Коринфиязухъе кӀиабилеб кагъат 3 - Инжил

3 бетӏер Цӏияб къотӏиялъул Нур

¹ Ниж щал чагӏияли нужеда гьанжеги бихьизабизейищ ниж кӏалъалел ругел? Цогидазе гӏадин, нижее хӏажат бугебищ ниж реццарал кагътал я нужехъе хъвазе, я нужеца хъван рачӏине?

² Нуж руго – ниж реццараб кагъат! Нижер ракӏазулъ хъван буго гьеб, киназдаго лъазе, киназго цӏализе!

³ Щакъиялъ гуреб, хӏакъав Аллагьас битӏараб Рухӏалдалъун Масихӏица хъван, нижеца босун бачӏараб кагъатлъун ругеллъи бихьизабуна нужеца. Ганчӏил къаназда гуреб, инсанасул рекӏеда хъвараб кагъатин гьеб.

⁴ Масихӏидалъун Аллагьасде кӏудияб божи-иман бижун буго нижер рекӏелъ.

⁵ Сундуениги ярагьунел чагӏи ниж ругилан абизесеб гьунар гьечӏо нижелъ, кинабго Аллагьасдасан щвараб буго.

⁶ Гьес лъугьинаруна ниж Цӏияб къотӏиялъе хъулухъ гьабизе ярагьунеллъун. Цӏияб къотӏиялъул аслу-кьучӏ хӏарпазулъ гуро бугеб, Рухӏалъулъ буго. Хӏарпалъ хвезарула, Рухӏалъ чӏаголъизарула!

⁷ Къанун хъван букӏана ганчӏил къаназда. Аллагьас гьеб рещтӏинабулеб мехалъ илагьияб Нур гвангъана, гьеб дагьабго заманаялъ загьирлъун букӏаниги, Исраилил халкъалда кӏвечӏо гьеб Нуралъ гвангъизабураб Мусал гьурмахъ ралагьизе. Хвалде рачунеб Къанунгун цадахъ рещтӏараб Нур гьединаб гвангъараб букӏараб батани,

⁸ Илагьияб Рухӏалъ чӏезабураб къотӏиялъул Нур кигӏан кутакабха букӏинеб?

⁹ Тамихӏалде рачунеб Къанунгун цадахъ рещтӏараб Нур гьединаб гвангъараб букӏараб батани, инсан ритӏухъ гьавулеб Рухӏалъул Нур кигӏан кутакабха букӏинеб?

¹⁰ Кидаялиго Къанунгун цадахъ рещтӏараб Нур гьанже тӏубанго тӏагӏун буго, гьелдасаги гӏемерго гвангъараб Нур хӏакълъунго ракьалде рещтӏун бугелъул!

¹¹ Дагьабго заманаялъе рещтӏараб Нур гвангъун букӏараб батани, гьелдаса гӏемерго цӏикӏкӏун гвангъула абадияб Нур.

¹² Гьеб киналдего хьул лъезе рес бугелъул, рагьун ва хӏинкъичӏого кӏалъала ниж.

¹³ Ссун унеб ва цебеса тӏагӏунеб Нур Исраилил халкъалда бихьичӏого букӏине гьумер пардавалъ бахчарав Муса гӏадин гурелха.

¹⁴ Ракӏбицалъун букӏана гьезул. Жакъа къоялде щвезегӏанги, Некӏсияб къотӏиялъул Тӏухьдул цӏалулеб мехалъ, гьеб пардав букӏуна гьезул гьурмазда цебе. Вачӏун Масихӏицалъидал гьеб бахъун рехулеб.

¹⁵ Жакъа къоялде щвезегӏанги, Мусал Къанун цӏалулеб мехалъ, гьеб пардавалъ бахчун букӏуна гьезул ракӏги.

¹⁶ Амма инсан Бетӏергьанасдехун вуссиндал, гьес бахъун рехула гьеб.

¹⁷ Гьаниб Бетӏергьан абураб рагӏул магӏна ккола Илагьияб Рухӏ. Аллагьасдасан бачӏараб Рухӏ бугеб бакӏалда эркенлъиги букӏуна!

¹⁸ Пардавалъ гьумер бахчичӏого, матӏуялъуре гӏадин, ралагьула ниж Бетӏергьанасул гвангъараб Нуралъухъ. Нижелъ гьеб Нур дагь-дагьккун гвангъидал, нижги лъугьуна гьесул сипатлъун. Гьеб кинабгоги лъугьуна жинда Рухӏилан абулев Бетӏергьанасдасан.