Yohan 7 - KUNYANYA VUVU YƆ

Yesu atrɛ ní Akpandɔ ʋa liwe le me

¹ Ní lɛ ya kede e, Yesu aga aklani Galilea kesea mɛ; ɔ́pɛ si yitrɛ ní Yudea, lɛ ese linu si Yudanɛ baka ba bɛzɛpɛ si beeye ye e.

² Gi lipoe le litiipɔnɔ kí Yudanɛ ma Akpandɔ ʋa Liweŋaŋa nɛ ɛ,

³ Yesu yɛ beneminyime ba bɛsi yɛ si, “Sɛ niya tɔ trɛ ní Yudea, tɔ wɔ́ badɔkpasi ba, bamɔ enugutseboe a la gi wɔɛbitɛ ɛ.

⁴ Ɔnɔnɔ óʋikpo kidiliɛ gi ɛɛbitɛ ɛ, xe apɛ́ si bete ye mɔmɔmɔ ɛ. Agi wɔɛbitɛ eboa la ya ɛ, kí tɔ kelea petee kéte wo!”

⁵ Bɛpani nite lɛ ese linu si yɛ beneminyime ba ɔtutɔ fɛ bázɛ yɛ aʋa ŋa a.

⁶ Lɛ loso Yesu asi ba si, “Lipoe gbã nɛ liʋína ɛki mɛ. Lipoe kakaa linu lipoe gbã ɛki mlɔ kɔ.

⁷ Kelea mɛ banima bátratani mlɔ kuvu kpɛ lipo me e, pɔ̀ bevu mɛkɔ ɛkpɛ lipo me e, lɛ ese linu si mɛɛsi ba si ba kiboebitɛɛ kiinyani.

⁸ Mlɔ kɔ mlatrɛ ní liwe le ɔŋa klɔ. Máʋitrɛ ní liwe lɛ ya ɔŋakɔ ɔ, lɛ ese linu si lipoe gbã nɛ liʋína ɛki mɛ ɛ.”

⁹ Asi ba nite lɛ awɔ Galilea ɛ.

¹⁰ Agi yɛ beneminyime ba bɛsɛ ɛtrɛ ní liwe le me e, Yesu fɛ atrɛ, pɔ̀ ɔ́basi isu u.

¹¹ Yudanɛ ma baka ba bɛzɛɛpɛ́ yɛ ní liwe le me, lɛ beʋi si, “Nífɔ onyime liɛ klɔ ɔlɛ ɛ?”

¹² Ní linɔkpi le kusi i, bɛzɛɛpani ní yɛ su ní kikpokpo me, banɔatɔ bɛ pani si, “Onu ɔnɔ gbã,” batɔ fɛ si, “owo eemeni banɔ.”

¹³ Pɔ̀ ɔnɔnɔ óbu le odo ni yɛ su u, lɛ ese linu si bezeese Yudanɛ ma baka ba.

Yesu abasɛ bidɔ ní liwe le me

¹⁴ Akpandɔ ʋa Liweŋaŋa nɛ lilɛ lɛ mɛ xe ableke Yesu azeekpese bidɔ mɛ kubasɛ ní Lisɔligba lɛ mɛ ɛ.

¹⁵ Yudanɛ baka ba inugu itse, lɛ beʋi si, “Nifɔ onyime liɛ ya yɛ kuboeteo kwidɔ gi bábasɛ yɛ kididɔ ɔ?”

¹⁶ Yesu ebu le onu si, “Kidiliɛ gi mɛɛbasɛ ɛ, ani mɛ ɔtutɔ mɛ kinɛ ɛ, pɔ̀ kidɔ ní Aya gi yɛ akpɛ mɛ ɛ klɔ.

¹⁷ Ɔnɔ kakaa gi apɛ si yibitɛ Aya yɛ kupɛpɛɔ aʋa ɛ, aatè xe kidiliɛ gi mɛɛbasɛ ɛ, kidɔ ní Aya kɔ loo mɛɛpani ní mɛ ɔtutɔ mɛ kigagla mɛ.

¹⁸ Ɔniliɛ gi izɛpani ní yɛ ɔtutɔ yɛ kigagla mɛ ɛ, ɛɛpɛ kukɔkɔ ɛki isu, Pɔ̀ ɔniliɛ ɛ gi ɛɛpɛ kukɔkɔ ɛki ɔniliɛ gi akpɛ yɛ ɛ, onu anukwarɛ onete lɛ asia atɔtɔ áma ní yɛ mɛ ɛ.

¹⁹ Mose aki mlɔ Ɔsã nɔ, putɔ aní te na a? Pɔ̀ mlɔmɛ ɔtɔtɔ ɔʋíbitɛ Ɔsã nɔ aʋa a, Ege lɛ loso mlekeni idi si mleye me e?”

²⁰ Lɛ linɔkpi le libu le onu si, “Ɔfuɛfuɛ zimizi ɔkpasi ní wɔ mɛ ɛ! Nyaŋwɛ eekeni idi si yiye wo o?”

²¹ Yesu ebu le onu si, “Liboe tile ko mabitɛ, lɛ litu mlɔ petee kugyɔ ɛ.

²² Mose akí mlɔ ɔsã si mlatsà ɔyaʋi aki mlɔ bebinyime ba, aní Mose ekpese le pɔ̀ mlɔ baka ba a. Lɛ mlɛzɛɛtsa ɔyaʋi kí bebinyime ba ní Lizemɔniwe le aʋa a.

²³ Xe biatsa ɔyaʋi kí obinyime ní Lizemɔniwe le aʋa a, tɔ bakíta Mose Ɔsã nɔ ese e, ege lɛ loso mlɛmɔ kusuyeʋi ni mɛ si mayɔni ɔnyime ní Lizemɔniwe le aʋa na a?”

²⁴ Mlamɔni etsi kuxwa ní banɔ kiŋwiŋwi mɛ onu u, pɔ̀ mlaxwa etsi ní anukwarɛ mɛ ɛ.

Banima beʋi si Yesu yɛ onu Kristo ye na a

²⁵ Niklɔ banɔatɔ ní Yerusalem bɛpani si, “Aní onyime liɛ ya baka ba bekeni edi si beeye na a?

²⁶ Dike! imɔ yɛ gi ɛɛpani ní ɔha lɔ kusi i, xe baʋíkɔ liboeboe tuni ye e! Kɔ kitsa baka ba bɛtsa lɛ si yɛ onu Kristo ye na a?

²⁷ Pɔ̀ xe Kristo ye aba ɛ, ɔnɔnɔ ɔ́trate niklɔ gi ádɔ ɔ. Lɛ blɔ pɔ̀ kwite niklɔ gi onyime liɛ ya ádɔ ɛ.”

²⁸ Agi Yesu azɛɛbasɛ bidɔ mɛ ní Lisɔligba lɛ mɛ ɛ, apani ni ole gagla si, “Ee Mlɛnya ete niklɔ gi madɔ ɔ? Aní mɛ ɔtutɔ mɛ kigagla onu ma ba ni ya a. Ɔniliɛ gi akpɛ mɛ ɛ, onu anukwarɛ onete. Mléte ye e,

²⁹ pɔ̀ mete ye, lɛ ese linu si yɛ kɔ madɔ lɛ yɛ akpɛ mɛ ɛ.”

³⁰ Liboe lɛ ya loso e, bekeni edi si beevu ye, pɔ̀ ɔnɔnɔ ɔ́gbɔni yɛ lɛ ese linu si yɛ lipoe le liʋína a.

³¹ Pɔ̀ banɔ glegle ní linɔkpi le me bɛzi yɛ aʋa ɛɛŋa a, lɛ bɛpani si, “Xe Kristo ye aba ɛ, aabitɛ enugutseboe sani la ya gi onyime liɛ ya abitɛ na a?”

³² Gi Farisianɛ ma benu linɔkpi le gi liipani eboa la ni ole kpokpo ní Yesu su i, ba ni Kusumu yo baka ba bɛkpɛ kasɔlipea bepepe ba tɔ bevu ye.

³³ Yesu apani si, “Malɛ ni mlɔ su lipoe kpekpemi itɔ ko, kɔ medzi atrɛ ní ɔniliɛ gi yɛ akpɛ mɛ klɔ ɛ.

³⁴ Mlapɛ́ mɛ pɔ̀ mlatrámɔ mɛ ɛ, lɛ mlatrátani niklɔ gi maaze e kuba.”

³⁵ Lɛ Yudanɛ ma baka ba bɛpani ki bahanuglɔ ba si, “Nifɔ atrátrɛ xe kútramɔ yɛ ɛ? Aatrɛ ní Helanɛ ma ima ʋidi ne me niklɔ gi blɔ akɔanɛ ma ba lɛ ɛ, tɔ yibasɛ Helanɛ ma bidɔ mɛ na a?

³⁶ Apani si kwitrapɛ́ yɛ pɔ̀ kútramɔ yɛ ɛ, lɛ kútratani niklɔ gi yɛ aze kudzɛ ɛ. Kitɛ liboe lɛ ya ese e?”

³⁷ Ní liwe gɔgɔ lɛ aʋa a, gi lɛ lize liweŋaŋa nɛ kumu yɔ mɛ ɛ, Yesu ayɔ alɛɛ, lɛ apani ni ole gagla si, “Ɔniliɛ gi olile eeku i, ɔba mɔklɔ tɔ aaŋwɛ kuni.

³⁸ Nite gi kuŋwlimi dradraa kwipani i, Ɔniliɛ gi azɛ mɛ aʋa aŋa ɛ, aaze ŋwisi ligbã́ enitɔ gi eʋiti i, lɛ la kuni yo kwiakpɛza dɔni yɛ mɛ ɛ.”

³⁹ Yesu apani te ní Ɔfuɛfuɛ nɔ gi banama a, gi bɛzi yɛ aʋa ŋa ɛ, biazɛ lɛ kede su u. Ní lipoe lɛ klɔ mɛ ɛ, baʋíki Ɔfuɛfuɛ nɔ fukɔ ɔ, lɛ ese linu si Yesu ɔ́ʋiyɔ ní yɛ sikusi se kuklekleo me e.

⁴⁰ Banɔatɔ ní linɔkpi le me benu yɛ eboe la, lɛ bɛpani si, “Onyime liɛ ya yɛ ɔnyanu Oboedoplɛɛ!”

⁴¹ Batɔ bedo si, “Ye onu Kristo ye!” Pɔ̀ batɔ fɛ bedo si, “Kristo ye aadɔ Galilea na a?

⁴² Kuŋwlimi dradra kwipani si, Kristo ye aaze Okusi ye Dawid yɛ lipo me obi lɛ biapɔ yɛ ní Betlehem ɔma lɔ klɔ mɛ gi Dawid eze e.”

⁴³ Lɛ loso kulɛlɛ kwiku linɔkpi le kusi i kɔkpɛ Yesu u.

⁴⁴ Banɔatɔ bɛpɛ si beevu ye pɔ̀ ɔnɔnɔ ɔ́gbɔni yɛ ɛ.

Yudanɛ baka ba ba kumɔziŋaa

⁴⁵ Agi Kasɔlipea bepepe ba bedzitrɛ ɛ, kusumu yo baka ʋidi ba ni Farisianɛ ma beʋi ba si, “Ege lɛ loso mlámani yɛ ɛ?”

⁴⁶ Kasɔlipea bepepe ba bebu le onu si, “Ɔnɔnɔ ɔ́pani nite oʋídi i ŋwisi onyime liɛ ya kinɛ ɛ!”

⁴⁷ Lɛ Farisianɛ ma beʋi ba si, “Kikyi ekyi mlɔ fɛ axla na a?”

⁴⁸ “Mlenu idi si baka ba mɛ ɔtɔ loo Farisiɔnɛɔtɔ azɛ yɛ aʋa aŋa edi na a?

⁴⁹ Linɔkpi lɛ ya líte Mose Ɔsã nɔ loso e, lilɛ ní Aya yɛ ifi xoxo ese!”

⁵⁰ Baka ba mɛ tole gi onu Farisiɔnɛ eze Nikodemo, onyime liɛ gi yɛ adzɛ Yesu klɔ edi i. Yɛ eʋi bagɔgɔ ba si,

⁵¹ “Ni blɔ Ɔsã nɔ onu i, kwiatani ɔnutɔ lipɔ kubu, xe ableke kwianu yɛ liboe le ni kidiliɛ gi abitɛ na a?”

⁵² Bebu le onu si, “Lipɛ, kɔ wɔfɛ Galilea wɔdɔ na a? Mlapami kuŋwlimi yɔ mɛ edi tɔ mlaate si, Aya yɛ Oboedoplɛ ɔtɔtɔ ɔ́dɔ ní Galilea ʋídi i.”

⁵³ Lɛ bamɛ ɔkakaa asɛ atrɛ yɛ tutɔ yɛ kepea mɛ ɛ.