Yohan 15 - KUNYANYA VUVU YƆ

Yesu Yɛ onu wain yɛ lihuʋi le ɔtutɔ lɔ

¹ “Mɛ menu wain yɛ lihuʋi le ɔtutɔ lɔ, lɛ Mɔka Aya yɛ onu wain ɔnyrɔ nɔ onetee e.

² Izɛɛkple liya kakaa ní mɛ mɛ̀ gi liʋíyo e, lɛ izeebu aya la gi izeeyo e su, tɔ aya la mɛ adra tɔ eyo asanɔ.

³ Kɔkpɛ eboa la gi masi mlɔ loso e, mlɔ isu idra kooko.

⁴ Mlakɔ isu amìnì nì mɛ tɔ mɛ fɛ mímìnì nì mlɔ. Liseya ɛtɔtɔ lítratani kuyo ní lɛ tutɔ isu wla mɛ ɛ; liatani kuyo xe limìnì nì ose lo o. Nite ke mlatrátani esebi kuyo xe mlámìnì nì mɛ ɛ.

⁵ “Mɛ menu wain yɛ lihuʋi le, lɛ mlɔ mlenu aya la a. Ɔniliɛ gi amìnì nì mɛ ɛ, xe Mɛ kyɛ mamìnì nì yɛ ɛ, aayo esebi glegle; lɛ ese linu si mláma kididɔ kubitɛ mɛ ɛ, xe máma ní mlɔ mɛ ɛ.

⁶ Ɔniliɛ gi ɔ́mìnì nì mɛ ɛ, ɔlɛ ŋwisi liya gi bɛtsa a, xe bekɔ ɛŋwia eʋe e, xe liyurɔ kinɛ ɛ. Biakpɛ aya la klɔ likpɔ kɔ bɛŋwia la ɛkpɛ ní kifu mɛ kɔ ɛkani i.

⁷ Xe mlakpasi ní mɛ mɛ̀ ɛ, gi mɛ eboe la alɛ ní mlɔ mɛ ɛ, kɔlɔ mlaaʋi kidɔ kakaa gi mlɛpɛ́ ɛ, lɛ biaki mlɔ kɛ ɛ.

⁸ Xegi mleyo esebi glegle e, liaki si banima biaki Mɔka Aya kubùbù lɛ liabasɛ kyɛ si mlenu mɛ badɔkpasi i.

⁹ “Malɔ mlɔ kiliɛ gi Kaka Aya alɔ mɛ ɛ; lɛ loso mleze mɛ kulɔlɔɔ mɛ ɛ.

¹⁰ Xe mlɛga mɛ isã nɛ aʋa ɛ, mlaaze ní mɛ kulɔlɔɔ mɛ, ŋwisi kiliɛ gi maga ní Mɔka Aya yɛ isã nɛ aʋa a, xe malɛ ní yɛ kulɔlɔɔ mɛ ɛ.

¹¹ “Masi mlɔ liboe lɛ ya tɔ isami nɛ elu gi ilɛ ní mɛ mɛ̀ ɛ, iaze ní mlɔ mɛ̀, atɔ isami nɛ iayi mlo.

¹² Mɛ ɔsã nɔ lɔ ya si; mlalɔ mlɔ ahanuglɔ ba, kiliɛ gi malɔ mlɔ ɛ.

¹³ Kulɔlɔ sanɔ gi ɔnɔ aaki yɛ baʋia nɛ ba kunu si, aakɔ̀ yɛ ligbã́ nɛ ɔkɔ ní ba litukpo.

¹⁴ Lɛ mlɔ mlenu mɛ baʋia ba a, xe mlɛbitɛ ní mɛ ɔsã nɔ aʋa ɛ.

¹⁵ Máʋixwa mlɔ si besumubi tɔ ɔ, lɛ ese linu si osumubi óʋite kidiliɛ gi yɛ ɔkaɛ ɛɛbitɛ ɛ. Boŋu i, maxwa mlɔ si baʋia, lɛ ese linu si kidɔ kakaa gi menu adɔ ni Mɔka Aya klɔ ɛ, kɛ masi mlɔ.

¹⁶ Aní mlɔ mlɛkya mɛ ɛ; Mɛ makya mlɔ lɛ makpɛ mlɔ si mlazeeyo esebi glegle, esebi ala klɔ gi aaze tsini kanɔmɛ anɔmɛ ɛ. Atɔ Kaka Aya aaki mlɔ kidɔ kakaa gi mlaaʋi ye ní mɛ linyi ne me e.

¹⁷ Liboe lɛ ya ɔsã maki mlɔ: Mlalɔ mlɔ ahanuglɔ ba.

Banima ní kelea mɛ bɛtrɔ badɔkpasi ba ahwafi

¹⁸ “Xe kelea mɛ banima bɛtrɔ mlɔ ahwafi i, mlaplɛ aŋu si, betu mɛ ahwafi kutrɔ.

¹⁹ Xe mlenu kelea mɛ banɛ ɛ, kelea mɛ kialɔ mlɔ ŋwisi ka ɔtutɔ banɛ kinɛ ɛ. Pɔ̀ makya mlɔ ebu ní kelea mɛ ɛ, lɛ mlénu kelea mɛ banɛ tɔ ɔ; lɛ loso kelea mɛ banima bɛtrɔ mlɔ ahwafi i.

²⁰ Mlaplɛ aŋu liboe lɛ gi masi mlɔ aʋa a si, ‘Osumubi ɔtɔtɔ óʋikeme sani yɛ ɔkaɛ ɛ.’ Xe bɛyɔ kedu ní mɛ su i, biayɔ kedu ní mlɔ fɛ su; xe bɛga ní mɛ bidɔ basɛbasɛ ʋɛ aʋa ɛ, biaga ni mlɔ binɛ mɛ fɛ aʋa.

²¹ Biayɔ kedua lia ya ní mlɔ su kɔkpɛ mɛ linyi ne loso; agi béte ɔniliɛ gi akpɛ mɛ ɛ.

²² Nya bátraŋa lipɔ ní ba kuzimizi yo me e, xe mába egu kunugu yo aki ba a, pɔ̀ abla ɛ, liboeboe líma ba awla gi biakɔŋwlɛ ba kuzimizi yo litukpo o.

²³ Ɔniliɛ gi atrɔ mɛ ahwafi i, atrɔ Mɔka Aya fɛ ahwafi.

²⁴ Nya bátrabu ba lipɔ ɛkpɛ ba eboe zimizi na a, xe mábitɛ kidiliɛ gi ɔnɔnɔ ɔ́bitɛ ni ba kusi oʋídi i; Pɔ̀ abla ɛ, bɛmɔ enugutseboe a la gi mabitɛ ɛ, pɔ̀ fɛ ɛ, bɛtrɔ mɛ ni Mɔka Aya pɔ́ ahwafi.

²⁵ Lɛ ya kɔ ɛ, lilɛ si liba lɛ mɛ atɔ liboe lɛ gi bɛŋwlimi kpɛ ní ba ɔsã nɔ mɛ ɛ, liba lɛ mɛ si, ‘Liboeboe mobamoba ɛ, bɛtrɔ mɛ ahwafi.’

²⁶ “Xegi Ɔpɔnɔpɔnɔɛ gi maatsisi mlɔ dɔni Kaka Aya klɔ aba ɛ, Yɛ adra mɛ su. Ɔfuɛfuɛ nɔ gi aabu anukwarɛɛ kubasɛ ní Aya su u, gi ɛdɔ ní Kaka Aya klɔ ɛ.

²⁷ Lɛ mlɔ fɛ ɛ, mlaadra mɛ su ki banima, lɛ ese linu si mleeze ní mɛ su dɔni okpese klɔ ke.