Лука 19 - Инжил

19 бетӏер Гӏиса Закайихъе гьоболлъухъ уна

¹ Иерихон шагьаралда жанисан унев вукӏана Гӏиса.

² Магъало бакӏарулел чагӏазул бетӏерлъун тӏамурав Закай абулев цо бечедав чи вукӏана.

³ Гьесул гъира букӏана Гӏиса кинав чи вугевали лъазе, гьев вихьизе. Амма халкъалъул руккалида гъорлъ Гӏиса вихьизе бажарулеб букӏинчӏо, – къокъав чи вукӏана Закай.

⁴ Цевегӏанги векерун цо инжиралъул гъотӏотӏе вахана гьев: гьенисан ине кколаан Гӏиса.

⁵ Гьеб гъотӏокье щведал, Гӏиса эхеде валагьана ва Закайида абуна: – Закай, хехго рокъове а: жакъа дун духъ гьоболлъухъ рещтӏине ккола.

⁶ Хехго гъотӏодаса гъоркьеги лъугьун, вохуца холаго къабул гьавуна гьес Гӏиса.

⁷ Гьеб бихьун киналго зурзудизе лъугьана мунагьазул цӏурав чиясул бакӏалде анин гьев гьоболлъухъилан.

⁸ Вахъун Закайица Тӏадегӏанав Гӏисада абуна: – Я, Бетӏерчӏахъад! Гьале дирго бечелъиялъул бащдаб дица мискин-пакъирасе садакъаде кьела ва, дица гуккарав чи ватани, гьебги ункъиде бахинабун бецӏила.

⁹ Гӏисаца гьебмехалъ абуна: – Жакъа гьаб рокъобе хвасарлъи бачӏана, гьавги Ибрагьимил вас вугелъул.

¹⁰ Рилун ругелазда хадув, гьел ралагьизейин ва гьел хвасар гьаризегийин, вачӏун вугев Гӏадамил Лъимер.

Меседил гъурщазул мисал

¹¹ Гьес рицунел харбазухъ гӏенеккун рукӏарал гӏадамазе цоги мисал бачана Гӏисаца. Гьев Иерусалималде щолев вукӏиндал ва гьел Аллагьасул Парччахӏлъи хеккого бачӏинилан божун рукӏиндал,

¹² гьес бицана: – Лъикӏаб наслу-тухумалъул цо пуланав чи чияр улкаялде ун вуго гьенив ханлъун чӏезе, цинги нахъвуссун жиндирго халкъалъулги ханлъун лъугьине.

¹³ Жиндирго анцӏго рагьтӏателги ахӏун, щивасухъе цо-цо меседил гъурущ кьун буго, жив тӏадвуссинегӏан гьеб жиндие пайда-хайиралъе хӏалтӏизабеянги абун.

¹⁴ Амма жиндирго улкаялъул гӏадамазе гьев вокьулев вукӏун гьечӏо. Гьесда хадурго чапарзаби ритӏун руго гьез доб улкаялде, гьев чи жидер ханлъун вукӏине жал рази гьечӏилан лъазабизе.

¹⁵ Доб улкаялда ханлъиги щун тӏадвуссараб мехалъ, гьес амру гьабун буго жинцаго месед кьурал дол рагьтӏателал ахӏейилан, лъица кигӏанасеб пайда-хайир доб меседалдаса жиндие щвезабун бугебали лъазе.

¹⁶ Вачӏун цо рагьтӏателас абунила: «Я, бетӏерчӏахъад, дуца кьураб меседалдаса анцӏго месед хайирлъана», – ян.

¹⁷ «Гьитӏинаб божилъиялъе дуца дида цебе кӏудияб ритӏухълъи бихьизабуна, дир лъикӏав рагьтӏател. Анцӏго шагьаралъул наиблъун тӏамулев вуго дица мун», – ан абун буго ханас гьесда.

¹⁸ Вачӏун цогидав рагьтӏателас абун буго: «Я, бетӏерчӏахъад, доб цо меседалдаса щуго месед хайирлъана», – ян.

¹⁹ Гьесдаги ханас абун буго: «Мунги дица щуго шагьаралъул наиблъун тӏамулев вуго», – ян.

²⁰ Вачӏун лъабабилев рагьтӏателас абун буго: «Я, бетӏерчӏахъад, гьале дур месед. Квербацӏцӏалда гьоркьоб лъун цӏунун букӏана дица гьаб.

²¹ Дуцаго лъечӏеб бакӏалдаса босулев, дуцаго бекьичӏеб лъилъулев кьварарав чи мун вугелъул, хӏинкъана дун гьелда хъвазе».

²² «Гӏай, макирав рагьтӏател! Гьел дуца абурал рагӏаби сабаблъун тамихӏ гьабулеб буго дица дуе. Дуда лъалеб букӏун бугоха дицаго лъечӏеб бакӏалдаса босулев, дицаго бекьичӏеб лъилъулев кьварарав чи дун вукӏин.

²³ Щай дуца дир месед хайиралъе хӏалтӏизабичӏеб, жакъа тӏадвуссараб мехалъ хайиргун цадахъ нахъе щвелаангури гьеб дихъе?» – ян абун буго ханас гьесда.

²⁴ Аскӏор рукӏараздаги абун буго ханас, гьесухъаги босун, гъоб месед анцӏго месед бугесухъе кьейилан.

²⁵ Гьез гьесда абун буго: «Я, бетӏерчӏахъад, гъосухъ гьадинги анцӏго месед бугогури», – ян.

²⁶ «Дица нужеда абулеб буго: кодолъи бугевщинасе кьезе буго, кодолъи гьечӏесухъа бугебги бахъизе буго.

²⁷ Дун жидер ханлъун ккезе бокьун букӏинчӏел дол дир тушбабийин абуни, гьанире дида цереги рачун, чӏвай!»

²⁸ Гьеб хабарги бицун, Гӏиса Иерусалималдехун валагьун ана.

Гӏиса Иерусалим шагьаралде лъугьунев вуго

²⁹ Зайтуналъул магӏарда аскӏор ругел Бетфагиялде ва Бетаниялде гӏагарлъидал, кӏиго муридги аскӏове ахӏун, Гӏисаца гьезда абуна:

³⁰ – Гьудуб нилъеда цебе бугеб росулъе а нуж. Росулъе лъугьаралго, цо бакӏалда бухьун батила жеги чи тӏад рекӏинчӏеб кӏудияб кӏерт. Рухьадасаги бичун, гьебги бачун рачӏа.

³¹ Щай гьеб бачунебан абулев чи ккани, Тӏадегӏанав Гӏисае къваригӏун бугин абе.

³² Гьедин ритӏун аразда, Гӏисаца абухъе, гьениб батана кӏудияб кӏерт.

³³ Гьеб рухьадаса бичулеб бихьараб мехалъ, гьелъул бетӏергьабаз гьазда гьикъана щай гьеб бичулеб бугебилан.

³⁴ Тӏадегӏанав Гӏисае къваригӏун бугилан жаваб кьуна гьаз.

³⁵ Кӏерт Гӏисахъе бачун бачӏана. Гьелъул гьодиде рехана жидерго партал ва гьез гьев кӏартида рекӏинавуна.

³⁶ Гьев унеб нухда, тӏаса бахъун, жидерго ретӏел тӏибитӏулеб букӏана гӏадамаз.

³⁷ Зайтуналъул магӏардаса гӏодоре лъугьунеб бакӏалде гӏагарлъидал, цадахъ рукӏарал тӏолалго муридал роха-хинлъун ва ахӏунго ахӏун Аллагьасе рецц гьабизе лъугьана, гьес рихьизарурал мугӏжизатазухъ.

³⁸ Гьез турки ахӏулеб букӏана: – Бетӏергьанас витӏун вачӏарав Парччахӏасда баркат лъеги! Зобалазда рекъел букӏаги! Тӏадегӏанав Аллагьасе рецц!

³⁹ Халкъалъул руккалилъ рукӏарал цо-цо фарисеяз абуна Гӏисада: – Я, Насихӏатчи! Руцӏцӏун чӏезаре гьал дурго муридал!

⁴⁰ Гӏисаца гьезие жаваб кьуна: – Дица нужеда абулеб буго: гьел руцӏцӏун чӏани, ганчӏал ахӏдела.

Гӏисаца Иерусалималъухъ магӏу гьабула

⁴¹ Иерусалим бихьулеб бакӏалде щведал, гӏодана Гӏиса. Шагьаралъухъ магӏу гьабун,

⁴² гьес абуна: – Жакъа, гьаб къоялъгӏаги, лъалебаниха дуда дур саламалъиялъе щиб къваригӏунебали! Гьанжего дур беразда гьеб бихьизе рес гьечӏо.

⁴³ Дуде цо къо бачӏина, чӏахӏиял хъулбиги ран, тушбабаз кисанго мун данде къан сверун ккураб.

⁴⁴ Ракь лъугьинабила дур Ва дур гӏадамазулги. Ганчӏида лъураб гамачӏ хутӏиларо кибниги. Щайгурелъул Аллагьас Дуй хвасарлъи битӏараб Заман дуда лъачӏелъул.

Гӏисаца даранчагӏи Мукъадасаб Рокъоса къватӏире гъола

⁴⁵ Цинги Мукъадасаб Рокъове жаниве лъугьун, гьенир ричарулел рукӏаралги босулел рукӏаралги гӏадамал къватӏире гъезе лъугьана Гӏиса.

⁴⁶ Гьес гьезда абуна: – Тӏехьалда хъван буго: «Гьаб Дир рукъалда цӏар букӏине буго как-диналъул рукъ» абун. Нужецайин абуни гьаб хъачагъазул нохъоялде сверизабун буго.

⁴⁷ Гӏисаца щибаб къойил гьеб Мукъадасаб Рокъоб гӏадамазе вагӏза гьабулеб букӏана. Чӏахӏиял кашишзабаз, диниял гӏалимзабаз ва чӏухӏби-хӏакимзабаз хӏаракат бахъулеб букӏана гьев тӏагӏинавизе рес ккелародайилан.

⁴⁸ Гьезда гьабизе кӏолеб жоги букӏинчӏо, тӏолабго халкъ Гӏисада сверухъ гъункун, гьесухъ гӏенеккун букӏиндал.