Коринфиязухъе тӀоцебесеб кагъат 10 - Инжил

10 бетӏер Гьересиаллагьзабазде иман лъеялдаса цӏуне

¹ Дие бокьун буго, вацал, нужеда ракӏалде щвезабизе: Мисриялдаса нахъе унеб мехалда нилъер киналго умумул накӏкӏул рагӏдукь ккун рукӏана, киназго ралъадги бахана.

² Киналго гьел Мусада нахърилълъун накӏкӏуцаги ралъдацаги чурана.

³ Гьез киназго кванана цого-цо илагьияб квен,

⁴ цого-цо илагьияб гьекъелги гьекъана гьез. Илагьияб кьурулъан чвахун бачӏараб лъим гьекъана гьез. Гьеб кьуру гьезда цадахъ букӏана. Масихӏ ккола гьеб.

⁵ Амма гьезул гӏемерисез Аллагь рази гьавичӏо – гьезул жаназаби авлахъалда щущана.

⁶ Гьеб буго нилъее мисал – гьел гӏадин нилъ квешлъиялда нахърилълъинчӏого рукӏине.

⁷ Гьезул цо-цояз гӏадин аллагьалилан тарал жалазе лагълъи гьабуге нужеца. Тӏухьдузда хъван бугелъулха: «Гӏодор чӏун кваназе-гьекъезе лъугьана халкъ, цинги аллагьилан тараб жоялъул хӏурматалда пасатабщинабги хъубабщинабги гьабизе лъугьана».

⁸ Гьезул цо-цояз гӏадин хъахӏбалъи гьабиларин нилъеца. Гьез хъахӏбалъи гьабуна – ва цохӏо къоялъ гьезул къоло лъабазарго чи хвана.

⁹ Гьезул цо-цоял гӏадин, Бетӏергьанасул хӏалбихьизе лъугьинарин нилъ. Гьел хвана борхьаз хӏанчӏун.

¹⁰ Гьезул цо-цоял гӏадин, Аллагьасде дандечӏун, гъулгъудизе бегьуларо нилъ. Гьеб сабаблъун хвалил малаикас хвезаруна гьел.

¹¹ Гьеб киналъулго хӏакъалъулъ Тӏухьдузда хъван буго нилъее гӏакълу щвеялъе гӏоло. Ахирзаманаялде гӏагарлъулел ругелъулха нилъ.

¹² Гьединлъидал, вахъун чӏун вугилан ккарав гӏодов ккезе гурин.

¹³ Гӏадамазда гьоркьоб букӏунеб гурони гӏазаб-балагь рещтӏинчӏо нужеде. Аллагьас жиндирго къотӏи хвезабуларо – хӏехьезе кӏолареб гӏазаб-балагь биччаларо гьес нужеде. Гӏазаб-балагьалда цадахъго гьес нужее бихьизабила гьеб хӏехьезе ресги.

¹⁴ Гьединлъидал, дир хириял, гьересиаллагьзабазе лагълъи гьабиялдаса рикӏкӏалъе.

¹⁵ Гӏакъилал гӏадамазда гӏадин бицунеб буго дица нужеда. Нужецаго пикру гьабе дица бицаралъул.

¹⁶ Тӏадегӏанасул хӏурматалда нилъ гӏодор чӏун сардилъ кванала ва, гьари-дугӏа гьабун, щурминиса чагъирги гьекъола, – гьелъул магӏна ккола Масихӏица тӏураб бидулъ нилъерги бутӏа букӏин. Кваналаго нилъеца чед бекиялъул магӏна ккола Масихӏил чорхолъги нилъер бутӏа букӏин.

¹⁷ Гьеб чед цо бугелъул, нилъ гӏемер ругониги, цохӏо черх лъугьуна. Нилъеца кинацаго цохӏо чед цоцазе бикьун кваналелъулха!

¹⁸ Исраилил халкъалъухъ балагье: къурбаналъе хъураб жо кваналелщиназ жидерго бутӏа лъолагури гьез гьабулеб тӏагӏаталъулъ.

¹⁹ Щиб абизе дие бокьун бугеб: гьересиаллагьзабазе гьабулеб къурбан магӏнаяб жо бугиланищ? яги гьересиаллагь магӏнаяб жо бугиланищ?

²⁰ Гуро! Дие абизе бокьун буго: мажусиязул къурбан гьез Аллагьасе гуро гьабулеб, жундузе гьабула. Дие бокьун гьечӏо нужеца жундузулгун гьоркьоблъи гьабизе.

²¹ Цин Тӏадегӏанасул щурминисан, цин жундузул щурминисан гьекъезе бажариларо нужехъа. Цин Тӏадегӏанасул столалдасан, цин жундузул столалдасан кваназеги бажариларо.

²² Бетӏергьанасул ццин бахъинейищ нужее бокьун бугеб? Гьесдаса къуваталищ нилъ ругел?

²³ «Бокьарабщинаб гьабизе бегьула», – ян абула цо-цояз. Амма бокьарабщиналъул гуро пайда бугеб. «Бокьарабщинаб гьабизе бегьула». Амма бокьарабщиналъ гуро кумек гьабулеб.

²⁴ Биччанте щивав чи жиндиего пайдаялъе гуреб, гӏагарда вугесе пайдаялъе хӏалтӏизе.

²⁵ Нужеца базаралдаса гьан босе щибго цӏехечӏого ва хӏинкъичӏого кванай.

²⁶ Тӏухьдузда хъван бугелъулха: «Ракьги ракьалда бугебщинабги Бетӏергьанасулин».

²⁷ Иман лъечӏев чияс мун гьоболлъухъ ахӏани, ине ракӏалде ккани, дудаго цебе лъураб жо кванай щибго цӏехечӏого ва хӏинкъичӏого.

²⁸ Мажусиязул къурбаналъул бугин гьеб квенилан дуда лъицаниги абуни, дуца гьеб кванаге, дуда гьеб абурав чи гӏодове виччазавизе.

²⁹ Гьеб кваназе мун хӏинкъиялъул гуро дица бицунеб бугеб, гьев хӏинкъун вукӏиналъулин. Цо лъицаниги гьикъани: «Цогидасул хӏинкъи сабаблъун диего бокьараб гьабичӏого тезе щай дица кколеб?

³⁰ Аллагьасе реццги гьабун дица гьеб квани, лъица дида гӏайиб чӏвалеб, Аллагьасе рецц гьабун дун квананилан?»

³¹ Щиб гьабулел ругониги – кваналел ругониги, гьекъолел ругониги, – Аллагьасе рецц гьабичӏого тоге.

³² Жугьутӏалги, грекалги, Аллагьасде иман лъуразул агьлуги къосинариларедухъ хьваде нуж.

³³ Диего пайдаялъе гуреб, гьел хвасарлъизе гӏологи гӏемеразе пайдаялъе гӏологи хӏалтӏулев дун гӏадин хьваде.