Коринфиязухъе кӀиабилеб кагъат 7 - Инжил

7 бетӏер

¹ Нилъее гьедин рагӏи кьун бугелъул, дир хириял, хӏарамабщиналдаса бацӏцӏад гьабилин нилъерго черхги рухӏги! Аллагьасукьа хӏинкъун, гьеб рацӏцӏалъиги камиллъизабилин! Павел коринфияздаса рази вуго

² Нужерго ракӏал рагье нижее. Нужер цониги чиясе квешлъи гьабичӏо нижеца, цониги чиясул магӏишат биххизабичӏо, цонигиясдалъун нижгоги бечелъичӏо.

³ Нужеда гӏайиб чӏвазе гуро дица гьедин абулеб бугеб. Цебеги абун букӏана: нуж нижер ракӏазулъ рукӏина ниж хваниги-рахъаниги.

⁴ Дун нужеда цӏакъ божун вугевха! Дун нужедаса цӏакъ чӏухӏун вугевха! Гьаб кинабго гӏазаб-гӏакъуба бугониги, дун цӏакъ чӏаголъиялда вуго! Цӏун тӏасан чвахулеб рохелги буго рекӏелъ!

⁵ Гьанире Македониялде рачӏараб мехалъ, рахӏат-хӏалхьи толеб букӏинчӏо нижее. Кирехун руссаниги, балагь батулаан цебечӏун, – къватӏисан тӏаделъиги, жаниб рекӏелъ хӏинкъиги.

⁶ Язихъал-пакъираздаги кверчӏвалев Аллагьас кверчӏвана нижеда, Титги гьаниве витӏун.

⁷ Гьев вачӏиналдаса гуребги, нужеца гьесда кверчӏванилан бициндалги вохана. Гьес бицана, нуж диде ракӏщун ругилан, дандеккунгутӏи сабаблъун къварид ругилан, кӏудияб гъира-шавкъалда нужеца дир рахъ кколебги бугилан. Дагьавги цӏакъ вохана дун гьелдаса.

⁸ Дир кагътица нуж пашманлъизарун ратаниги, гьанже дир ракӏбухӏун гьечӏо гьеб хъваялдаса. Доб мехалъ ракӏбухӏун букӏараб батаниги, дида бихьана гьеб кагътица нуж цо дагьабго заманаялъгӏаги пашманлъизарураллъи.

⁹ Амма гьанже гьелдаса вохун вуго. Нуж пашманлъиялдаса гуроха дун вохун вугев, гьелдалъун нуж кантӏиялдасайин. Гьеб пашманлъи Аллагьасдасан бугелъул, нижедасан нужее щибго зарал-зиян ккун гьечӏогури.

¹⁰ Аллагьасдасан бугеб пашманлъиялъ кантӏизарула, хвасарлъизарула. Гьелдаса ракӏбухӏизеги кколаро. Амма гьаб дуниялалъул пашманлъиялъ хвалде рачуна.

¹¹ Халгьабеха гьеб Аллагьасдасан бачӏараб пашманлъиялъ нужелъ гъира-шавкъ бижизабураб куцалъухъ! Нужго рацӏцӏалъизе бахъараб хӏаракаталъ, мунагь гьабурасдехун ццидал кутакалъ, гьелда хурхун букӏараб ахӏи-хӏуралъ, дун вихьизе бугеб урхъиялъ, гӏайиб ккарасе гьабураб тамихӏалъ, – гьеб киналдалъунго нужеца бихьизабуна нуж гьеб ишалъулъ рацӏцӏадал рукӏин.

¹² Дица доб кагъат нужехъе хъван букӏаниги, гьеб хъван букӏинчӏо жиндие зарал гьабурав чи яги жинца зарал гьабурав чи сабаблъун. Гьеб хъван букӏана Аллагьасда цебе нижедехун кинаб рокьи нужер бугебали нужедаго бичӏчӏизе.

¹³ Гьелъ нижер ракӏбатизабуна. Гьелъ ракӏбатизабун ниж ругеб мехалда, дагьабги ракӏбатизабуна Титги нужедаса вохун вукӏин лъайдал. Гьесул рекӏелъа ургъел бачахъун буго нужеца киназго.

¹⁴ Дица нуж гьесие цӏакъ реццун рукӏана, гьеб сабаблъун нечезе ккечӏо дун. Нижеца нужеда бицарабщинаб битӏараб букӏарабго гӏадин, нуж реццун нижеца Титида бицун букӏарабги битӏараб батана.

¹⁵ Нужехъе жив вачӏараб мехалда нужер букӏараб хӏинкъиги, сородиги, мукӏурлъиги ракӏалде щун, гьанже Титие жеги цӏикӏкӏун рокьулел руго нуж.

¹⁶ Дун вохун вуго тӏубанго нужеда божизе бегьулеб букӏиналдаса.