Yohan 20 - KUNYANYA VUVU YƆ

Badɔkpasi ba bɛmɔ ɔdrɔ pluplu lo

¹ Lipadzruwe le olezatɔ nɔ gi kanaa mɛ kaʋídra ɛ, Maria Magdalene atrɛ ní Yesu ɔdrɔ lɔ su lɛ amɔ si likla nɛ líma ní ɔdrɔ lɔ onu u.

² Lɛ loso ese atrɛ ní Simon Petro ni ɔdɔkpasi liɛ klɔ gi Yesu alɔ ɛ, ba klɔ ɔ, lɛ asi ba si i, “Bebu Ɔkaɛ ní ɔdrɔ lɔ mɛ, lɛ kúte niklɔ gi bɛtsini yɛ ɛ!”

³ Lɛ Petro ni ɔdɔkpasi liɛ klɔ ɛ, bɛtrɛ ní ɔdrɔ lɔ su i.

⁴ Ba tiaʋa bezeese pɔ̀ ɔdɔkpasi liɛ klɔ ese aza ní Petro aʋa a, lɛ yɛ etu ɔdrɔ lɔ su ku na a.

⁵ Abùbɔ lɛ amɔ asaba pititi ala mɛ gi bɛxla Yesu ikpɛ ɛ, gi afini i, pɔ̀ oti oku ɔdrɔ lɔ mɛ ɛ.

⁶ Simon Petro gi yɛ awɔ kedea ɛ, aba eku lɛ aza eku ní ɔdrɔ lɔ mɛ ɛ. Amɔ asaba pititi la gi afini i,

⁷ ni kusa liɔ klɔ gi bɛkɔ ɛnya Yesu yɛ litukpo le e. Kusa liɔ klɔ kɔ ɛ, kwiklɔʋi gi kwifɛ lidze ní asaba pititi la su u.

⁸ Gɔgɔ ɛ, ɔdɔkpasi liɛ gi yɛ etu ɔdrɔ lɔ su kuna ɛ, kyɛ eti eku, lɛ amɔ nite ke e, lɛ azɛ aŋa si Yesu anya ayɔ ɔ.

⁹ Ga kɔna ni abla ɛ, bénu kuŋwlimiplɛɔ ese e si, lilɛ si Yesu ɔyɔ dɔni bekpo ʋa mɛ.

Yesu ebu isu abasɛ Maria Magdalene

¹⁰ Lɛ badɔkpasi ba bedzi itrɛ ní ba kepea mɛ ɛ.

¹¹ Pɔ̀ Maria alɛɛ ní ɔdrɔ lɔ su azeebemi; gi azeebemi i, abùbɔ lɛ edi ɔdrɔ lɔ mɛ atsisi i

¹² lɛ amɔ Aya yɔ baxwɛdzɛ tiaʋa gi bɛkpɛ bidɔ pititi i, xe bedi ní niklɔ ɔ, gi Yesu yɛ okpo ye afɛ ɛ, tole ní yɛ etukpo la onu lɛ ɔʋlaɛ ní yɛ ikli lɛ onu i.

¹³ Lɛ beʋi ye si, “Ɔdzɛ, ege lɛ loso woebemi i?” Ebu le onu si, “Befeke mɛ Ɔkaɛ sɛnɔ, lɛ méte niklɔ gi bɛzɛɛplɛ yɛ ɛ!”

¹⁴ Lɛ gi ekyi i, amɔ Yesu gi ɔlɛɛ niklɔ ɔ; pɔ̀ ɔ́mɔ yɛ ogyesi si yɛ onu Yesu u.

¹⁵ Yesu eʋi ye si, “Ɔdzɛ, ege lɛ loso woebemi i? nyaŋwɛ wɔsi wɔɛpɛ ɛ?” Ɔdzɛɛ egyoedi si abɔ yɛ aʋa odidi onu, lɛ asi yɛ si, “Xe wɔ wofeke ye ɔsɛnɔ ɛ, Ɔka, si mɛ niklɔ gi wɔplɛ yɛ ɛ, atɔ mizeefeke ye.”

¹⁶ Lɛ Yesu axwa yɛ si, “Maria!” Ekyi aŋu mɛ akpɛ yɛ lɛ apani ní si Hebri se mɛ si, “Rabboni!” Gi lɛ ese linu si “Ɔdɔbasɛ yɛ ɛ.”

¹⁷ Yesu asi yɛ si, “Wukísú ní mɛ su u, lɛ ese linu si maʋidzitrɛ ní Mɔka klɔ ɔ. Pɔ̀ trɛ ní mɛ benemi ba klɔ ɔ tɔ si ba si medzi itrɛ ní yɛ klɔ gi onu Mɔka ni ba Ɔka, mɛ Aya ni ba Aya.”

¹⁸ Lɛ Maria Magdalene atrɛ lɛ azɛɛsi badɔkpasi ba si “Mamɔ Ɔkaɛ!” Lɛ asi ba liboe lɛ gi Yesu asi yɛ ɛ.

Yesu ebu isu abasi Yɛ badɔkpasi ba

¹⁹ Lize Lipadzruwe le ɔlagɔ, gi badɔkpasi ba bɛkpɛ likpɔ ɔ, xe bɛda ipupo le kpɛ isu ya ɛ, ɔkpɛ gi bezeese Yudanɛ baka ba loso e. Yesu aba ɔlɛɛ ní ba kusi lɛ apani ba si, “Kusuyɔ ki mlɔ ɔ.”

²⁰ Agi apani ba pɔ́ ɛ, abasi ba yɛ kuwla mɛ ni yɛ opoga nɔ mɛ. Isami iku badɔkpasi ba koŋ gi bɛmɔ Ɔkaɛ ɛ.

²¹ Yesu asi ba dzɛ si, “Kusuyɔ ki mlɔ, kiliɛ gi Kakaa Aya akpɛ mɛ ɛ, nite mɛɛkpɛ mlɔ.”

²² Lɛ gi afuɛ abali ba aʋa ɛ, apani si, “Mlazi Ɔfuɛfuɛ Dradra lɔ.

²³ Xegi mlɛkɔ banima ba eboe zimizi na ɛkyɛ ba ɛ, Aya aakɔ̀ la kukyɛ ba; xe mlákɔ la akyɛ ba ɛ, bátrakɔ la ɛkyɛ ba.”

Yesu ebu isu ya abasi Toma

²⁴ Badɔkpasi Liɔfɔ ni tiaʋa ba mɛ tole Toma, gi bizɛxwa si tiaʋa obi ye e, óze bagɔgɔ ba kusi i, xe Yesu aba a.

²⁵ Lɛ badɔkpasi gɔgɔ ba bɛsi yɛ si, “Kwimɔ Ɔkaɛ!” Toma asi ba si, “Xegi mámɔ kutakpagyeʋio bebikpo ʋa ní yɛ kuwla mɛ ɛ, xe mákpɛ mɛ kiwlaʋiɛ ní bamɛ ɛ, xe mákpɛ mɛ awla la ní yɛ opoga nɔ mɛ ɛ, mátrazi lɛ aʋa ɛɛŋa a.”

²⁶ Ogle tole kede, gi badɔkpasi ba bɛkpɛ likpɔ dzɛ ní ligba lɛ mɛ ɛ, xe Toma kyɛ eze ba kusi i. Gi bɛda ipupo le kyɛ ɛ, Yesu aba ɔlɛɛ ní ba kusi lɛ apani ba si, “Kusuyɔ ki mlɔ ɔ!”

²⁷ Lɛ Yesu asi Toma si, “Kɔ wɔ kiwlaʋiɛ kpɛ ní ya, tɔ di mɛ kuwlaa mɛ; tɔ nina wɔ awla la kpɛ ní mɛ opoga nɔ mɛ. Atɔ mɔni wɔ eɖikeke la tɔ ziŋa!”

²⁸ Toma ebu le onu aki Yesu si, “Mɛ Ɔkaɛ ni mɛ Aya!”

²⁹ Yesu asi yɛ si, “Gi wɔmɔ mɛ ɛ, dani wɔzi ŋa ɛ? Biakrira banama gi bámɔ ɔ, pɔ̀ xe bɛzi ŋa ɛ!”

³⁰ Ní yɛ badɔkpasi ba aŋu mɛ ɛ, Yesu abitɛ enugutseboe glegle dzedze gi báŋwlimi akpɛ ní keplekpaa lia ya mɛ ɛ.

³¹ Pɔ̀ bɛŋwlimi la ya tɔ mlaakɔ la kuzi ŋa si Yesu yɛ onu Kristo ye, Aya Yebi ye, lɛ gani mlɔ kuziŋa ní yɛ linyi ne me e, mlamɔ ligbã́.