Yohan 9 - KUNYANYA VUVU YƆ

Yesu ayɔni ɔnɔ gi bɛpɔ kaŋupo e

¹ Agi Yesu azɛɛga aza ɛ, amɔ onyime ɔtɔ gi bɛpɔ kaŋupo e.

² Yɛ badɔkpasi ba beʋi Yesu si, “Ɔdɔbasɛ yɛ, nyaŋwɛ eboe zimizi ɛki si bapɔ yɛ kaŋupo o? Yɛ ɔtutɔ yɛ eboe zimizi na loo yɛ bapɔnɛ ba anɛ na a?”

³ Yesu ebu le onu si, “Yɛ kaŋupo kuzeze e, kúdɔ yɛ loo yɛ bapɔnɛ ba eboe zimizi kubitɛ mɛ ɛ. Boŋu i, onu kaŋupo tɔ Aya yɛ kigaglaɛ kɛ axwɛwawa la aŋwi gani yɛ ligbã́ nɛ mɛ.

⁴ Gi kelea kaʋíblo e, lilɛ si kuze ní axwɛwawa aʋa kí ɔniliɛ gi yɛ akpɛ mɛ ɛ; elesi la ɛtrába gi ɔnɔnɔ ɔ́tratani axwɛ kuwa a.

⁵ Gi malɛ ní kelea mɛ ɛ, mɛ menu kuklekle aki kelea mɛ banima.”

⁶ Gi apani nite pɔ́ ɛ, Yesu ebu sita sɛ aplɛ kesea lɛ apita livɔ lɛ ni sɛ ɛ; lɛ akɔ livɔ lɛ asra ní onyimee yɛ bimbi ʋe aʋa ɛ.

⁷ Lɛ apani si, “Trɛ tɔ zeplo wɔ aŋu na mɛ ní Siloa limu ne me.” Siloa yɛ ese linu si, “Ɔnɔ gi bɛ kpɛ ɛ.” Lɛ onyimee atrɛ ɛ, xe azeeplo yɛ aŋu na mɛ ɛ, lɛ yɛ bimbi ʋe bidra a, xe edzi aba kepea mɛ ɛ.

⁸ Yɛ axolika ba, ni banama gi bɛmɔ yɛ edi si eze ɔdɔʋi i, beʋi si, “Aní onyime liɛ ya azeeze xe azeeʋi bidɔ mɛ ɛ?”

⁹ Banɔatɔ bɛpani si, “Yɛ iliɛ klɔ,” pɔ̀ batɔ fɛ si, “Owo aní yɛ; ɔniliɛ ya ɛ, kiyi eyi ye.” Lɛ onyimee ɔtutɔ lɔ edu ɔkli kese si, “Mɛ menu onyimee.”

¹⁰ Beʋi ye si “Kitɛ lize xe wɔɛtani kumɔ ablɔ kɔ ɔ?”

¹¹ Ebu le onu si, “Onyime liɛ gi bɛɛxwa si Yesu i, yɛ apita livɔ lɛ, xe akɔ asra mɛ bimbi ʋe aʋa, lɛ asi mɛ si mitrɛ ní Siloa tɔ mizeeplo mɛ aŋu na mɛ ɛ. Nite si matrɛ, lɛ kiliɛ gi meplo la mɛ ko e, mekpese kumɔ.”

¹² Beʋi si, “Yɛ xwɛ?” Ebu le onu si, “Méte e.”

Farisianɛ ma bɛpami kaŋupoa kumɔmɔ mɛ

¹³ Lɛ bɛgbani onyimee gi eze kaŋupo e, ɛtsini Farisianɛ ma ɛ.

¹⁴ Liwe lɛ aʋa gi Yesu apita livɔ lɛ ɛ, xe akɔ adra kaŋupoa bimbi ʋe e, lize Lizemɔniwe.

¹⁵ Lɛ Farisianɛ ma kyɛ beʋi onyimee dzɛ kiliɛ gi lize e, xe ekpese kumɔ ɛ. Asi ba si, “Asra livɔ ní mɛ bimbi ʋe aʋa; Me plo mɛ aŋu na mɛ, lɛ abla ɛ mɛɛmɔ ɔ.”

¹⁶ Farisianɛatɔ bɛpani si, “Ɔniliɛ gi abitɛ liboe lɛ ya ɛ, ɔ́tratani Aya kɔ kudɔ ɔ, lɛ ese linu si óbu Lizemɔniwe le lɛ ɔsã nɔ ɔ.” Batɔ pɔ̀ bɛpani si, “Kitɛ ɔnɔ zimizi aabitɛ enugutseboe a la ya elu u?” Lɛ kulɛlɛ kwiku ba kusi i.

¹⁷ Lɛ loso Farisianɛ ma beʋi onyimee dzɛ si, “Wɔsi yɛ adra wɔ bimbi ʋe, liboe woli wɔapani ní yɛ su u?” Onyimee ebu le onu si, “Onu Aya yɛ Oboedoplɛ.”

¹⁸ Yudanɛ ma, bázɛpɛ si bɛɛzi lɛ aʋa ɛɛŋa si eze kaŋupo edi pɔ̀ abla ɛ, ɛɛtani kumɔ, kɔkpɛni lipoe lɛ gi bɛxwa yɛ bapɔnɛ ba a.

¹⁹ lɛ beʋi ba si, “Mlɔ obinyime liɛ ya na a? Mlɔ si bɛpɔ yɛ kaŋupo; kitɛ lilɛ xe abla kɔ ɛɛmɔ ɔ?”

²⁰ Yɛ bapɔnɛ ba bebu le onu si, “Kwite si onu blɔ obinyime, lɛ kwite si bɛpɔ yɛ kaŋupo o.

²¹ Pɔ̀ kúte kiliɛ gi lize e, xe ɛɛmɔ ablɔ kɔ ɔ, lɛ kúte ɔniliɛ gi yɛ adra yɛ bimbi ʋe e. Mleʋi ye; etsi gi aatani isu unu kubu u!”

²² Yɛ bapɔnɛ ba bɛpani nite lɛ ese linu si bezeese Yudanɛ ma, gi bɛpani lɛ plɛ koko si ɔnɔ kakaa gi aapani si yɛ azɛ lɛ aʋa aŋa si Yesu onu Kristo ye e, biakpikpini yɛ ni ba ɔtsa klɔ.

²³ Lɛ loso e yɛ bapɔnɛ ba bɛpani si, “Etsì mleʋi ye!”

²⁴ Kuʋla dzɛ, bɛxwa onyimee gi eze kaŋupoa a, lɛ bɛsi yɛ si, “Ka plɛ ni Aya aŋu mɛ si wɔado anukwarɛɛ! Kwite si onyimee liɛ klɔ gi adra wɔ bimbi ʋe e, onu ɔnɔ zimizi.”

²⁵ Onyimee ebu le onu si, “Méte xe ɔnɔ zimizi onu loo ónu u, kidɔ tile ko mete: Meze kaŋupo pɔ̀ abla ɛ, mɛɛmɔ.”

²⁶ Beʋi ye si, “Ege abitɛ aki wɔ, kitɛ lize xe adra wɔ bimbi ʋe e?”

²⁷ Ebu le onu si, “Masi mlɔ koko, pɔ̀ mlazi mɛ liboe le e. Ege lɛ loso mlɛpɛ si mleenu le dzɛ ɛ? Putɔ mlɔ fɛ mlaapɛ si mlaaze yɛ badɔkpasi na a?”

²⁸ Bekpini ye lɛ bɛpani si, “Wonu ɔka liɛ klɔ yɛ ɔdɔkpasi, pɔ̀ blɔ kɔ ɛ, Mose badɔkpasi kunu.

²⁹ Kwite si Aya egu kunugu aki Mose; ɔniliɛ klɔ kɔ ɛ, blɔ kúte niklɔ gi ádɔ kyɛ ɛ!”

³⁰ Onyimee ebu le onu aki ba si, “Liboe gi litu mɛ kugyɔ lɛ ya a. Mléte niklɔ gi ádɔ ɔ, pɔ̀ yɛ adra mɛ bimbi ʋe e!

³¹ Kwite si Aya óʋinu banɔ zimizi ba kuxwaxwa a; pɔ̀ izeenu banama gi bizeebù ye e, xe bizɛɛbitɛ ni yɛ kupɛpɛɔ aʋa ɛ ba kuxwaxwa.

³² Dɔni Kelea okpese klɔ ɛ, kúnu si ɔnɔnɔ adra ɔnɔ gi bɛpɔ kaŋupo e, yɛ bimbi ʋídi.

³³ Xe ani Aya kɔ onyime liɛ ya ádɔ ɛ, ɔ́tratani kididɔ kubitɛ ɛ.”

³⁴ Bebu le onu si, “Bɛpɔ wɔ, bɛgani wɔ lɛ wotsi ní kuzimizi me e, lɛ wɔɛpɛ si wubasɛ blɔ bidɔ ɔ?” Lɛ bɛkpikpini yɛ ní ba ɔtsaklɔ ɛ.

Farisianɛ ma kuŋupo ni Ɔfuɛfuɛ nɔ mɛ

³⁵ Agi Yesu enu si bɛkpikpini yɛ ní ba ɔtsaklɔ ɛ, apɛ onyimee amɔ lɛ eʋi ye si, “Wɔzi Ɔnɔɛ Yebi ye aʋa ɛɛŋa na a?”

³⁶ Onyimee ebu le onu si, “Ɔka, si mɛ ɔniliɛ gi onu u, tɔ maazi yɛ aʋa ŋa!”

³⁷ Yesu asi yɛ si, “Wɔmɔ ɔniɛ koko, yɛ onu ɔniliɛ gi eegu kunugu yo ni wɔ abla a.”

³⁸ Onyimee apani si, “Ɔka mazi yɛ aʋa aŋa,” lɛ ekutu ye e.

³⁹ Yesu apani si, “Maba kelea mɛ si mixwa litsi ni banima, tɔ kuŋupo kumɔ lɛ banama gi bɛɛmɔ ɛ, tɔ biadzi kuŋupo.”

⁴⁰ Farisianɛatɔ gi beze ni niklɔ ɔ, xe benu liboe lɛ gi apani i, beʋi ye si, “Kitɛmɛ, kido woedo si blɔ fɛ kunu kuŋupo na a?”

⁴¹ Yesu ebu le onu si, “Atɛsi kuŋupo mlenu i, kɔlɔ mlatráŋa lipɔ ɔ; pɔ̀ gi mlɛzi lɛ si mlɛmɔ ɛ, libasɛ si mlɛŋa lipɔ kokoko.”