Лука 14 - Инжил

14 бетӏер Гӏиса гьоболлъухъ ахӏула цо фарисеяс

¹ Цо пуланаб шамат къоялъ Гӏиса фарисеязул цо хӏакимасухъе гьоболлъухъ ун вукӏана. Гьес щиб гьабулебали хал ккун чӏун рукӏана гьенир.

² Гьесда дандвитӏун гӏодов чӏун вукӏана лъадал къвачӏа чорхолъ лъугьарав цо чи.

³ Гӏисаца диниял гӏалимзабаздаги фарисеяздаги гьикъана: – Къануналъ изну кьолебищ шамат къоялъ чи сахлъизавизе, яги кьоларебищ?

⁴ Гьел руцӏцӏун чӏана. Гӏисаца квер хъван сахлъизавуна гьев унтарав чи ва рокъове витӏана.

⁵ Гӏисаца гьезда абуна: – Нужер лъилниги хӏама яги оц гъуялъубе бортани, шамат къо бугониги, гьебсагӏат къватӏибе бахъиларищ нужеца гьеб?

⁶ Гьелда дагӏба базе кӏвечӏо лъиданиги.

⁷ Кванде ахӏарал гьалбал сурпаялда нахъа бищунго хӏурматияб бакӏ кквезе церегӏан къалел рихьидал, мисал бачун, бицана Гӏисаца:

⁸ – Берталъе ахӏараб мехалъ, бахӏарасда аскӏор гӏодор чӏоге нуж. Щайгурелъул гьенив гӏодов чӏезе ахӏун ватизе бегьула дудасаги гьезие цевесев чи.

⁹ Мунги гьевги гьениве ахӏарав бертадул бетӏерас дуда аскӏове вачӏун, абила: «Гьав виччай гьенив гӏодов чӏезе», – ян. Цинги мунги инжитго вахъине ккела бищун нахъегӏан бугеб бакӏалда гӏодов чӏезе.

¹⁰ Вачӏинахъего мун дова бищунго нахъа гӏодов чӏани, дуда аскӏове вачӏун бертадул бетӏерас абила: «Гьаниве цевегӏан вачӏа, гьудул», – абун. Берталъ ругезда гьоркьоб дур къадру-къиматги борхила гьебмехалъ.

¹¹ Жинцаго живго тӏадегӏанлъизавурав гӏодовегӏанлъула, гӏодовегӏанго чӏарав тӏадегӏанлъичӏого хутӏуларо.

¹² Рукъалъул бетӏергьанасдаги абуна Гӏисаца: – Гьадинаб квана-гьекъей гьабулеб мехалъ, гьез мунги ахӏиялде хьул лъун ва гьеб дуе бецӏилилан ракӏалде ккун, дурго гьудулзабиги, вацалги, гӏагарал чагӏиги, бечедал мадугьалзабиги ахӏуге дуца кванде.

¹³ Дуца гьоболлъухъ ахӏе мискинал, гӏажизал, рекъал, бецал гӏадамал.

¹⁴ Гьардарав гурищ мун, гьезда кӏоларелъул гьеб дуе бецӏизе. Гьеб дуе бецӏила муъминзаби хваралъуса рахъинарулеб къиямасеб къоялъ.

¹⁵ Гьеб рагӏидал, гьенир квана-гьекъолел рукӏаразул цояс Гӏисада абуна: – Гьардарав гурищ Аллагьасул Парччахӏлъиялда квана-гьекъезе вугев чи.

¹⁶ Гӏисаца гьесие бицана: – Кӏудияб гьоболлъи гьабизе цо сордоялъ гӏемерал гӏадамал кванде ахӏанила цо пуланав чияс.

¹⁷ Квен цебе лъураб мехалъ, гьес жиндирго рагьтӏател витӏанила гьел гӏадамазда кваназе рачӏайилан абизе.

¹⁸ Киназго цо чияс гӏадин абунила жидее рачӏине щолеб гьечӏин, тӏасалъугьайилан. Цояс абунила, жинца цо хур бичун босун бугин, гьеб бихьизе ине кколин, тӏасалъугьаян гьарулин жинцайилан.

¹⁹ Цогидас абунила, жинца анцӏго оц босун бугин, рекьарулищали гьел рукьалда разе кколин, тӏасалъугьаян гьарулин жинцайилан.

²⁰ Цогидасги абунила, жинца чӏужу ячун йигин, жиндие вачӏине щоларилан.

²¹ Тӏадвуссун вачӏун, рагьтӏателас бицанила гьеб киналъулго хӏакъалъулъ. Гьебмехалъ, дозда ццинги бахъун, рукъалъул бетӏергьанас рагьтӏателасда абунила: «Векере, шагьаралъул къватӏазде ун, гьенив ватанщинав мискинав, гӏажизав, бецав, рекъав чиги вачӏун вачӏа», – ян.

²² Тӏадвуссун вачӏун рагьтӏателас абунила: «Дур амру тӏубазабуна, бетӏерчӏахъад. Амма тӏотӏода нахъа жеги бакӏ хутӏун буго», – ян.

²³ Нахъеги абунила гьес рагьтӏателасда: «Дове нухде ун эхеве-эхеде уневщинав чиги вачун вачӏа. Дуца гьаб дир рукъ кьабун цӏезабе.

²⁴ Амма лъан букӏа дуда: дол дица гьоболлъухъ ахӏун рукӏаразул цонигияв кваназе гьечӏо дир къавулъ».

«Дир муридаллъун лъугьине лъида кӏолареб?»

²⁵ Гӏемерал гӏадамал рукӏана Гӏисада цадахъ унел. Гьездехун вуссун, гьес абуна:

²⁶ – Жиндирго эбел-инсудехун, лъимал-хъизаналдехун, яцал-вацаздехун, хӏатта жиндирго гӏумруялдехун рокьукълъи гьечӏев чи дида аскӏове вачӏунев вугони, гьесухъа бажаруларо дир муридлъун вукӏине.

²⁷ Живго тӏад вазе хъанчги баччун дида цадахъ вачӏунев гьечӏони, гьесухъаги бажаруларо дир муридлъун вукӏине.

²⁸ Нужеда гьоркьоса цо лъиениги бокьун бугони си базе, гӏодовги чӏун цин гьес хӏисаб гьабиларищ гьеб бан лъугӏизабизе гӏураб сурсат бугищ жиндирали.

²⁹ Гурони – кьучӏги лъун, бачӏого хутӏила гьесул си. Гьебмехалъ гьесда тӏад киналго релъанхъила,

³⁰ си базе байги бихьун, гьеб лъугӏизабизе кӏвечӏин абун.

³¹ Яги цогидав пачаясда данде рагъде вахъине къачӏарав пачаяс, цин гӏодовги чӏун, пикру гьабизе ккеларищ къоазарго рагъухъан вугеб тушманасул бода данде анцӏазарго чи вугеб жиндир бо багъун бажариладаян.

³² Бажарунгутӏи лъайдал, дов тушман рикӏкӏад вукӏаго ритӏизе ккола гьес рекъел гьарун жиндирго чапарзаби.

³³ Гьедин нужеда гьоркьов вугев щивав чиясги жиндирго бугебщиналдаса инкар гьабичӏони, гьесдаги кӏоларо дир муридлъун вукӏине.

³⁴ Цӏам лъикӏаб жо буго. Амма гьелъул цӏамгӏаллъи холеб бугони, кин гьеб нахъеги цӏамгӏаллъизабилеб?

³⁵ Я ракь лъугьунаро гьелъул, я хурибе базе рак лъугьунаро. Гӏодобе бала гьеб. Гӏундул ругезда рагӏизе биччанте гьеб!