гӏисае, амма гьес цонигиялъе жавабцин кьечӏо.

¹⁰ Гьенир рахъун чӏун чӏахӏиял кашишзабазги диниял гӏалимзабазги гӏасилъун-ццидахун Гӏисаде гӏайибал гӏунтӏизарулел рукӏана.

¹¹ Гьеродицаги гьесул рагъухъабазги Гӏиса гӏад-хочӏие гьавун, инжит-хӏакъир гьавун чӏухӏараб ретӏел ретӏана гьесда ва тӏадвуссун Пилатихъе витӏана.

¹² Цебеккун цоцазда гьоркьоб тушманлъи букӏарал Гьеродги Пилатги гьеб къоялдаса нахъе гьудулзабилъун лъугьана.

¹³ Чӏахӏиял кашишзабиги, чӏухӏби-хӏакимзабиги, цогидал гӏадамалги ахӏун, Пилатица гьезда абуна:

¹⁴ – Гьас халкъ дандечӏеялде гьусулеб бугилан вачун вачӏун вуго нужеца гьав чи дихъе. Гьале дица нужги ралагьун цӏех-рех гьабидал, дида гьав чиясда батичӏо нужеца гьасде гӏунтӏизарурал гӏайибазул цонигияб.

¹⁵ Гьеродидаги батичӏо, гьединлъидал дос гьав тӏадвуссун нилъехъе витӏун вачӏана. Чӏвазе къотӏизе гӏураб цониги такъсирги гьас гьабун гьечӏо.

¹⁶ Цӏалацаги вацӏун, нахъе виччала дица гьав.

^17-18 Амма халкъалъ цо кӏалдисан гӏадин ахӏулеб букӏана: – Гьев чӏвазе витӏе! Барабба кье нижехъе! – ян.

¹⁹ Барабба вукӏана, шагьаралда цо питнаялда гӏахьаллъиялъул ва чи чӏваялъул такъсир тӏад чӏун, гвандинив тӏамун вугев чи.

²⁰ Гӏиса нахъе виччазе бокьун нахъеги халкъалдехун кӏалъана Пилат.

²¹ Амма гӏадамал ахӏдезе лъугьана: – Хъанчида вазе витӏе гьев! Хъанчида вазе витӏе! – ян.

²² Лъабабизеги абуна Пилатица гьезда: – Гьас гьабураб квешлъи щиб? Чӏвазе гӏураб гӏайиб батичӏо дида гьасул. Гьединлъидал, цӏалацаги вацӏун, нахъе виччала.

²³ Амма, кутакаб ахӏи-хӏур багъаризабун, тӏадчӏун гӏадамаз гьарулеб букӏана Гӏиса хъанчида вазе витӏейилан, ва гьезул ахӏи-хӏур бергьана.

²⁴ Пилатица хӏукму гьабуна гьезул гьари къабул гьабизе:

²⁵ питнаялда гӏахьаллъанилан ва чи чӏванилан гвандиниве рехун вукӏарав чиги, гӏадамазул гьариялда рекъон, къватӏиве виччан, Гӏиса гьезул ихтияралде кьуна.

Гӏиса хъанчида вала

²⁶ Гьев вачун унаго, гьесда хадуб хъанч баччизабуна хуриса вачӏунев вукӏун данде ккарав Киренеялдаса цо Симон абулев чиясда.

²⁷ Цӏакъ гӏемераб халкъ букӏана Гӏисада хадуб бачӏунеб, хасго руччаби рукӏана гӏодилел ва магӏаби гьарулел.

²⁸ Нахъвуссун гьезухъги валагьун, Гӏисаца абуна: – Я, Иерусалималъул руччаби! Нуж дихъ гӏодуге! Нуж гӏоде нужехъго ва нужер лъималазухъ.

²⁹ «Чехь къинлъун лъимер гьабичӏел, керен кьун гьеб хахизабичӏел руччаби гьардарал гурищ!» – ан нужеца абулел къоял рачӏине руго.

³⁰ Тӏаде рортун ниж гъоркь ккезареян мугӏрузда гьардела гӏадамал гьебмехалъ, щущан ун ниж щинкӏизареян гохӏазда гьардела.

³¹ Гӏурччинаб гъветӏалъе гьадинал ишал гьарулел ругони, – бакъвараб гъотӏое щибдай гьабила!

³² Кӏиго хъачагъги вукӏана гьесда цадахъ тамихӏалъе вачун унев.

³³ «Гвангвара» абулеб бакӏалде щведал, Гӏиса хъанчида вана; цояв кваранаб рахъалда, цогидавги квегӏаб рахъалда – дов кӏиявго хъачагъги вана хъанчида.

³⁴ Гӏисаца абуна: – Я, дир Эмен! Гьазда тӏасалъугьа мун. Жидецаго гьабулеб бугеб жо гьазда лъалеб гьечӏо, – ян. Рагъухъаби рукӏана, можоро тӏамун, гьасул ретӏел жидедаго гьоркьоб бикьулел.

³⁵ Халкъ балагьун чӏун букӏана. Чӏухӏби-хӏакимзаби гьасда тӏад релъанхъулел рукӏана: – Аллагьас тӏаса вищарав Масихӏ вугев ватани, живго хвасар гьавеян абе, цогидал хвасар гьарулин досилан абулеб букӏанин.

³⁶ Рагъухъабазги гӏад-хочӏ гьавулев вукӏана гьев. Аскӏоре ун, цӏекӏаб чагъир бегьулеб букӏана гьесухъе.

³⁷ – Мун жугьутӏазул парччахӏ ватани, мунго хвасар гьаве! – ян абулеб букӏана.

³⁸ «Гьав вуго жугьутӏазул парччахӏ» абун греказул, румазул ва жугьутӏазул мацӏалъ тӏад хъвараб хъарщиги букӏана гьесул бетӏералда тӏадехун хӏобода чӏван.

³⁹ Гьесда цадахъ хъанчида варав цо хъачагъас Гӏиса инжит-къабихӏ гьавулев вукӏана: – Мун Масихӏ гурищ? Гьаха, мунгоги нижги хвасар гьаре, – ян.

⁴⁰ Цогидав хъачагъас, досул кӏал къазабун, абуна: – Мун Аллагьасукьагӏагийищ хӏинкъуларев? Дуеги гьебго тамихӏлъидал бугеб!

⁴¹ Нилъее тамихӏ битӏун гьабулеб буго, нилъеца гьабуралда рекъон къотӏун бугелъул нилъее судги. Амма гьас щибго квешлъи гьабичӏо.

⁴² Гӏисадехун гьес абуна: – Я, Гӏиса, Парччахӏлъун мун вачӏараб мехалъ, дунги ракӏалде щва дуда, – ян.

⁴³ Гӏисаца гьесда абуна: – Хӏакълъун абулеб буго дица дуда: жакъаго дида аскӏов алжаналъувин мун вукӏине вугев!

Гӏисал рухӏ босун уна

⁴⁴ Къалъулеб гӏужалда бакъ ккуна. Къалъудаса лъабго сагӏат инегӏан тӏолабго дуниял бецӏлъана.

⁴⁵ Мукъадасаб Рукъалъул бищунго хирияб рокъоб бигъун букӏараб пардав бакьулъа бихъун ана.

⁴⁶ Цо гучаб гьаракь гьабун ахӏана Гӏисаца: – Я, дир Эмен! Дуда кодобе кьолеб буго дица дирго рухӏ! Гьедин абун хадуб гьесул рухӏ босун ана.

⁴⁷ Гьеб бихьарав Мукъадасаб Рукъ цӏунулел рагъухъабазул нусилбетӏерас, Аллагьасе рецц гьабун, абуна: – Хӏакъикъаталдаги вацӏцӏадав чи вукӏун вуго гьав.

⁴⁸ Гьеб киналъухъго балагьизе бачӏун букӏараб тӏолабго халкъги, гьениб ккараб жо бихьидал, бухулаго керенгун, тӏадбуссун ана.

⁴⁹ Гӏиса лъалев вукӏарал киналго гӏадамалги Галилеялдаса рахъарал гьесда цадахъ рукӏарал руччабиги нахъегӏан чӏун ралагьун рукӏана.

Гӏиса хабалъ вукъула

^50-51 Гьале Ягьудиялъул Ариматея шагьаралдаса Аллагьасул Парччахӏлъиялде хьул лъурав Юсуп абулев цо лъикӏав ва ритӏухъав чи (тӏадегӏанаб судалда гьоркьове унев вукӏаниги, гьев разилъун вукӏинчӏо гьелъ гьабураб хӏукмуялдаги гьеб тӏубазабиялдаги), –

⁵² Пилатихъе ана Гӏисал жаназа кьеян гьаризе.

⁵³ Хъанчидаса бахъун, хӏебтил мусрудулъги жемун, кьурулъ бикӏун хӏадурун букӏараб жеги щивниги чи лъечӏеб хабалазул нохъода букъула гьесул жаназа.

⁵⁴ Гьеб букӏана рузман къо, тӏаде щолеб букӏана шамат сордо.

⁵⁵ Галилеялдаса рахъарал Гӏисада цадахъ рукӏарал руччабиги ана Юсупида хадур ва гьездаги бихьана гьеб хобги хабалъ гьев лъураб куцги.

⁵⁶ Цинги тӏадруссун рокъоре щведал, Гӏисал мусруялда бахине махӏгьуинаб нах хӏадурана гьез. Къануналда рекъон, шамат къоялъ парахат чӏана.