Иоаннил тӀоцебесеб кагъат 3 - Инжил

3 бетӏер

¹ Нилъ Аллагьасул лъимал ругилан абизе ва хӏакъикъаталдаги гьеллъун рукӏинеги Инсуца нилъее кьун бугеб рокьиялъухъ балагье нуж. Гьаб дуниялалъул гӏадамазда Аллагь лъаларелъул, нилъги рикӏкӏунел гьечӏо гьез.

² Гьанже нилъ Аллагьасул лъимал руго, дир хириял, амма щаллъун нилъ рукӏинелали жеги загьирлъун гьечӏо. Амма нилъеда лъала, Масихӏ вачӏараб мехалда, нилъ гьесда релълъунеллъи, кинав вугевали гьев нилъеда вихьизе вугелъул.

³ Гьев вацӏцӏадав вугелъул, гьевго гӏадин вацӏцӏалъула гьединаб хьул гьесде лъунщинавги.

⁴ Мунагь гьабулевщинас къанунги хвезабула, къанун хвезаби бугелъулха мунагьги.

⁵ Нужеда лъала Масихӏ нилъер мунагьал чуризе гӏоло загьирлъаравлъи ва гьесда мунагь гьечӏеблъиги.

⁶ Гьесде цолъун вугевщинас мунагь гьабуларо, мунагь гьабулевщинасдаги гьев вихьунги лъанги гьечӏо.

Нужго къосинаризе гурин

⁷ Лъицаниги нужго къосинаризе гурин, дир лъимал: Масихӏ ритӏухъав вугев гӏадин, ритӏухъав вукӏуна ритӏухъабщинаб гьабулевги.

⁸ Мунагь гьабулевги илбисалъул рахъалда вуго, авалалдаса бахъарабго мунагь гьабулеб бугелъул гьеб. Илбисалъул ишал хвезаризейин Аллагьасул Вас загьирлъарав.

⁹ Аллагьасдасан лъугьаравщинас мунагь гьабуларо, гьесулъ Аллагьасул тӏабигӏат бугелъул. Гьесда мунагь гьабизе кӏоларо, гьев Аллагьасдасан лъугьун вугелъул.

¹⁰ Гьеле гьелдалъун ратӏа гьаризе лъала Аллагьасул лъималги илбисалъул лъималги: ритӏухъаб гьабуларевщинавги ва жиндирго вац вокьуларевщинавги Аллагьасдасан гуро.

Цоцазе рокьа нуж

¹¹ Авалалдасанго нилъехъе амру бачӏун букӏиндалха нилъ цоцазе рокьайилан.

¹² Илбисалда нахъвилълъун жиндирго вац чӏварав Къабил гӏадин рукӏунге. Щай гьес вац чӏварав? Гьесул ишал квешал рукӏиндал ва вацасул ишалги ритӏухъал рукӏиндал чӏвана.

¹³ Гьединго гьаб дуниялалъе нуж рокьунгутӏиялда гӏажаиблъуге, вацал.

¹⁴ Нилъеда лъала нилъ хвалдаса гӏумруялде рачӏараллъи ва гьебги загьирлъана вацал рокьиялдалъун. Рокьуларев – хвалил кверщаликь хутӏула.

¹⁵ Жиндирго вац вокьуларевщинав ккола чи чӏвалев чи. Нужеда лъала чи чӏвалев цониги чиясулъ абадияб гӏумру хутӏулареблъиги.

¹⁶ Нилъее гӏоло гьес жиндирго рухӏ кьеялдалъун лъана нилъеда Масихӏил рокьи, нилъецаги вацазе гӏоло рухӏ кьезе ккола.

¹⁷ Дуниялалъул бечелъи жиндир бугев чиясда жиндирго вац мискинго вихьидал гьев кьурун вуссунев вугони, Аллагьасде рокьи гьесулъ кисаха букӏинеб?

¹⁸ Рачӏа, дир лъимал, нилъго цоцазе рокьилин, рагӏудалъунги кӏал-мацӏалдалъунги гуреб, ишалдалъунги ва хӏакъабщиналдалъунги.

^19-20 Гьединин нилъеда лъалеб нилъ хӏакъабгун рукӏин ва гьединин, нилъерго намусалъ нилъеда гӏайиб чӏвалеб мехалда, Аллагьасда цебе нилъеца ракӏалги парахалъизарулел. Аллагь нилъер намусалдаса тӏадегӏанав вугелъул ва гьесда кинабго лъалелъул!

²¹ Нилъер намусалъ нилъеда гӏайиб чӏвалеб гьечӏони, Аллагьасда цебе нилъер ракӏ сородуларо.

²² Нилъеца гьесул амрабиги тӏуразарулелъул ва гьесие бокьарабги гьабулелъул, щиб гьараниги щола нилъее гьесдасан.

²³ Гьесул амру буго нилъ гьесул вас Гӏиса Масихӏида божайилан ва Масихӏица нилъеда лъазабураб куцалда цоцазе рокьайиланги.

²⁴ Жиндир амру тӏубазабулев чи Аллагьас жиндего цолъизавула, живго гьев чигун цолъула. Гьес нилъее кьураб Рухӏ нилъелъ букӏин бихьунин нилъеда лъалеб гьев нилъгун цолъун вугевлъи.