Коринфиязухъе тӀоцебесеб кагъат 7 - Инжил

7 бетӏер Ригьиналъул хӏакъалъулъ насихӏатал

¹ Гьанже дица бицина нужеца дихъе кагътида хъван букӏаралъул хӏакъалъулъ. Чӏужугӏаданалда аскӏове къачӏого вукӏинго лъикӏ бихьинчиясе.

² Амма пасалъи цӏикӏкӏун бугелъул, щивав бихьинчиясул жиндирго лъади йикӏун лъикӏ, щияй чӏужугӏаданалъулги жиндирго рос вукӏун лъикӏ.

³ Росас лъади бусада жиндасаго рикӏкӏалъизайизе бегьуларо, лъадиялъ росги бегьуларо.

⁴ Жиндирго черхалъул кверщел лъадиялъухъ гуро бугеб, росасухъ буго. Гьединго жиндирго черхалъул кверщел росасухъ гуро бугеб, лъадиялъухъ буго.

⁵ Кӏиялго разилъун, Аллагьасе гьари-дугӏаялъе цодагьабго заманаялъ гурони, цоцаздаса ратӏалъуге. Цинги нахъеги цадахъ рукӏа. Гьедин хьвадани, илбисалда кӏвеларо, чорхол гьава къинабизе кӏолеб гьечӏолъи бихьун, нуж къосинаризе.

⁶ Гьаниб дица нужее амру гьабулеб гьечӏо гьедин гурони бегьуларилан. Нужее бигьалъи гьабулеб буго.

⁷ Гьайгьай, дие бокьилаан киналго гӏадамал дун гӏадин чӏолелани. Амма Аллагьас щивасе гьунар кьун буго: цоясе гьадинаб, цогидасе додинаб.

⁸ Къороллъун хутӏарал бихьиназдаги руччабаздаги дица абилаан, дун гӏадин, ялгъузго рукӏайилан.

⁹ Къороллъи хӏехьезе кӏолеб гьечӏони, ригьин гьабизе ккела. Ригьнаде руссинго лъикӏ, хӏасраталъ рухӏизегӏан.

¹⁰ Ригьнада ругезени, дица гуреб, Тӏадегӏанас гьабулеб буго амру: лъади росасдаса ятӏалъизе бегьуларо.

¹¹ Нагагь ятӏалъани, ялгъузго йикӏине ккела яги росгун рекъезе ккела. Росасги лъади йиччан тезе бегьуларо.

¹² Цогидаздани, Тӏадегӏанас гуреб, дица абулеб буго: диналъул вацасул лъади иман лъечӏей йигони, амма росасда цадахъ чӏезе къабуллъулейги йигони, къватӏие йитӏуге гьей.

¹³ Чӏужугӏаданалъул рос иман лъечӏев вугони, гьелда цадахъ чӏезеги разилъулев вугони, ятӏалъуге гьесдаса.

¹⁴ Иман лъечӏев росасдаса Аллагь разилъула гьесул иман лъурай лъади сабаблъун. Иман лъечӏей лъадиялдасаги Аллагь разилъула гьелъул иман лъурав рос сабаблъун. Гьедин букӏунаребани, гьезул лъималги мажусиязулго гӏадинал рукӏинаан. Гьедин бугелъул, гьел лъималаздасаги Аллагь разилъула.

¹⁵ Иман лъечӏев росасе яги лъадуе ратӏалъизе бокьани, риччанте ратӏалъизе. Гьедин кколеб бугони, диналъул вацасда яги яцалда тӏадаб гьечӏо жидерго ригьин цӏунизе. Аллагьасни рекъон рукӏайилан абулеб буго.

¹⁶ Дуда щиб лъалеб, лъади, дурго рос хвасар гьавизе дуда кӏоларевлъи? Дуда щиб лъалеб, рос, дурго лъади хвасар гьайизе дуда кӏоларейлъи?

¹⁷ Амма нужер щивав вукӏине виччанте Тӏадегӏанас гьесие бихьизабураб хӏалалда, гьев хутӏизе виччанте Аллагьас гьев жиндихъего ахӏараб куцалда. Гьединабго амру гьабула дица кинабго иман лъуразул агьлуялъеги.

¹⁸ Сунат гьабурав вугони Аллагьас ахӏун, гьеб балъго гьабизе ккеларо. Сунат гьабичӏев ахӏун вугони, сунат гьабизеги ккеларо гьес.

¹⁹ Сунат гьабиги – рикӏкӏунаро, сунат гьабичӏолъиги – рикӏкӏунаро, Аллагьасул амруял тӏуразари буго аслуги кьучӏги!

²⁰ Аллагьас кинавлъун инсан жиндихъего ахӏаниги, гьединавлъун хутӏизе виччанте гьев.

²¹ Гьес ахӏараб мехалъ мун лагълъун вукӏарав ватани, гьелъулги пикру гьабуге дуца. Амма тархъанлъизе рес бугони, гьелъие гӏамал гьабе.

²² Тӏадегӏанас жиндихъего ахӏарав лагъ Тӏадегӏанасда цеве эркенав чилъун ккола, эркенго вукӏаго ахӏаравги Масихӏил лагъ ккола.

²³ Аллагьас цӏикӏкӏараб мухьги кьун росун ругелъул, гӏадамазул лагъзаллъун ккезе чӏоге!

²⁴ Кинавлъун гьес жиндихъего ахӏаниги, гьединавлъун хутӏизе виччанте, вацал, гьев Аллагьасда цеве!

Ригьин гьабичӏезулги къоролзабазулги хӏакъалъулъ

²⁵ Росасе инчӏел ясазул рахъ цӏехани, гьелъул рахъалъ Тӏадегӏанасдасан бачӏараб амру гьечӏо дихъ. Амма дица дирго пикру бицина, Аллагьасул баркаталдалъун дунги вугелъулха божизе бегьулев чи.

²⁶ Захӏматаб заман бугелъул, живго вугеб хӏалалъ чӏейго лъикӏ чиясе.

²⁷ Лъади ячун йигищ – йиччан тоге. Ячун гьечӏищ – гьей ялагьизе лъугьунге.

²⁸ Амма лъади ячинги мунагь гуро. Гӏурай яс росасе инги мунагь гуро. Амма ригьнаде руссиндал, гьаб дуниялалъул къварилъи-захӏмалъи рещтӏина нужеде. Дие бокьилаан гьелдаса нуж цӏунизе.

²⁹ Дие бокьун буго, вацал, нужеда абизе, гьаб дуниялалъе заман дагьлъун бугилан. Лъудби рачаралги хьвадизе ккела лъудбиго гьечӏел гӏадин.

³⁰ Гӏодулел ругелги хьвадизе ккела гӏодулелго гьечӏел гӏадин. Рохун ругелги хьвадизе ккела рохунго гьечӏел гӏадин. Босаралги хьвадизе ккела жидеца щибго босичӏеб гӏадин.

³¹ Дуниялалъул ишазде машгъуллъаралги хьвадизе ккела гьезде машгъуллъунго гьечӏел гӏадин. Гьаб дуниял тӏагӏун инехъин бугелъулха!

³² Дие бокьун буго нуж сундулго ургъел гьечӏого рукӏине. Лъади гьечӏев чи Тӏадегӏанасе гьабулеб тӏагӏаталъул ургъалида вукӏуна, Тӏадегӏанав разилъи тӏалаб гьабула гьес.

³³ Лъади йигев чи дуниялалъул ургъалида вукӏуна, лъади разилъи тӏалаб гьабула гьес.

³⁴ Гьедин кӏийиде викьун вукӏуна лъади ячарав чи. Росасе инчӏей чӏужугӏадан яги гӏолохъанай яс Тӏадегӏанасе гьабулеб тӏагӏаталъул ургъалида йикӏуна, гьесда цебе черхги ракӏги бацӏцӏадго цӏунизе. Рос вугей чӏужугӏадан дуниялалъул ургъалида йикӏуна, рос разилъи тӏалаб гьабула гьелъ.

³⁵ Дица гьеб кинабго абулеб буго нужее лъикӏлъиялъе. Щибниги жо нужее гьукъизе гуро дун кӏалъалев вугев. Дие бокьун буго гьениб нужер ишазулъ гӏадлу-тадбир букӏине ва сундего машгъуллъичӏого нужеца Тӏадегӏанасе хъулухъ гьабизе.

³⁶ Лъицаниги рикӏкӏунеб бугони абурай яс ячинчӏого тезе рекъараб гьечӏилан, гьелдехун бугеб хӏасратги къезабизе кӏолеб гьечӏони, биччанте гьес жиндирго рекӏее бокьараб гьабизе. Гьей ячани гьев мунагьалъукье кколаро.

³⁷ Амма гьей ячине сунцаниги тӏамулев гьечӏони, ячинчӏого тезе кьури гьечӏеб хӏукмуги гьабун бугони, жиндирго хӏасраталда квелъ базеги кӏолеб бугони, – гьеб лъикӏ ккела.

³⁸ Хӏасил: жиндирго абурай ячин лъикӏ буго, амма ячинчӏого тани, дагьабги лъикӏ.

³⁹ Лъади ригьнада хутӏула гьелъул рос чӏаго вугевгӏан заманалда. Рос хвани, гьелъул ихтияр буго жиндиего бокьарав чиясе ине. Амма Гӏисаде иман лъурав чи вукӏине ккела гьев.

⁴⁰ Къороллъудаго чӏани, гьей жеги талихӏай йикӏина. Гьединаб буго дир пикру, Аллагьасул Рухӏ щварав чи вугилан ккола дун.