Тимофейихъе тӀоцебесеб кагъат 3 - Инжил

3 бетӏер Иман лъуразул агьлуялъул бутӏрулги кумекчагӏиги

¹ Гьале кьучӏаб калам: бетӏерлъи гьабизе ният-къасд ккей цӏакъ лъикӏаб иш буго.

² Иман лъуразе бетӏерлъи гьабизе ккола багьана-гӏайиб чӏвазе бакӏ гьечӏого гӏумру гьабулев, цо нухалъ гурони чӏужу ячинчӏев, сабруяв, цӏодорав, гӏадлу-тадбир бугев, гьалбал хирияв, насихӏат гьабизе бажарулев чияс.

³ Гьев вукӏине бегьуларо гьекъолдухъан, вагъизе бокьулев чи. Вукӏине ккола хӏеренав, питна гьабуларев, гӏарцуда хадув лъугьунарев чи.

⁴ Вукӏине ккола рукъалъул агьлуялъе гӏадлу гьабизе кӏолев, гӏинтӏамулел ва сундулъго хӏурмат-къадру бугел лъималазул эмен.

⁵ Жиндирго рукъалъул гӏадамазе гӏадлу гьабизе кӏоларев чиясда Аллагьасде иман лъуразул агьлуялъул тӏалаб гьабизе кӏвеладай?

⁶ Гьев вукӏине бегьуларо цӏидасан иман лъуразда гьоркьоса чи, – гьев цӏакъго чӏухӏила, ва илбисалъе гӏадинаб гӏазабги хӏакълъила гьесие.

⁷ Нилъер агьлуялда гъорлъ гьечӏезда гьоркьобги лъикӏаб цӏар-рецц букӏине ккола гьесие гьабулеб, гьечӏони – гӏадамаз кӏалухъ вахъила ва илбисалъул къорикье ккела.

⁸ Гьесул кумекчагӏиги рукӏине ккола къадру-къимат бугел, кьураб рагӏуе хисуларел, чагъир гӏемер гьекъоларел, хӏарамаб бечелъиялда хадур лъугьунарел,

⁹ цебе балъгояблъун букӏун, гьанже нилъее загьирлъараб божи-иманалдаса кьуруларел ва намус бацӏцӏадал гӏадамал.

¹⁰ Гьезулги цебеккунго хӏалбихьизе ккола, ва гьезул щибниги квешлъи бихьичӏони, хъулухъ гьабизе тезе бегьула.

¹¹ Гьезул лъудбиги рукӏине ккола адаб-хӏурматалъе мустахӏикъал, мацӏ гьабуларел, гьекъолдуларел, сундулъго божилъи гьабизе бегьулел.

¹² Гьел кумекчагӏиги рукӏине ккола цо нухалъ гурони чӏужу ячинчӏел ва лъималазеги рукъалъул гӏадамазеги гӏадлу кьезе лъалел.

¹³ Жидеца хъулухъ лъикӏ гьабулеб бугилан гӏадамазда гьоркьоб къимат борхараз хӏинкъичӏого бицине бегьула Масихӏ Гӏисаде бугеб божи-иманалъул хӏакъалъулъ.

¹⁴ Кватӏичӏого духъе вачӏине рес ккелилан дир хьул бугониги, хъвалел руго дица гьал насихӏатал,

¹⁵ нагагь дун вачӏине кватӏани, нужеда лъан букӏине Аллагьас тӏаса бищараб агьлуялда, ай абадияв-даимав Аллагьасде иман лъуразул агьлуялда гьоркьор кин хьвада-чӏвадилелали. Гьеб ккола хӏакъабщиналъул хӏубиги сангарги.

¹⁶ Лъилниги щаклъи ккезе бегьуларо нилъер божи-иманалъулъ кӏудияб балъголъи букӏиналда. Дов вуго инсанасул чорхолъ Аллагьас жив загьир гьавурав, Илагьияб Рухӏалъги жив ритӏухъ гьавурав, Малаикзабаздаги жив вихьарав, Халкъаздаги жиндир хӏакъалъулъ лъазабурав, Дуниялалдаги жинда божарав, Живги Аллагьасул къудраталдалъун зобалазде восун арав.