Коринфиязухъе кӀиабилеб кагъат 13 - Инжил

13 бетӏер Ахирисел насихӏатал

¹ Лъабабилеб нухалдаги вачӏинехъин вуго дун нужехъе. Тӏухьдузда хъван буго: «Лъилниги рагӏи ритӏухълъизе ккани, къваригӏуна кӏиго яги лъабго чиясул нугӏлъи».

² Кӏиабилеб нухалъ вачӏараб мехалдаги лъазабун букӏана, гьанже нужедаса рикӏкӏад вукӏаго нахъеги лъазабулеб буго, гьел мунагьал рехун течӏезе ва киналго цогидазеги гьаб нухалда гурхӏел букӏине гьечӏилан.

³ Нужеца тӏалаб гьабулеб буго дун Масихӏил кӏалдисан кӏалъалев вукӏин чӏезабейилан. Масихӏ нужее загӏипавлъун гуро загьирлъун вугев, нужеда гъорлъ жиндирго къуват бихьизабулеб буго гьес.

⁴ Хӏакъикъаталдаги загӏипав вукӏана гьев хъанчида ван вугеб мехалъ, амма Аллагьасул къудраталъ чӏаголъизавуна. Гьесде цолъарал нижги загӏипал руго, амма Аллагьасул къудраталдалъун нужеда гъорлъ нижги гьесда цадахъ чӏаго рукӏина.

⁵ Нужер иман щулалъун бугищали хӏалбихье. Гӏиса Масихӏ нужелъги вукӏин бичӏчӏулеб гьечӏебищ нужеда? Гьеб бичӏчӏулеб батичӏони, Аллагь разилъун гьечӏо нужедаса.

⁶ Нижедаса Аллагь разилъун вукӏин нужеда лъалилан хьул буго нижер.

⁷ Нижеца Аллагьасда гьарула нуж квешлъи гьабизе риччагейилан. Нижедаса Аллагь разилъун вукӏин чӏезабизе гуребха нижеца гьеб гьарулеб. Нужеца лъикӏлъи гьабуни гӏела нижее, нижедаса Аллагь разилъун гьечӏилан нужеда ракӏалде кканиги.

⁸ Хӏакъабщиналде данде къеркьезе гуреб, гьелъие гӏоло къеркьезейин нижелъ къуват бугеб.

⁹ Ниж загӏиплъун ругони, нужелъ къуват цӏикӏкӏани, гьелдаса рохула ниж. Нижеца Аллагьасда гьарулеб жого нуж лъикӏаб рахъалде рачейилан буго.

¹⁰ Гӏумру хвезабизе гуреб, гьеб берцин гьабизе Тӏадегӏанас дие кьураб ихтияралда рекъон, нужер гьениве вачӏун кьварараб тамихӏ гьабизе ккунгутӏизейин гьанив вукӏун хъвалеб бугеб дица гьадин.

Кагътил ахир

¹¹ Кагътил ахиралдаги – роха-хинлъун рукӏа, вацал, битӏараб нухде русса, дица гьарарабги гьабе, цоцазулгун рагӏи данде ккезабе, рекъа-решон рукӏа, – рекъелги рокьиги рещтӏинабулев Аллагьас рехун теларо нуж!

¹² Иман лъуразул агьлуялъ гӏадин цоцазда баун салам гьабе. Иман лъуразул тӏолабго агьлуялъулги салам буго нужеде.

¹³ Тӏадегӏанав Гӏиса Масихӏил цӏобги Аллагьасдасан рокьиги даимго хутӏаги нужелъ. Илагьияб Рухӏалъ цолъизареги нуж.