Иоаннил тӀоцебесеб кагъат 5 - Инжил

5 бетӏер Дуниялалда тӏад бергьенлъи босула

¹ Гӏиса Масихӏлъун вукӏиналда божаравщинав чи Аллагьасдасан лъугьарав вуго. Жинца гьавурав вокьулевщинасе жив гьавуравги вокьула.

² Нилъее Аллагь вокьиялдалъунги ва гьесул амраби тӏуразариялдалъунги лъала Аллагьасул лъималазде нилъер рокьи.

³ Аллагьасде рокьи кколелъулха гьесул амраби нилъеца тӏуразари. Гьесул амраби захӏматал гьечӏо.

⁴ Аллагьасдасан лъугьаравщинав дуниялалдаса бергьуна! Дуниялалда тӏад босараб бергьенлъи – гьеб ккола нилъер божи-иман.

⁵ Гӏиса Аллагьасул Вас вукӏиналда божарав чиясда гурони, цоги лъидаха кӏвелеб дуниялалда тӏад бергьенлъи босизе!

⁶ Гӏиса Масихӏин вачӏарав лъимгун ва бигун, цохӏо лъимгун гурев, лъимгун ва бигун вачӏана гьев. Гьелъие Рухӏалъ нугӏлъи гьабула, Рухӏ хӏакъаб бугелъул.

⁷ Лъабго нугӏги бугелъул:

⁸ Рухӏги, лъимги, биги. Гьеб лъабабгоги цойихъан руго.

⁹ Гӏадамазул нугӏлъицин нилъее гӏолеб бугеб мехалда, Аллагьасул нугӏлъи дагьабги кӏудияб буго. Аллагьасул нугӏлъиялъул магӏна ккола жиндирго Васасул хӏакъалъулъ гьес жинцаго нугӏлъи гьабулеб букӏин.

¹⁰ Аллагьасул Васасда божулесулъ жиндилъго буго гьеб нугӏлъи. Аллагьасда божуларев чияс Аллагь гьереси гьавулев вуго, жиндирго Васасул хӏакъалъулъ Аллагьас гьабураб нугӏлъиялда гьев божичӏелъул.

¹¹ Аллагьас нилъее кьураб абадияб гӏумруялъул хӏакъалъулъги буго гьеб нугӏлъи. Гьесул Васасулъин гьеб гӏумру бугеб.

¹² Аллагьасул Васгун цолъарав чиясе гӏумру буго, гьевгун цолъичӏесе гӏумру гьечӏо.

Ахирисел насихӏатал

¹³ Аллагьасул Васасда божулел нужехъе дица гьаб хъвана нужее абадияб гӏумру насиблъун бугеблъи лъан букӏине.

¹⁴ Аллагьасда цебе нилъее хӏинкъи гьечӏолъи сундалъунха лъалеб? Гьесул изнуялдалъун нилъеца щиб гьараниги, гьесда гьеб рагӏула.

¹⁵ Нилъеца гьарарабщинаб гьесда рагӏулеб букӏин нилъеда лъани, нилъеда лъала гьарарабщинаб гьесдасан щвезе букӏинги.

¹⁶ Хвалде рачунеб хутӏун, цогидаб мунагь вацас гьабулеб бихьани, гьесул рахъалъ дугӏа гьабе, ва Аллагьас гьесие абадияб гӏумру кьела. (Хвалде рачунебги буго мунагь; гьелъул рахъалъ дугӏа гьабиялъул гуро дица бицунеб бугеб.

¹⁷ Кинабго квешлъи гьаби мунагь ккола, амма хвалде рачунареб мунагьги букӏуна.)

¹⁸ Аллагьасдасан лъугьарас мунагь гьабулареблъи лъала нилъеда, Аллагьасул васас гьев цӏунулелъул! Илбисалдаги кӏоларо гьесда хъатӏизе.

¹⁹ Нилъеда лъала нилъ Аллагьасдасан лъугьун ругеллъи ва тӏолабго дуниялги илбисалъул кверщаликь бугеблъи.

²⁰ Нилъеда лъала вачӏун Аллагьасул Васас нилъее Хӏакъав лъазе гӏакълу кьураблъиги. Нилъги руго Хӏакъавгун ва гьесул Вас Гӏиса Масихӏгун цолъун. Гьев вуго хӏакъав Аллагь ва абадияб гӏумру.

²¹ Гьересиаллагьзабаздаса цӏуне, дир лъимал, нужго!