Иоанн 3 - Инжил

3 бетӏер Гӏисалги Никодемилги гара-чӏвари

¹ Ягьудиязул чӏухӏби-хӏакимзабазда гьоркьов вукӏана цо Никодем абулев фарисеяв.

² Сардилъ Гӏисахъе вачӏун, гьес абуна: – Я, Рабби! Нижеда лъала мун Аллагьас нижехъе витӏарав Мугӏалим вукӏин. Дуца нижеда рихьизарурал гӏадинал мугӏжизатал лъиданиги рихьизаризе кӏоларо, Аллагьасул квербакъи гьечӏони.

³ Гӏисаца гьесда абуна: – Хӏакълъун абулеб буго дица дуда: цӏидасан гьавурасда гурони Аллагьасул Парччахӏлъи бихьизе гьечӏо.

⁴ Никодемица гьесда гьикъана: – Кӏудияв гӏурав чи цӏидасан кин гьавулев? Тӏадвуссун эбелалъул ургьиве лъугьун, цӏидасан чи гьавизе рес бугебищ?

⁵ Гӏисаца жаваб кьуна: – Хӏакълъун абулеб буго дица дуда: лъададасан ва Илагьияб Рухӏалдасан лъугьарав чиясе гурони Аллагьасул Парччахӏлъиялде нух гьечӏо.

⁶ Инсанасул черхалдасан черх лъугьуна, рухӏалдасан рухӏ лъугьуна.

⁷ Нуж цӏидасан гьаризе кколилан дица абиялда хӏикмалъуге.

⁸ Гьури жиндиего бокьараб рахъалде уна. Дуда гьелъул гьаракь-хъуй рагӏула, амма кисан бачӏунеб ва кибе гьеб унеб бугебали дуда лъаларо. Гьелда релълъуна Рухӏалдасан гьавуравщинав чиги.

⁹ – Гьеб кин лъугьунеб? – ан гьикъана Никодемица.

¹⁰ Гӏисаца жаваб кьуна: – Мун вуго Исраилил халкъалъул мугӏалим. Дуда лъазе ккеларищ гьеб?

¹¹ Хӏакълъун абулеб буго дица дуда: нижеца бицунеб буго нижедаго лъалебщинаб ва нижеда бихьарабщиналъе нугӏлъи гьабулебги буго. Амма нижер нугӏлъиялда нуж божулел гьечӏо.

¹² Дуниялалъул ишазул хӏакъалъулъ бицаралда божулареб мехалъ, зобалазул ишазул бицунилан божилищ нуж?

¹³ Зобалазде цониги инсан щвечӏо, гьениса рещтӏарав Гӏадамил Лъимер тун батӏияв чи.

¹⁴ Гӏицӏаб авлахъалда Мусаца пахьул борохь гӏорол тӏогьибе бахинабураб гӏадин, Гӏадамил Лъимерги борхатаб бакӏалде вахинавизе вуго,

¹⁵ гьесда божаравщинасе абадияб гӏумру насиблъиялъе гӏоло.

¹⁶ Гьаб дуниял Аллагьасе гьедигӏанги цӏакъ бокьулеб буго: гьес цохӏо вугев Вас гьаниве витӏана, гьесда божанщинав чи хунгутӏизе, гьезие абадияб гӏумру насиблъизе.

¹⁷ Гӏаламалъе судги тамихӏги гьабизе витӏун гьечӏо Аллагьас жиндирго Вас дуниялалде, гьесдалъун гӏалам хвасар гьабизе витӏун вуго.

¹⁸ Гьесда божарасе тамихӏ букӏине гьечӏо, амма божичӏезе тамихӏ гьанибго гьабун буго, Аллагьасул цохӏо вугев Васасда гьел божичӏелъул.

¹⁹ Дуниялалде Нур бачӏиналдалъун гьабуна гьеб суд. Амма гӏадамазе Нур бокьичӏо, бецӏлъи бокьана, гьез гьарулел ишал квешал рукӏиндал.

²⁰ Квешлъи гьабулевщинав чиясе Нуралъул канлъи бокьуларо ва канлъуде унаро, гьеб квешлъи къватӏибе загьирлъилилан хӏинкъун.

²¹ Лъикӏлъи гьабулев чи канлъуде уна, жинца гьеб лъикӏлъи Аллагьасе гӏоло гьабураб букӏин загьирлъизе.

Яхӏяца Гӏисал хӏакъалъулъ бицунеб буго

²² Цинги Гӏиса жиндирго муридалгун цадахъ Ягьудиялъул ракьалде ана, гьенив чӏун гӏадамал лъадалъ ччун рахъулел рукӏана гьес.

²³ Гьеб заманаялда Яхӏяги вукӏана Салималда аскӏоб бугеб Эноналда. Лъим гӏемераб бакӏ букӏиндал, гьенир лъадалъ ччун рахъулаан Яхӏяца жиндихъего рачӏарал гӏадамал.

²⁴ Яхӏя жеги гвандинив тӏамилалде заман букӏана гьеб.

²⁵ Яхӏял муридазулги цо ягьудиясулги дагӏба ккана рацӏцӏалъизариялъул гӏадаталда тӏасан.

²⁶ Яхӏяхъе рачӏун муридаз абуна: – Я, Рабби! Иорданалъул добцояб рагӏалда дуда аскӏов вукӏарав ва дуца жиндир хӏакъалъулъ бицунеб букӏарав чиясги лъадалъ ччун рахъулел руго гӏадамал. Киналго гьесухъе рачӏунел руго.

²⁷ Гьезие жавабалъе Яхӏяца абуна: – Зобалаздасан кьун гьечӏони, инсанасе щибниги щоларо.

²⁸ Нужеда рагӏанагури добмехалъго дица дун Масихӏ гурин, гьесдаса цеве витӏарав чи вугилан абулеб.

²⁹ Бахӏарав вуго бахӏаралъул бетӏергьан, бахӏарасул гьудулин абуни бахӏарай ячине гьев вачӏинегӏан чӏезе ккола, ва, гьев вачӏунев рагӏарабго, вохуца холев вукӏине ккола. Гьедин гьанже дунги кутакалда вохун вуго гьев вачӏиналдаса.

³⁰ Гьев кӏодолъизе ккола, дун гьитӏинлъизе ккола.

³¹ Зобалаздасан вачӏарав киназдасаго тӏадегӏанав вукӏуна. Ракьалда вижарав ракьалдаго хутӏула, дуниялалъул ишазул хӏакъалъулъ букӏуна гьесул бицунеб рагӏиги. Зобалаздаса вачӏарав киназдасаго тӏадегӏанав вукӏуна.

³² Гьес бицунеб буго жиндаго бихьаралъулги рагӏаралъулги. Амма гьес бицаралда щивниги божулев гьечӏо.

³³ Гьесда божарав чияс Аллагь хӏакъав вукӏин чӏезабула.

³⁴ Аллагьас витӏарасул кӏалдиб буго Аллагьасул калам, Бетӏергьанас Илагьияб Рухӏ гьарзаго лъугьинабун бугелъулха гьесулъе.

³⁵ Инсуе вас вокьула ва тӏолабго кверщел гьесухъе кьола.

³⁶ Васасда божарав чиясе абадияб гӏумру насиблъила. Васасухъ гӏенеккичӏесда абадияб гӏумру бихьиларо, Аллагьасул ццин бахъин тӏаса инаро гьесдаса.