Коринфиязухъе кӀиабилеб кагъат 8 - Инжил

8 бетӏер Иерусалималъул иман лъуразул агьлуялъе садакъа

¹ Нижее бокьун буго, вацал, Македониялда ругел иман лъуразул агьлуялда Аллагьас баркат лъун бугеблъи нужеда лъазе.

² Гӏазаб-гӏакъуба хӏехьезе ккун хадуб гьарзаяб рохелги кутакаб мискинлъиги насиблъарал гьезулъ сахаватлъи цӏикӏкӏана, цӏадалдаса хадуб гӏоразул, лъаразул лъим гӏадин.

³ Ракӏ разилъун гьез садакъаби кьуна (дир беразда бихьана гьеб) жидеда кӏварабгӏанги, хӏатта гьелдаса цӏикӏкӏунгицин.

⁴ Гьез кутакалда гьарулеб букӏана нижеда Аллагьасе хирияб халкъалъе жидецаги кумек гьабизе биччайилан.

⁵ Нижеда ракӏалдацин букӏинчӏо гьез гьедин абилилан. Гьез жидерго кверщел тӏоцебе Тӏадегӏанасухъе кьуна, цинги Аллагьасул амруялдалъун нижехъеги кьуна.

⁶ Гьединлъидал нижеца Титида гьарулеб буго нужер гьениб гьес гьабизе байбихьараб баркатаб иш рагӏалде бахъинабейилан.

⁷ Нужелъ кинабго гьарзалъун буго: божи-иманги, кӏалзул пасихӏлъиги, гӏелму-лъайги, сундулъго хӏаракатги, нижедехун нужер рокьиги. Гьеб баркатаб ишалъулъ щибго камун хутӏугеги нуж.

⁸ Амру гуро дица гьабулеб бугеб. Цогидазул хӏаракаталъулги бицун, дица халгьабулеб буго вацаздехун нужер рокьи унго-унгояб бугищали.

⁹ Нужеда лъала нилъер Тӏадегӏанав Гӏиса Масихӏидасан щолеб баркат. Бечедав вукӏаниги, нужее гӏоло мискинлъана гьев, – гьесул мискинлъи сабаблъун нуж бечелъизе.

¹⁰ Гьеб ишалъул рахъалъ дица нужее гьадинаб гӏакълу кьела: гъоркьиса байбихьараб хӏалтӏи гьанже рагӏалде бахъинабун лъикӏ нужеца. Гьеб тӏоцебе байбихьарал чагӏиги нуж руго, гьеб гьабизе тӏоцебе бокьарал чагӏиги нуж руго.

¹¹ Доб мехалда букӏараб гӏадинаб гъира-шавкъалда, нужерго ресалда рекъон, рагӏалде бахъинабе нужеца гьеб иш.

¹² Садакъа кьезе ракӏалда бугев чияс гьеб жиндир ресалда рекъон кьейилан абула Аллагьас, рес гьечӏони, кьезе кколарила гьес гьеб.

¹³ Нужер гьодида бакӏаб гьирги лъун, цогидазе бигьалъи гьабизе гуро дица гьедин абулеб бугеб. Ращалъи букӏине кколин абизе бокьун буго дие.

¹⁴ Нужее гьанже щибго гьарзалъун бугеб мехалда, язихъ ругезе нужеца кумек гьабуни битӏун букӏинарищ? Нуж язихъго ругеб мехалда, гьезие гьарзалъи щвани, гьезги гьабила нужее кумек. Гьеле гьедин ращалъила нуж.

¹⁵ Тӏухьдузда хъван бугелъул: «Гӏемераб бакӏарарасул щибго тӏокӏлъичӏо, дагьаб бакӏарарасе щибго камичӏо», – ян.

¹⁶ Нужее кумек гьабизе гьединабго гъира-шавкъ Титил рекӏелъе лъугьинабурав Аллагьасе рецц!

¹⁷ Нижеца гьарараб гьабизе разилъи гуребги, гьесие жиндиегоги цӏакъ бокьун буго нужехъе вачӏине.

¹⁸ Гьесда цадахъ нижеца витӏулев вуго Рохалил хабар тӏибитӏизабиялъул рахъалъ иман лъуразул киналго жамагӏатазда гьоркьов машгьурав нижер цо диналъул вац.

¹⁹ Гьединго иман лъуразул жамагӏатаз гьев вищун вуго, гьаб баркатаб иш тӏубазабулаго, нижеда цадахъ кидаго сапаразда вукӏине. Тӏадегӏанасул цӏар-рецц цӏикӏкӏинабизе ва нужее кумек гьабизе ниж хӏадурал рукӏин бихьизабизе тӏаса вищарав чи вуго гьев.

²⁰ Гьарзаго щолеб бугеб садакъа нижеда божун тезе бегьуларилан лъицаниги абизе бокьун гьечӏо нижее.

²¹ Тӏадегӏанасда цебе гуребги, гӏадамазда цебеги гӏайиб чӏваларедухъ рукӏине бокьун буго.

²² Гьел кӏияздаго цадахъ витӏулев вуго нижер цоги вацги. Батӏи-батӏияб ахӏвал-хӏалалда чанцӏулго хӏалбихьун лъана нижеда вацазе кумек гьабизе гъира-шавкъалъул цӏурав чи гьев вукӏин. Гьанже гьесул нужеде божилъи цӏикӏкӏун бугелъул, гьелдаго цадахъ цӏикӏкӏун буго гьесул гъира-шавкъги.

²³ Титил рахъалъ абуни, гьев вуго дир гьалмагъ ва нужее хӏалтӏулев чи. Цогидал вацалин абуни, гьел руго иман лъуразул жамагӏатаз ритӏарал чагӏи, – Масихӏил цӏар-рецц цӏикӏкӏинабулел чагӏи.

²⁴ Хӏасил, иман лъуразул жамагӏатазда бихьизабе нужее гьел чапарзаби рокьараллъи ва нижеца нуж гӏадада реццун рукӏинчӏеллъи.