Фессалоникиязухъе тӀоцебесеб кагъат 5 - Инжил

5 бетӏер Рорчӏуда чӏа

¹ Гьеб лъугьине бугеб заманаялъулги болжалалъулги хӏакъалъулъ нужехъе хъвазе ккеларо, вацал.

² Нужедаго мухӏканго лъалелъул Тӏадегӏанасул къо тохлъукьего – сардилъ цӏогьор гӏадин бачӏунеблъи.

³ Ракълида ругин ва сундулго хӏинкъиги гьечӏин гӏадамаз абулеб мехалъ, чӏужугӏаданалда тохлъукье хӏара чӏвалеб гӏадин, ракӏалдаго гьечӏого хвела гьел, ва щивниги хвасарлъиларо.

⁴ Нужни, вацал, бецӏлъуда гьечӏелъул, цӏогьор гӏадин бачӏинаро нужехъе гьеб къо.

⁵ Нуралъ къалъ-къалъизарунги руго нуж киналго, къоялъ гвангъизарунги руго. Нилъее я сордо гьечӏо, я бецӏлъи гьечӏо.

⁶ Гьединлъидал, цогидал гӏадамал гӏадин, кьижиларо, рорчӏуда рукӏина, ригьун рукӏина нилъ.

⁷ Кьижулев чи сардилъин кьижулев, мехтулев чиги сардилъин мехтулев.

⁸ Амма къоялъ гвангъизарун ругелъул, иманалъулги рокьулги къолденги ретӏун, хвасарлъизе рукӏиналде хьулалъул такъияги лъун, ригьун рукӏине риччанте нилъ!

⁹ Жиндирго ццин нилъеде рещтӏине гурелъул Аллагьас нилъ тӏаса рищун ругел, нилъер Тӏадегӏанав Гӏиса Масихӏидалъун нилъ хвасар гьаризелъидал.

¹⁰ Гьев нилъее гӏоло хвана, жив вачӏараб мехалъ хун ратаралги чӏаго ратаралги, жиндаго релълъун чӏаго рукӏине.

¹¹ Гьединлъидал цоцазул ракӏбатизабе ва цоцазе квербакъе. Нужеца гьедин гьабулебги буго.

Ахирисел насихӏатал

¹² Нужер агьлуялъе имамлъи гьабун ва Тӏадегӏанасул рагӏул вагӏза-насихӏат гьабун захӏмат баччулеб бугезул адаб тогейилан гьарула, вацал, нужеда.

¹³ Гьез бахъулеб бугеб хӏаракаталъухъ цӏикӏкӏун рокьизе ккола нужее гьел ва гьезул хӏурмат-хъатирги гьабизе ккола. Нужедаго гьоркьор лъикӏ рукӏа!

¹⁴ Нижеца нужеда гьарулеб буго, вацал: кӏвахӏалазда рагӏи абе, хӏинкъаразул ракӏбатизабе, загӏипазда квер чӏвай, киназдехунго сабруялда рукӏа.

¹⁵ Вореха, нужер цонигияс квешлъи квешлъиялдалъун бецӏизе гурин. Нужеца кидаго хӏаракат бахъе цоцазеги цогидал гӏадамазеги лъикӏлъи гьабизе.

¹⁶ Кидаго рази-ракиго рукӏа.

¹⁷ Кидаго гьари-дугӏаялда тӏадчӏа.

¹⁸ Сундулъго Аллагьасе рецц гьабе. Аллагьасе бокьун буго, гьел амруялги тӏуразарун, Масихӏ Гӏисаде цолъараб гӏумру нужеца гьабизе.

¹⁹ Илагьияб Рухӏалъул цӏа свине биччаге.

²⁰ Аллагьасул илгьамги нахъчӏваге.

²¹ Киналъулго хӏалбихье, лъикӏабги ккун чӏа.

²² Кинабгоги квешлъиялдаса цӏуне нужго.

Кагътил ахир

²³ Нилъ ракълиде рачарав Аллагьас тӏубанго рацӏцӏад гьареги нуж, нужер тӏолабго чӏаголъи: рухӏги, напсги, черхги – нилъер Тӏадегӏанав Гӏиса вачӏиналде бацӏцӏадго букӏине.

²⁴ Нуж тӏаса рищарав Аллагьас гьедин гьабизеги гьабила, гьев рагӏи холарев вугелъул.

²⁵ Нижги дугӏадулъ рехсе, вацал.

²⁶ Киналго вацазда, ракӏ-ракӏалъго баун, салам гьабе.

²⁷ Аллагьасул амруялдалъун дица нужеда лъазабулеб буго гьаб кагъат киналго вацазе цӏалейилан.

²⁸ Нилъер Тӏадегӏанав Гӏиса Масихӏил баркат лъеги нужеда!