Yohan 21 - KUNYANYA VUVU YƆ

Yesu ebu isu abasi Yɛ badɔkpasi batɔ gi bezee bu akpa a

¹ Ewe atɔ kede e, Yesu ebu isu abasi yɛ badɔkpasi ba dzɛ ní Tiberia limu ne su. Liba lɛ mɛ nite:

² Simon Petro, ni Toma gi bizɛɛxwa si tiaʋa obi ye e, ni Natanael gi ádɔ Kanaa ní Galilea ɛ, ni Zebedeo yɛ bebinyime ba ani Yesu yɛ badɔkpasi tiaʋa dzedze beze ní ɔkɔ tole.

³ Lɛ Simon Petro asi bagɔgɔ ba si, “Mɛɛtrɛ ní akpa obu kɔ.” Lɛ bɛsi yɛ si, “Kwiakuni wɔ kude.” Lɛ bezeemu iku ní katapokpaa mɛ, pɔ̀ elesi zizi na petee bébu kididɔ ɔ.

⁴ Agi liwo le liitu i, Yesu ɔlɛɛ ní limu ne kutu yɔ, pɔ̀ badɔkpasi ba bámɔ egyesi si Yesu yɛ ɔlɛɛ ɛ.

⁵ Lɛ eʋi ba si, “sɔhɛ ba, mlébu kiditɔ lo o?” Bebu le onu si, “Owo kúbu kididɔ ɔ.”

⁶ Asi ba si, “Mlakpɛ mlɔ dzikle ye ní katapokpaa kaŋaa mɛ, mlaabù atɔ.” Lɛ gi bɛŋwia dzikle ye kpɛ ní klɔ ʋa ɛ, bátani yɛ kuhe obu u, lɛ ese linu si ebu akpa la kpaŋu.

⁷ Lɛ ɔdɔkpasi liɛ klɔ gi Yesu alɔ ɛ, asi Petro si, “Ɔkaɛ yɛ liɛ klɔ!” Agi Petro enu si Ɔkaɛ liɛ klɔ ɛ, edzini yɛ lifune lìwu le axla isu ya lɛ ese linu si ebu lìwu i lɛ klɔ aplɛ lɛ ayɔ eku ní kuni yo me e.

⁸ Badɔkpasi gɔgɔ ba bɛba eku oge no ní katapokpaa mɛ, gi bezeehe dzikle ye e, gi eyi ni akpa la ɛ. Ba ozeklɔ ódze ni kuni yo oge no su u, bize ŋwisi iwla avitetsu kinɛ ko.

⁹ Agi beple ní katapokpaa mɛ ɛ, bɛmɔ si axwa kifu kiisɔ gi akpa ni aklã atɔ atini kɛ aʋa ɛ.

¹⁰ Lɛ Yesu asi ba si, “Mlamani akpa la gi mlebu abla ɛ la mɛ atɔ.”

¹¹ Simon Petro emu eku katapokpaa mɛ, lɛ azeehè dzikle ye gi eyi ni akpa ʋidi la amani oge no e. Akpa la ɛna alafa tole ni avitetsu ni tata, pɔ̀ gi ɛsrɛ nite kyɛ, dzikle ye ɔ́kyi i.

¹² Lɛ Yesu asi ba si, “Mlagaŋa bidɔ mɛ.” Yɛ badɔkpasi ba mɛ ɔtɔtɔ ɔ́tani yɛ kuʋi si, “Nyaŋwɛ wonu u?” lɛ ese linu si bete si yɛ onu Ɔkaɛ.

¹³ Lɛ Yesu atrɛ xe azɛɛkɔ àklã na a, xe akɔ la aki ba ɛ; niteme ké abitɛ ni akpa la fɛ.

¹⁴ Lɛ ya lize kutánɛ gi Yesu ebu isu abasi yɛ badɔkpasi ba gi ayɔ adɔ ni bekpo ʋa mɛ kede e.

Yesu edzini Petro edu

¹⁵ Agi bɛŋa bidɔ mɛ pɔ́ ɛ, Yesu eʋi Petro si, “Simon, Yohanes Yebi ye, wɔlɔ́ mɛ sani kiliɛ gi banɔ gɔgɔa ya bɛlɔ mɛ na a?” Ebu le onu si, “Ee, Ɔkaɛ, wote si malɔ wɔ.” Yesu asi yɛ si, “Di mɛ beʋesibi ʋa aʋa,”

¹⁶ Kuʋla Yesu eʋi ye si, “Simon, Yohanes Yebi ye, wɔlɔ́ mɛ na a?” Ebu le onu si, “Ee Ɔkaɛ wote si malɔ wɔ.” Yesu asi yɛ si, “Di mɛ iʋesi le aʋa.”

¹⁷ Kutanɛ Yesu eʋi ye si, “Simon, Yohanes Yebi ye, wɔlɔ́ mɛ na a?” Asigaga ɛga Petro nì yɛ isu ya lɛ ese linu si Yesu eʋi ye kutanɛ si, “Wɔlɔ́ mɛ na a?” lɛ asi Yesu si, “Ɔkaɛ wote kidɔ kakaa; wote si malɔ wɔ!” Yesu asi yɛ si, “Di mɛ iʋesi le aʋa.

¹⁸ Mɛɛsi wɔ anukwarɛɛ: agi woze ɔyasɔʋi i, wɔzɛɛbla kɔ wɔtrɛ niklɔ gi wɔpɛ si wutrɛ ɛ; pɔ̀ xegi wotsi i, wɔanina wɔ iwla lɛ lɛ ɔnɔ dzedze aalulɔ wɔ ɔ, xe aatsini wɔ niklɔ ɔ gi wɔ́pɛ si wutrɛ ɛ.”

¹⁹ Gi apani te e, Yesu azeebu kudeo liɔ onu gi Petro aga a xe aatse e abasɛ, gi kwiaki Aya kukpɔ̀kpɔ̀ ɔ. Lɛ klɔ kede e, Yesu asi yɛ si, “Zeni mɛ kude e!”

Yesu ni ɔdɔkpasi dzedze e

²⁰ Petro ekyi lɛ amɔ ɔdɔkpasi liɛ gi Yesu alɔ ɛ, ni ba kedea ɔniliɛ gi yɛ aziɔni Yesu ní ɔdɔŋakplɔ nɔ su u, gi bɛzɛŋa bidɔ gɔgɔ ʋɛ kpɛ ɔtɔ ki yɛ kutseo o, xe eʋi ye si, “Ɔkaɛ nyaŋwɛ atrábu wo ekɔ ɔ?”

²¹ Agi Petro amɔ yɛ ɛ, eʋi Yesu si, “Ɔkaɛ liboe woli litrába onyime liɛ ya pɔ̀ aʋa a?”

²² Yesu ebu le onu si, “Xe mapɛ si oze ligbã́ kɔzɛna ni lipoe lɛ gi maadziba ɛ, nifɔ lipa wɔ ɔ? Wɔ kɔ zeni mɛ kude!”

²³ Lɛ liyi klanɔ ni banama gi beze ni Yesu kude e, kusi si, ɔdɔkpasi liɛ ya ɔ́tratse e. Pɔ̀ Yesu ɔ́pani si ɔ́tratse e; kipani ko apani si, “Xe mapɛ si oze kɔzɛna ni lipoe lɛ gi maadziba ɛ, nifɔ lipa wɔ ɔ?”

²⁴ Yɛ onu ɔdɔkpasi liɛ gi apani ní eboa la ya su u, yɛ ké aŋwlimi na aplɛ; lɛ kwite si eboa la klɔ gi apani i, enu anukwarɛɛ.

²⁵ Yesu abitɛ eboe glegle gi xe si ba ŋwlimi na petee tile tile aplɛ ɛ, megyo edi si kelea petee katrátani ozekɔ kumɔ ki kuplekpaa liɔ klɔ gi biaŋwlimi i.