Лука 11 - Инжил

11 бетӏер Гӏисаца муридазда дугӏа гьабизе малъула

¹ Цо пуланаб бакӏалда Аллагьасе гьари-дугӏаялда вукӏана Гӏиса. Гьесул гьари-дугӏа лъугӏарабго, цо муридас Гӏисада абуна: – Я, Бетӏерчӏахъад! Яхӏяца жиндирго муридазда малъараб гӏадин, нижедаги малъе Аллагьасе гьари-дугӏа гьабизе.

² Гьес гьезда абуна: – Нужеца дугӏа гьабулаго гьадин абе: Я, Эмен, дур цӏар гӏадамаз мукъадасаблъун рикӏкӏаги, дур Парччахӏлъи тӏаде щваги,

³ щибаб къоялъ нижер бетӏербахъиялъе хинкӏ-чед кье нижее,

⁴ нижер мунагьазда тӏасаги лъугьа, гӏадамаз нижее гьабуралда нижги тӏасалъугьунел ругин. Нижер хӏалбихьизеги биччаге.

⁵ Цинги гьес бицана: – Масала, нужер цоясул вуго гьудул, сордо бащалъараб мехалъ гьесул нуцӏихъе ун дуца абулеб буго: «Я, дир гьудул, къаси дие цо лъабго чед кьеларищ дуца?

⁶ Сапаралда вугев цо гьудул гьоболлъухъ вачӏун вуго дихъе, гьесда цебе лъезе квен гьечӏого вуго дун», – абун.

⁷ Унго, дос жанисан гьадинаб жаваб кьеладай дуе: «Дир рахӏат хвезабуге. Нуцӏаги рахан буго, лъималги руго дида аскӏор бусада кьижун. Тӏаде вахъун дуе чед кьезе кӏоларо дида».

⁸ Амма дица абила гьадин: гьудуллъиялъул къимат гьабун кьечӏониги, дур тӏасавичӏунгутӏиялдаса ворчӏичӏого, гьайгьай, тӏаде вахъун дос дуе кьела къваригӏарабгӏанаб чед.

⁹ Гьединлъидал дица нужеда абулеб буго: гьаре нужеца – нужее кьечӏого толаро; балагье нужеца – батичӏого хутӏуларо; нужеца нуцӏа бухе – гьеб рагьичӏого толаро.

¹⁰ Гьарарасе кьола, балагьарасда батула, бухарасе нуцӏаги рагьула.

¹¹ Нужеда гъорлъ вугищ цониги эмен, васас ччугӏа гьарараб мехалъ, гьесухъе борохь кьолев?

¹² Яги, хоно гьарани, гьесухъе ичӏкӏал кьолев?

¹³ Нужго квешал ругониги, лъималазе нужеца лъикӏабщинаб кьолеб мехалъ, жинда гьарарасе кигӏан цӏикӏкӏун рещтӏинабилеб зобалазда вугев Инсуца Илагьияб Рухӏ.

Гӏисайищ яги жундузул ханищ?

¹⁴ Цо нухалъ цо чиясул чорхолъа Гӏисаца бачахъана гӏадан мацӏ лъаларевлъун лъугьинавулеб жен. Чорхолъа жен индал, мацӏ лъаларев чи гаргадизе лъугьана, гьелда гӏажаиблъи гьабун халкъги хутӏана.

¹⁵ Цо-цо гӏадамаз абулеб букӏана гьес инсанасул чорхолъа жундул рачахъулел ругин жундузул хан Беэлзебулил кумекалдалъун.

¹⁶ Цогидаз, гьесул хӏалбихьизелъун, тӏалаб гьабуна зодисан гӏаламат бихьизабеян.

¹⁷ Гьезул пикрабиги лъан, Гӏисаца гьезда абуна: – Бокьараб ханлъиялда жаниб кьал ккани – гьеб ханлъи биххула, хъизаналда жаниб кьал ккани – гьеб хъизанги биххула.

¹⁸ Гьединго илбисги жибго жиндаго дандечӏун кьалда бугони, гьелъул ханлъи биххичӏого хутӏилищ? Нужецани абулеб буго Беэлзебулил кумекалдалъун рачахъулин дица гьел.

¹⁹ Дица гьел Беэлзебулил кумекалдалъун рачахъулел ратани, нужер умматалъул гӏадамаз лъил кумекалдалъунха гьел рачахъулел? Гьеле гьел гӏадамаз нуж мекъи рукӏин чӏезабила гури.

²⁰ Амма дица жундул Аллагьасул кумекалдалъун рачахъулел ругелъул, Аллагьасул Парччахӏлъи нужеде гӏагарлъун букӏин бичӏчӏула гьелдасан.

²¹ Кодоб ярагъгун цо къуватав-кутакав чияс жиндирго рукъ цӏунулеб бугони, гьесул боцӏи-рикъзиялъе хӏинкъи букӏунаро.

²² Амма гьесдасаги къуватав тӏаде кӏанцӏани, гьев къезавила, гьесул ракӏчӏей букӏараб ярагъги кодоса босила, гьесухъа бахъун давлаги жидеразего бикьила.

²³ Дунгун цадахъ гьечӏев чи – гьев вуго дида дандечӏарав чи. Диргун жубай гьечӏев чияс журай биххизабила.

Жен жиндирго рокъобе тӏадбуссуна

²⁴ Инсанасул чорхолъа бачахъараб хъубаб жен ракъдалал авлахъазда терелеб-женжедулеб букӏуна, жиндиего рахӏат-хӏалхьи балагьулаго. Амма рахӏат-хӏалхьи батуларо женалда. Гьелъ абула: «Рачӏа, дун цебе дунго букӏараб рокъобе тӏадбуссина», – ян.

²⁵ Тӏадбуссун щведал, гьелда рукъ батула лъухьун, къачӏан.

²⁶ Гьанже женалъ жиндасаги гӏасияб анкьго женги бачуна гьеб рокъобе. Рахъун гьенир чӏола гьел. Гьебмехалъ дов чи цебе букӏаралдасаги квешаб хӏалалде ккола.

Гӏисаги цо пуланай чӏужугӏаданги

²⁷ Гӏисаца гьедин абидал, цо чӏужугӏаданалъ ахӏана халкъалъул руккалида гьоркьосан: – Гьардарай гурищха мун гьавурай, дуе керен кьурай дур эбел!

²⁸ Гьес абуна: – Дагьалги цӏикӏкӏун гьардарал гурищ Аллагьасул рагӏи рагӏулел ва гьелда рекъон хьвадулел гӏадамал!

Юнус аварагасул гӏаламаталъул хӏакъалъулъ

²⁹ Гӏемераб халкъ жиндаго аскӏобе бачӏараб мехалъ, Гӏисаца абуна: – Цӏакъго квешлъун буго гьаб уммат! Гьазие бокьун буго гӏаламат бихьизабизе. Юнус аварагасул гӏаламат гурони, цогидаб гӏаламат гьезие букӏине гьечӏо.

³⁰ Ниневиялъул халкъалъе гӏаламатлъун Юнус авараг лъугьарав гӏадин, Гӏадамил Лъимерги гӏаламатлъун лъугьина гьаб умматалъе.

³¹ Гьаб умматалда цадахъ яхъина къиямасеб къоялъ Къилбаялъул парччахӏги. Гьелъ гӏайиб чӏвала гьазда, гьей дуниялалъул рагӏалдаса яхъарай ячӏиндал Сулайман аварагасул гӏакъилаб рагӏухъ гӏенеккизе. Гьале гьанив вугевав гӏемерго тӏадегӏанав вуго Сулайман аварагасдаса.

³² Ниневиялъул халкъги бахъина къиямасеб къоялъ гьаб умматалда цадахъ ва гьезги гӏайиб чӏвала гьазда, Юнус аварагасухъ гӏенеккун гьел Аллагьасде руссиндал. Гьале гьанив вугевав гӏемерго тӏадегӏанав вуго Юнус аварагасдаса.

Чирахъалъул мисал

³³ Лъицаниги лъеларо рекӏараб чирахъ бихьулареб бакӏалда яги сахӏида гъоркь. Жанире лъугьаразе канлъи букӏунедухъ борхатаб бакӏалда лъола гьеб.

³⁴ Дур бер – гьеб буго дур черхалъул чирахъ. Берал канал ругони, дур тӏолабго черхги канлъула. Берал канлъукъал ругони, дур черхги бецӏлъула.

³⁵ Ворегиха, дулъ бугеб канлъи бецӏлъиялде сверизе гурин.

³⁶ Гьедин, мун канлъул цӏун вугони, щибниги бецӏлъиги дулъ гьечӏони, мун тӏуванго гвангъила, чирахъул канлъиялъ мун кенчӏезавун вугев гӏадин.

Гӏисаца фарисеяздаги диниял гӏалимзабаздаги гӏайиб чӏвалеб буго

³⁷ Гӏисал вагӏза лъугӏидал, цо фарисеяс гьев къаде кваназе ахӏана. Вачӏун сурпаялда нахъа гӏодов чӏана Гӏиса.

³⁸ Кваназе лъугьиналде гьес кверал чуричӏелъул, фарисеяв хӏикмалъун хутӏана.

³⁹ Тӏадегӏанав Гӏисаца гьесда абуна: – Нужеца, фарисеяз, суркӏа-щуруналъул тӏасахун рахъ бацӏцӏад гьабун чураниги, нужер жанисахун рахъ хъантӏиялъулги квешлъиялъулги цӏун буго.

⁴⁰ Гӏабдалзаби! Тӏасан бихьулеб бижарас гурищ жанибехун бугебги бижараб?

⁴¹ Амма жаниб бугебаб садакъаде кьуни, гьебмехалъ хӏакъикъаталда тӏасаги рацӏцӏалъила нуж.

⁴² Балагьги гӏазабги нужее, фарисеял. Нужеца садакъаде кьола хӏатта сагӏаналъул, гъараналъул ва цогидабги гӏурччинлъиялъул анцӏил бутӏа, ритӏухълъиялъулги Аллагьасде рокьиялъулги нужеца тӏалабго гьабуларо. Гьебги гьабизе ккола, гьабцоябги гьабичӏого тезе бегьуларо.

⁴³ Балагьги гӏазабги нужее, фарисеял! Нужее бокьула синагогабазда жанир киназдасаго церегӏан гӏодор чӏезе ва базаркъотӏноб халкъалъ салам кьезе.

⁴⁴ Балагьги гӏазабги нужее! Нуж релълъуна тӏасан хьвадулесда хӏатӏикь букӏин лъалареб, зани чӏвачӏеб хобалда.

⁴⁵ Гьебмехалъ цо динияв гӏалимчияс абуна гьесда: – Я, Мугӏалим! Гьединал рагӏабиги абун, дуца нижги инжит гьарулел ругогури.

⁴⁶ Гӏисаца абуна: – Нужееги, диниял гӏалимзаби, балагьги гӏазабги! Щайгурелъул нужеца гӏадамазул мугъзада лъолеб буго баччизе кӏоларебгӏан бакӏаб гьир, нужецагойин абуни, гьелда килищцин хъваларо.

⁴⁷ Балагьги гӏазабги нужее! Нужер умумуз чӏварал аварагзабазул хобазда тӏад мазарал гьарулел руго нужеца.

⁴⁸ Гьелдалъун нужеца чӏезабулеб буго умумузул ишазда нуж тӏад рекъолел рукӏин. Доз аварагзаби чӏвана, нужецайин абуни, доз чӏван хваразул хобазда тӏад мазарал гьарулел руго.

⁴⁹ Гьединлъидал Аллагьасул Гӏакъиллъиялъ абун буго: «Аварагзабиги чапарзабиги ритӏизе руго дица гӏадамазухъе, гьезин абуни цоял чӏвазе руго, цогидал рачахъизе руго.

^50-51 Гьабилидаса бахъараб къурбан хъолеб бакӏалдаги Мукъадасаб Рукъалдаги гьоркьов чӏварав Закария аварагасде щвезегӏан, дуниял бижаралдаса нахъе гӏодобе тӏураб киналго аварагзабазул бидул хӏакъ босизе буго гьаб умматалдаса». Гьале дица нужеда абулеб буго: гьаб умматалдаса тӏалаб гьабизе буго дозул бидул хӏакъ.

⁵² Балагьги гӏазабги нужее, диниял гӏалимзаби! Щайгурелъул нужеца гӏелмуялъул кӏул босана, амма кӏулал ричӏун нужгоги инчӏо жанире, ине бокьаралги риччачӏо.

^53-54 Гӏиса гьениса нахъе аралдасаго, батӏи-батӏиял суалал кьун, гьесухъа рагӏи бахъизе чанкъан чӏун, тӏаделъизе байбихьана диниял гӏалимзабазги фарисеязги, гьесул кӏал таризабизе кӏоларищали.