Иоанн 2 - Инжил

2 бетӏер Канаялда бертин

¹ Кӏиго къоялдасан Галилеялъул Кана абулеб шагьаралда бертин букӏана. Гӏисал эбелги йикӏана берталъ.

² Берталъе ахӏана Гӏисаги гьесул муридалги.

³ Кинабго чагъир гьекъон бахъараб мехалъ, эбелалъ Гӏисада абуна берталъ чагъир лъугӏун бугилан.

⁴ Гӏисаца гьелда абуна: – Я, дир эбел, дида щай дуца гьеб абулеб бугеб? Дирго иш гьабизе жеги болжал щун гьечӏогури.

⁵ Амма эбелалъ бертадул иш тӏубазабулел рукӏарал гӏадамазда абуна гьас малъараб гьабейилан.

⁶ Гьениб букӏана рацӏцӏалъизариялъул гӏадат тӏубазабизе жугьутӏаз лъим жанибе тӏолеб гамачӏ бекӏкӏун гьабураб анлъго рагӏ. Щуго-анлъго къали унаан щибаб рагӏалъубе.

⁷ Гӏисаца гьезда абуна гьел рагӏал лъадал цӏезареян. Симсимун лъадал цӏезабуна гьез гьеб анлъабго рагӏ.

⁸ Пурччби цӏезарун тамадаясухъе гьебги босун айилан абуна Гӏисаца гьел бертадул иш тӏубазабулел гӏадамазда. Босун щвезабуна гьез гьеб.

⁹ Тамадаяс гьелъул хӏалбихьизе цин жинцаго гьекъана. Чагъир батана гьеб. Амма киса гьеб бачӏарабали гьесда лъалароан. Гьеб лъалаан дол гӏадамазда.

¹⁰ Гьебмехалъ, ахӏун аскӏовегун, тамадаяс бахӏарасда абуна: – Кибгоги берталъ цин лъикӏаб чагъир кьола гьекъезе, цинги гӏадамал мехтидал, квешабги бахъула цебе. Дуцайин абуни гьанжелъагӏан тун букӏун буго бищунго лъикӏаб чагъир.

¹¹ Гьедин гьениб – Галилеялъул Кана шагьаралда – бихьизабуна Гӏисаца тӏоцебесеб мугӏжизат. Загьирлъизабуна жиндирго къудрат. Муридалги божана Гӏисада.

¹² Цинги Гӏисаги, гьесул эбелги, вацалги ва муридалги Капернаумалде ана. Чанго къо бана гьез гьениб.

Гӏисаца даранчагӏи Мукъадасаб Рокъоса къватӏире гъола

¹³ Жугьутӏазул Пасха тӏаде щолеб букӏиндал, Гӏиса Иерусалималде ана.

¹⁴ Мукъадасаб Рокъове лъугьиндал, Гӏисада гьенир ратана къурбаналъе хъвезе гӏи-боцӏиги маккалги ричулел гӏадамал, жидерго столазда нахъа гӏодор чӏун ругоан гӏарац хисулел чагӏиги.

¹⁵ Цӏалаца гӏадин квар-гӏарщалъ рухулаго гьел гӏадамалги гӏи-боцӏиги къватӏире гъуна Гӏисаца, гӏарац хисулел чагӏазул столалги кӏалагъоркье чӏвазарун, гӏарац гӏодобе щущазабуна.

¹⁶ Маккал ричулел чагӏазда гьес абуна: – Нахъе босе гьаб кинабго. Дир Инсул рукъ базаралде сверизабуге, – ян.

¹⁷ Гьебмехалъ Гӏисал муридазда ракӏалде щвана: «Дур рукъалъухъ бергьараб хӏасраталъ вухӏулев вуго дун», – абун Тӏухьдузда хъван бугеб калима.

¹⁸ Гьенир рукӏарал ягьудияз Гӏисада гьикъана: – Дуца кинаб гӏаламаталдалъун нижеда бихьизабилеб гьеб киналъего дур ихтияр букӏин?

¹⁹ Гӏисаца гьезие жаваб кьуна: – Нужеца гьаб Мукъадасаб Рукъ биххизабе, цинги лъабго къоялда жаниб дица гьеб цӏидасан бала.

²⁰ Гьесие жавабалъе ягьудияз абуна: – Гьаб Мукъадасаб Рукъ базе кӏикъоялда анлъго сон къваригӏана. Лъабго къоялда жаниб бан бажарилищ духъа гьеб?

²¹ Гьеб Мукъадасаб Рукъалъул мисалалда Гӏисаца бицунеб букӏун буго жиндирго черхалъул хӏакъалъулъ.

²² Гӏиса хваралъуса вахъараб мехалъ ракӏалде щвана муридазда гьесул гьел рагӏаби. Гьебмехалъ божана гьел Тӏухьдузда хъван букӏаралдаги Гӏисаца жидедаго бицун букӏаралдаги.

Лъида щиб ракӏалда бугебали лъала Гӏисада

²³ Иерусалималда Гӏиса Пасхаялъул байрамалда вугеб мехалъ, гьесдасан загьирлъарал гӏаламатал рихьун, гӏемерал гӏадамал божана гьесда.

²⁴ Амма Гӏиса лъиданиги божизе кколароан. Гьел киналго щал кколелали лъалеб букӏана гьесда.

²⁵ Пуланав чи гьадинав-додинав вугилан лъицаниги бицинчӏониги, жиндаго лъалаан лъида щиб ракӏалда бугебали.