Тимофейихъе тӀоцебесеб кагъат 2 - Инжил

2 бетӏер Дугӏа кин гьабилебали насихӏат

¹ Гьеле гьедин, сундасаго цебе, дица гьарулеб буго: нужеца дугӏадулъ киналго рехсе, Аллагьасда гьаре гьезда тӏасалъугьайилан, гьезде баркат рещтӏинабейилан. Дугӏадулъ Аллагьасе реццги гьабе.

² Дугӏадулъ рехсе парччахӏзабиги киналго хӏакимзабиги. Гьедин гьабуни, нилъер гӏумру букӏина гӏодобе биччараб ва ракълилаб, муъминлъиги цӏикӏкӏараб, къадру-къимат борхараб.

³ Гьеб буго нилъ хвасар гьарулев Аллагьасда цебе лъикӏаб ва гьев разилъулеб иш,

⁴ гьесие бокьун бугелъулха киналго гӏадамал хвасарлъизе ва хӏакъабщинаб лъаялде рачӏине.

^5-6 Аллагь цо вуго, Аллагьасул ва инсанияталъул гьоркьохъанги цо Инсан вуго. Гьев ккола киназулго рецӏалие живго кьурав Масихӏ Гӏиса. Гьебги ккола Аллагьас хъвараб заманалда загьирлъараб гӏаламат!

⁷ Гьединлъидал Аллагьас дун витӏана божи-иманалъул ва хӏакъабщиналъул хӏакъалъулъ цогидал халкъазда бицине илчилъун, чапарлъун ва насихӏатчилъун. Дица гьереси бицунеб гьечӏо, дица битӏараб бицунеб буго!

⁸ Дие бокьун буго бихьиназ кидаго ва кибго гьари-дугӏаялъе кверал цере кквезе рацӏцӏадал къасдалгун, рекӏелъ ццин гьечӏого ва дагӏба-къец гьечӏого.

⁹ Риччанте руччаби гӏадатго ретӏа-къан рукӏине, риччанте гьел берцинлъизе бацӏцӏадаб намусалъги лъикӏаб гӏамалалъги. Ботӏрол рас къачӏаялъ, меседалъ ва жавгьар-якъуталъ, чӏухӏараб ратӏлица гуро гьел берцинлъизе кколел,

¹⁰ гьел берцинлъизе ккола Аллагьасе гӏибадат гьабулел руччабазда рекъолебщиналдалъун, ай лъикӏал ишаздалъун.

¹¹ Йиччанте чӏужугӏадан, юцӏцӏун чӏун, тӏубараб мутӏигӏлъигун, вагӏза-насихӏаталъухъ гӏенеккизе.

¹² Дица чӏужугӏаданалъе изну кьоларо насихӏат гьабизе. Гьедин бихьиназда тӏад кверщел гьабизе бегьуларо гьелъ. Йицӏцӏун чӏайилан абе!

¹³ Тӏоцеве Адам вижидалха, Хӏава цинги йижана.

¹⁴ Адам гуро къосинавурав, чӏужугӏадан къосинаюна. Гьелъ Аллагьасул амру тӏубазабичӏо.

¹⁵ Амма гьейги хвасарлъизе йиго лъимал гьаридал, гьайгьай, гьелъ гӏумру божи-имангун ва рокьигун, бацӏцӏадго ва цӏодорго тӏамулеб бугони.