Лука 12 - Инжил

12 бетӏер Гӏисаца муридазе гӏакълаби кьолел руго

¹ Аза-азар чи гӏахьаллъарал чӏахӏиял руккелал гьарун рачӏунел рукӏана гӏадамал гьеб заманалда Гӏисада аскӏоре. Цоцаца мерхьиналде ккун букӏана гьезул иш. Гӏисаца цин жиндирго муридазда абуна: – Вореха, фарисеязул реччеялдаса, ай гьезул кӏигьумерчилъиялдаса цӏуне нужго.

² Щайгурелъул тӏатинчӏого цониги бахчараб жоги хутӏулареб, загьирлъичӏого щибниги балъгояб жоги букӏунареб.

³ Гьединлъидал сардил бецӏлъухъе нужеца абураб жо, бакъул канлъухъе къватӏибе рагӏун батулеб; рокъоб жаниб нужеца лъилниги гӏинзукье щурараб рагӏи, тӏохаздасан киназдаго лъазабун батулеб.

⁴ Дица нужеда абулеб буго, дир гьудулзаби: инсанасул черх чӏвазе гурони, тӏокӏаб щибниги гьабизе кӏоларезукьа нуж хӏинкъуге.

⁵ Дица малъила нужеда лъикьа хӏинкъизе кколелали. Нуж хӏинкъа чӏван хадур нуж жужахӏалъуре рехизе кӏолев Аллагьасукьа. Гьеле гьесукьа хӏинкъаян абила дица нужеда.

⁶ Кӏиго пахьул шагьиялъухъ гурищ щолеб щуго къадако? Амма гьезул цонигияб кӏочон толаро Аллагьасда.

⁷ Нужер бетӏералда чан рас батаниги, гьелги рикӏкӏунин ругел. Нуж хӏинкъуге, киналго къудкуздаса хириял руго нуж.

⁸ Гьале дица нужеда абулеб буго: гӏадамазда цебе дир рахъ ккурав чиясул, Аллагьасул малаикзабазда цебе, Гӏадамил Лъимацаги рахъ кквезе бугебха.

⁹ Гӏадамазда цебе диде инкар гьабурав чиясдаса, Аллагьасул малаикзабазда цебе, дицаги инкар гьабила.

¹⁰ Гӏадамил Лъимада данде рагӏи абурав бокьарав чиясдаса Аллагь тӏасалъугьина, амма Илагьияб Рухӏалда бугьтан лъурав чиясе тӏасалъугьин букӏине гьечӏо.

¹¹ Синагогаялъуреги рачун, чӏухӏбуздаги чӏахӏиял хӏакимзабаздаги цере нуж рахъун чӏезарураб мехалъ, гьезда щибдай бицинаян, щиб жавабдай кьела гьезул суалазеян ургъел ккоге нужее;

¹² гьеб лахӏзаталда Илагьияб Рухӏалъ малъилелъулха нужеца щиб бицине кколебали.

Гӏакълу гьечӏев цо бечедав чиясул хӏакъалъулъ

¹³ Гӏадамазда гьоркьосан вахъун, цо чияс абуна Гӏисада: – Я, Мугӏалим! Инсул ирсалъул дие кколеб бутӏа кьеян абе дир вацасда.

¹⁴ Гӏисаца гьесда абуна: – Ле, нужее суд гьабизе ва нужер ирс бикьизе тӏамурав чийищ дун?

¹⁵ Цинги халкъалдехун абуна: – Ворегиха, хъантӏиялдаса цӏуне нужго! Щайгурелъул дуниялалъул боцӏи-рикъзи гьарзаго бугониги, гьелда бараб гьечӏо инсанасул гӏумру.

¹⁶ Хадуб Гӏисаца гьезие, мисал бачун, бицана: – Цо бечедав чиясул хуриб бижун букӏун буго бакӏарун хӏалкӏоларебгӏан гӏемераб хӏалухъен.

¹⁷ Гьес жиндаго абун буго: «Щибдай дица гьабила. Гьеб хӏалухъен базе гӏураб бакӏ гьечӏогури дир».

¹⁸ Цинги гьес хӏукму гьабун буго: «Гьа, гьанже лъана дица щиб гьабилебали. Дирго царгъалги риххун, чӏахӏиял царгъал гьарила ва тӏолабго хӏалухъенги цогидаб бечелъиги гьезда жанибе буссинабила.

¹⁹ Цинги дица дирго напсалда абила: „Я, дир напс! Гьале чанго соналъе гӏураб бечелъи буго дур. Рахӏаталда кванай, гьекъе, кеп гьабе дурго гьанже!“»

²⁰ Амма Аллагьас абун буго гьесда: «Я, гӏабдал! Къаси дур рухӏ бахъизе буго! Лъие хутӏулеб дуца бакӏарараб бечелъи?»

²¹ Жиндиего хазина бакӏарулев, амма Аллагьасда цеве мискинав чиясул къадар гьединаб букӏуна.

Гӏисаца муридазда ургъел гьабугеян малъула

²² Цинги жиндирго муридазда Гӏисаца абуна: – Гьединлъидалин дица нужеда абулеб: щибдай кваналаян чохьое гӏологи, щибдай ретӏинаян чорхое гӏологи хъалхъадуге.

²³ Квандаса цебесеб буго рухӏ, ратӏлидаса цебесеб буго черхги.

²⁴ Гъудузухъ ралагье нуж: гьез я бекьуларо, я лъилъуларо, я царгъахъе баларо. Аллагьас хьихьун руго гьел. Амма хӏанчӏаздаса гӏемерго хириял руго нуж.

²⁵ Лъида кӏвезе бугеб, кигӏан хъалхъаданиги, жиндирго гӏумру цо къоялъниги халалъизабизе.

²⁶ Гьеб гьитӏихӏинабгицин гьабун бажаруларел нуж кӏудияб гьабизеян щай лъугьунел?

²⁷ Тӏугьдузухъ ралагье нуж. Я хурир хӏалтӏуларо гьел, я кун дургъуларо гьез. Амма гьале дица нужеда абулеб: жиндирго машгьурлъиялъул завалалдагицин Сулайман парччахӏасул букӏинчӏо бокьараб тӏогьол гӏадинаб ретӏел.

²⁸ Я, ле – божи дагьаб уммат! Жакъа гӏалахалда бугони, метер цӏадабе рехулеб тӏегь-хералдагицин Аллагьас гьединаб берцинаб ретӏел ретӏунеб мехалъ, кигӏан берцинабдай нужер букӏинеб!

²⁹ Гьединлъидал щибдай кваналаян, щибдай гьекъелаян нужеего гӏакъуба кьоге,

³⁰ гьеб кинабго бугелъул Аллагь лъалареб халкъалъги тӏалаб гьабулеб жо. Нужер Инсуда лъала нужее гьеб хӏажалъулеблъи.

³¹ Нужеца гӏамал гьабе Аллагьасул Парччахӏлъиялде рорчӏизе, цогидаб хутӏарабщинаб гьес нужее тӏадеги кьела.

³² Хӏинкъуге, гьитӏинаб рехъен! Цӏоб лъун, нужер Инсуца нужее Парччахӏлъи кьезе бугебин.

³³ Нужерго боцӏи-рикъзиги бичун садакъаби гьаре. Багьулареб-бихъулареб таргьа-къвачӏа гьабун те, зобалазда бугеб турулареб-холареб хазина къачӏан те. Гьеб хазина зобалазда я цӏогьорас бикъуларо, я ицица кваналаро.

³⁴ Нужер хазина бугеб бакӏалда букӏине бугелъул нужер ракӏги.

Гӏисаца муридазда хӏадурго чӏайилан абулеб буго

³⁵ Нуж ретӏа-къан къачӏан рукӏа, рекӏун чирахъалги те.

³⁶ Берталъе ун тӏадвуссун вачӏарав рукъалъул бетӏергьанас кавуда тункидал, гьебсагӏат гьев жаниве виччазе хӏадурго чӏарал рагьтӏателал гӏадин рукӏа нуж.

³⁷ Гьардарал гурищ, жидерго бетӏергьанасда живго вачӏинегӏан рорчӏуда чӏун ратарал рагьтӏателал. Хӏакълъун абулеб буго дица нужеда, гьес жинцаго гьезие гӏоло рачел къазе буго, кванил тӏутӏ тӏибитӏизе буго ва квана-гьекъезе гӏодор чӏезаризе руго.

³⁸ Гьардарал гурищ, кида вачӏаниги: сордо бащалъараб мехалъ, яги радакье вачӏаниги, рорчӏуда чӏун гьесда ратарал рагьтӏателал.

³⁹ Рукъалъул бетӏергьанасда лъалеб бугони цӏогьор вачӏунеб заман, гьес цӏогьор жаниве ворчӏизе виччаларевлъи лъай нужеда.

⁴⁰ Гьединлъидал нужги хӏадурго рукӏа, ракӏалдаго гьечӏеб заманаялъ вачӏине вугелъул нужехъе Гӏадамил Лъимер.

⁴¹ Гьебмехалъ Пётрица абуна: – Я, Бетӏерчӏахъад! Нижеейищ дуца гьеб мисал бачунеб бугеб, яги кинабго халкъалъейищ?

⁴² Тӏадегӏанав Гӏисаца абуна: – Рагьтӏателазе бетӏерлъи гьабеян ва гьезие ригь-ригьалда ва роцада квен-тӏехги чӏезабеян тарав рагьтӏател,

⁴³ гьесул бетӏергьан тӏадвуссун вачӏараб мехалда ритӏухъго ва цӏодорго хӏалтӏулев ватани, – гьардарав гурищ гьединав рагьтӏател.

⁴⁴ Хӏакълъун абулеб буго дица нужеда: бетӏергьанас гьединав рагьтӏателасда божун тела жиндир тӏолабго магӏишат.

⁴⁵ Амма гьедин тарав рагьтӏател, жиндир бетӏергьан тӏадвуссун вачӏине гӏезегӏан заман бугин ракӏалдеги ккун, жинца тӏалаб гьабизе кколел рагьтӏателалги гъаравашалги рухизе-кьабизе лъугьани ва квана-гьекъон къоял тӏамулел ругони, щиб ккелеб?

⁴⁶ Гьесда ракӏалдаго гьечӏеб къоялъ ва вачӏиниланго ккечӏеб сагӏаталъ тӏаде рехун вачӏина гьесул бетӏергьан. Кӏихӏи хъвалхьина гьес гьев рагьтӏател, – иман гьечӏесул можоро бахъараб гӏадин ккела гьесул иш.

⁴⁷ Бетӏергьанасул амру-буюрухъги жинда лъалеб букӏаго, хӏадурго чӏун гьеб тӏубазабичӏев рагьтӏателасда цӏал гӏемер щвела.

⁴⁸ Бетӏергьанасул амру-буюрухъ лъалеб букӏинчӏев, амма вухизе кколеб иш гьабурасда цӏал дагьаб щвела. Гӏемераб кьун букӏарасдаса гӏемераб тӏалабги гьабила, божи цӏикӏкӏун букӏарас жавабги цӏикӏкӏун кьезе ккела.

«Ракьалда рекъел рещтӏинабизе гуро дун вачӏун вугев»

⁴⁹ Ракьалде цӏа рещтӏинабизе вачӏун вуго дун, гьанжего гьеб цӏа рекӏун бугебани кигӏанха дие бокьилеб букӏараб!

⁵⁰ Дица гӏор бахине ккола. Кигӏан кӏудияб ургъелха дида чӏван бугеб, кидадай гьеб тӏубалаян.

⁵¹ Ракьалде рекъелги босун дун вачӏаравиланищ нужеда кколеб бугеб? Гурилан абулеб буго дица, рикьи ккезабизе вачӏун вуго дун.

⁵² Гьанжеялдаса нахъе, цо хъизаналда щуго чи вугони, гьезул рикьи кьела: лъабгояв кӏигоясда данде вукӏина, кӏигояв лъабгоясда данде вукӏина.

⁵³ Гьединабго рикьи ккун, эмен васасда дандечӏела, вас инсуда дандечӏела; эбел ясалда дандечӏела, яс эбелалда дандечӏела; якьад нусалда дандечӏела, нус якьадалда дандечӏела.

«Гьанже заман кинаб бугебали щай нужеда лъалареб?»

⁵⁴ Гӏисаца халкъалде хитӏаб гьабун абуна: – Бакътӏерхьудасан накӏкӏул парча баккани, цӏцӏадае бугилан абула нужеца. Гьеб къоялъ цӏцӏадги бала.

⁵⁵ Къилбаялъул гьури пуйзе байбихьани, бакъул бухӏи цӏикӏкӏинин абула нужеца. Багӏарараб бачӏуна гьеб къо.

⁵⁶ Ле, гьересишайихзаби, зоб-ракьалъул хиса-басиялда хадур гӏунтӏула нуж, амма гьанже кинаб заман бугебали щайха нужеда лъалареб?

⁵⁷ Нужедаго щай лъалареб ритӏухъаб нухдасан хьвадизе?

⁵⁸ Масала, дурго дагӏбадулавгун судалде унев вугони, дове щвелалдего хӏаракат бахъе рекъел-бакъалдалъун гьев тӏаса вихьизавизе. Гурони, гьес мун судиясухъе вехъерхъила, судияс мун гӏеласухъе кьела, гӏелас мун гвандиниве рехила.

⁵⁹ Гьале дица дуда абулеб буго: дур ахирисеб шагьи-пара кьун налъи бецӏичӏого, гвандиниса къватӏивеги ворчӏиларо мун.