Yohan 17 - KUNYANYA VUVU YƆ

Yesu axwa Aya

¹ Agi Yesu apani eboa la ya pɔ́ ɛ, edi lifunu ne lɛ apani si, “Kaka, ɔnyɔsasa nɔ ɛna. Kpɛ kukɔ́kɔ́ ní wɔ obi ye su, tɔ wɔ obi ye fɛ ɔkpɛ kukɔ́kɔ́ ní wɔ linyi ne su.

² Lɛ ese linu si wɔki yɛ kigagla ní banima petee aʋa a, tɔ banama gi wɔki yɛ ɛ, aaki ba ligbã́ moblo le.

³ Lɛ ligbã́ moblo le e, lɛ linu si, bete wo Aya ɔtutɔ lɔ, ani Yesu Kristo gi yɛ wɔkpɛ ɛ.

⁴ Makpɛ kukɔ́kɔ́ ní wɔ linyi ne su ní banima kusi ní kesea aʋa; gi meblo ni axwɛ ana gi wɔki mɛ si miwa ɛ.

⁵ Kaka! Abla ɛ, Kpɛ kukɔ́kɔ́ ní mɛ su ní kezese alia mɛ, ní kukɔ́kɔ́ liɔ gi kwize ní mɛ ni wɔ su u, xe kelea mɛ kekpese e.

Yesu axwa Aya ní Yɛ badɔkpasi ba litukpo

⁶ “Mebu wo abasi banama gi wɔkya ki mɛ dɔni kelea mɛ ɛ. Beze wɔ banɛ, xe wɔkɔ ba ɔkimɛ ɛ. Bexo wɔ liboe le oto,

⁷ lɛ abla ɛ, bete si kidɔ kakaa gi wɔki mɛ ɛ, kidɔ wɔ kɔ.

⁸ Liboe lɛ gi wɔki mɛ ɛ, makɔ lɛ aki ba lɛ bɛzi liboe le e; bete si linu anukwarɛɛ si wɔklɔ madɔ, lɛ bɛziŋa si wɔ wɔkpɛ mɛ ɛ.

⁹ “Maxwa Aya ní ba litukpo, máxwa Aya ki kelea banima petee, pɔ̀ ki banama gi wɔki mɛ ɛ, lɛ ese linu si wɔ banɛ benu u.

¹⁰ Kidɔ kakaa gi kiliɛ mɛ awla ɛ, wɔ kinɛ kinu, lɛ wɔ kidɔ kakaa ɛ mɛ kinɛ kinu; lɛ mɛ banima bɛ kpɛ kukɔ́kɔ́ ní mɛ su gani bɛ mɛ ɛ.

¹¹ Lɛ abla ɛ, matraba wɔ klɔ; Máma kelea mɛ tɔ ɔ, pɔ̀ bakɔ bedzialɛ ní kelea mɛ. Ɔka Dradra yɛ! Ki tɔ wɔ linyi ne lɛ kigaglaɛ kize kuka kpɛkpɛ ní ba su, linyi lɛ klɔ gi wɔki mɛ ɛ, tɔ beze tole ŋwisi kiliɛ gi mɛ ni wɔ kunu kidɔ tile kinɛ ɛ.

¹² Agi meze ní ba su i, mazi ba onu nì wɔ linyi ne kigaglaɛ, linyii lɛ klɔ gi wɔki mɛ ɛ. Makpɛ kuka aklani ba gi bamɛ ɔ́tɔtɔ ɔ́lila a, sani ɔniliɛ klɔ gi lilɛ si ɔlila ɛ, lɛ ya liba lɛ mɛ tɔ Kuŋwlimi yɔ kuba kɔ mɛ.

¹³ “Lɛ abla ɛ, matraba wɔ klɔ, lɛ loso mɛpani eboa la ya gi malɛ ní kelea mɛ ɛ, tɔ ba ina nɛ mɛ iayi ni mɛ isami nɛ.

¹⁴ Makɔ wɔ odu lo aki ba, lɛ kelea mɛ banima bɛtrɔ ba ahwafi, lɛ ese linu si bénu kelea mɛ banɛ tɔ ɔ, ŋwisi kiliɛ gi mɛ fɛ mádɔ kelea mɛ kinɛ ɛ.

¹⁵ Maʋíʋi wo si bu ba dɔni kelea mɛ ɛ, pɔ̀ meeʋi wo tɔ zi ba ní ozimizi ye iwla mɛ ɛ.

¹⁶ Bádɔ kelea mɛ ŋwisi kiliɛ gi mɛ fɛ mádɔ kelea mɛ kinɛ ɛ.

¹⁷ Dra ba su kíwɔ isu ya gani anukwarɛ liboe le me e; lɛ ese linu si wɔ liboe le linu anukwarɛɛ.

¹⁸ Mɛɛtsisi ba kelea mɛ, ŋwisi kiliɛ gi wɔtsisi mɛ ni kelea mɛ kinɛ ɛ.

¹⁹ Kɔkpɛ ba loso, e madra isu ya su aki wɔ, tɔ ba fɛ wɔadra basu su.

Yesu axwa Aya ni baʋaziŋa ba petee litukpo

²⁰ “Ani ba tètè meeʋi kɔ ɔ, pɔ̀ ki banama petee fɛ gi biazɛ mɛ aʋa ŋa gani liboe lɛ gi biapani ki ba mɛ ɛ.

²¹ Meʋi si ba pɔ́ bedzi kidɔ tile. Kaka! kiliɛ gi wɔlɛ mɛ mɛ̀ ɛ, xe mɛ fɛ malɛ ní wɔ mɛ ɛ, tɔ beze ní blɔ mɛ, tɔ kelea mɛ kaziŋa si wɔ wɔkpɛ mɛ.

²² Maki ba kusudra ŋwisi kiliɛ gi wɔki mɛ kusudra kinɛ ɛ, tɔ bedzi kidɔ tile, kiliɛ gi mɛ ni wɔ kunu kidɔ tile e.

²³ Malɛ ní ba mɛ lɛ wɔ fɛ wɔlɛ ní mɛ mɛ̀ ɛ, tɔ ba pɔ́ biaze kidɔ tile, tɔ kelea mɛ banima biate si wɔ wɔkpɛ mɛ, lɛ wɔdimɛ ni ba kiliɛ gi wɔdimɛ ni mɛ ɛ.

²⁴ “Kaka! Wɔ wɔkɔ ba ɔki mɛ, lɛ mapɛ si beze ní mɛ su ní niklɔ gi malɛ ɛ, tɔ biamɔ mɛ kusudraa, kusudra liɔ gi wɔ ki mɛ ɛ; lɛ ese linu si wɔlɔ mɛ xe kelea kɛgyɔ ɔ.

²⁵ “Kaka gi ɔlɛ ní Kude Gyɔgyɔ aʋa a! Gani lɛ mɛ si kelea mɛ kéte wo fɛ ɛ, mɔkɔ mete wo, lɛ banɔaya bete si wɔ́ wɔkpɛ mɛ ɛ.

²⁶ Maki si bete wo, lɛ maatrɛ ni lɛ aʋa si tɔ bete wo, tɔ wɔ kulɔlɔ ki mɛ ɛ, kwiaze ní ba mɛ, atɔ mɛ fɛ maaze ní ba mɛ.”