Фессалоникиязухъе тӀоцебесеб кагъат 2 - Инжил

2 бетӏер Павелги фессалоникиялги

¹ Нужедаго лъала, вацал, ниж гьенире рачӏин гӏадада ккечӏеблъи.

² Гьенире рачӏиналде Филиппиялда нижее кьураб гӏазабги гьабураб инжитлъиги лъала нужеда, бугониги гьениб кутакаб дандечӏейги къинабун, нижеца иман лъурав Аллагьас нижер ракӏал къвакӏизаруна, гьесдасан бачӏараб Рохалил хабар нужееги бицине букӏине.

³ Нижер рагӏабазулъ я гьереси, я хъублъи, яги рекӏкӏ гьечӏо.

⁴ Рохалил хабар тӏибитӏизабизе мустахӏикъал гӏадамаллъун Аллагьас ниж рикӏкӏиндалин нижер рагӏаби гьединал ругел. Гӏадамал разилъи гуреб, нижер ракӏазул хӏалбихьулев Аллагь разилъи буго нижер мурад.

⁵ Гьересияб рецц-бакъалъул рагӏабигун рачӏинчӏо ниж гьенире, ва боцӏи-рикъзиялде хъантӏиги бахчун букӏинчӏо нижер рагӏабазулъ. Гьеб нужедаги лъала, Аллагьги вуго гьелъие нугӏлъун.

⁶ Нижеца гӏадамаздаса рецц-бакъ тӏалаб гьабичӏо – я нужедаса, яги цогидаздаса.

⁷ Масихӏил чапарзаби ругилан нужер гьодиде гьир ккезабизе бегьилаан нижеца. Амма каранда хахулеб лъимер бугей эбел гӏадин, цӏакъ хӏеренго хьвадана ниж нужеда гьоркьор.

⁸ Нуж нижее цӏакъ рокьана! Рохалил хабар нужехъе кьей гуребги, нужее гӏоло рухӏ кьезеги разилъилаан ниж. Гьедигӏанги хиралъана нуж нижее.

⁹ Нужеда ракӏалда батила гьениб нижеда бихьараб захӏмат-гӏакъуба: нужер лъиданиги тӏад раччун рукӏинарилан, къаси-къад чӏечӏого хӏалтӏана нижерго бетӏербахъиялъе ва нужеда Илагьияб Рохалил хабарги лъазабуна.

¹⁰ Нужги Аллагьги нугӏзаллъун руго иман лъурал нужедехун нижер букӏараб ракӏбацӏцӏалъиялъеги, ритӏухълъиялъеги, гӏайиб-хатӏа ккезе биччачӏолъиялъеги.

^11-12 Гьединго нужеда лъала, нуж жиндирго Парччахӏлъиялъулги машгьурлъиялъулги бутӏа босизе ахӏарав Аллагь разилъиледухъ хьвадейилан, инсуца васасда гӏадин, нужер щивасда нижеца бицараблъи, гьарараблъи, ракӏгьесизабураблъи.

¹³ Нижеца кидаго Аллагьасе рецц гьабула, нижеца нужеда Аллагьасул рагӏи бицараб мехалъ, гьелъухъ гӏенеккун, нужеца гьеб инсанасулаблъун гуреб, Аллагьасулаблъун къабул гьабидал. Гьединаб бугизеги буго гьеб. Божи-иман букӏиналъин Аллагьасул ишал нужелъ загьирлъулел.

¹⁴ Аллагьасде ва Гӏиса Масихӏиде иман лъуразул Ягьудиялда ругел жамагӏатазе ккараб ккана, вацал, нужееги, Ягьудиялъул жугьутӏаз гьезие кьураб гӏадинаб гӏазаб-гӏакъуба кьуна нужееги нужерго халкъалъ.

¹⁵ Жугьутӏаз чӏвана Тӏадегӏанав Гӏисаги аварагзабиги, нижги гьез нахъе гъуна. Аллагьги гьез рази гьавуларо, киналго гӏадамазда дандечӏунги руго гьел!

¹⁶ Хвасарлъулеб хабар цогидал халкъазда бицине нижее квекӏен гьабуна жугьутӏаз. Гьелдалъун тӏубанго камиллъана кидаго гьез гьарурал квешлъаби! Ахирги Аллагьасул ццин бахъин рещтӏана гьезде.

Тимофей Фессалоникаялде витӏула

¹⁷ Доб мехалъ нужедаса ратӏалъизе ккедал, – нижго рикӏкӏалъаниги, ракӏалда нужгун рукӏиндал, – нуж рихьизе дагьабги цӏикӏкӏун хӏаракат бахъулеб букӏана, вацал, нижеца.

¹⁸ Гьединлъидал нужехъе рачӏине къачӏан рукӏана ниж, – дун Павелги чанцӏулго къачӏан вукӏана, – амма илбисалъ квалквал гьабуна нижее.

¹⁹ Нилъер Тӏадегӏанав Гӏиса Масихӏ вачӏараб мехалъ, гьесда цебе, нуж гурони, щал нижее кколел нижер хьуллъунги, рохеллъунги ва рецц-бакъалъул тажлъунги?

²⁰ Нуж руго нижер чӏухӏиги рохелги!