Yohan 13 - KUNYANYA VUVU YƆ

Yesu eplo Yɛ badɔkpasi ba kuklikpɔɔ

¹ Gi ligɔ liwe tile tɔ baŋa Kutseolidɔzawe le e. Yesu ete si lipoe le lina ki yɛ si yisɛ̀ ní kelea mɛ tɔ yidzì itrɛ ní Kaka Aya kɔ. Alɔ banama gi bali kelea mɛ ɛ, gi benu yɛ banɛ ɛ, kɔtsini yɛ kutseo me ke, lɛ ebu yɛ kulɔlɔɔ petee abasi ba a.

² Yesu ni yɛ badɔkpasi ba bɛzɛŋa bilagɔdɔ mɛ. Lɛ ozimizi ye akpɛ kugyodi ní Yuda gi onu Simon Iskariot yebinyime yɛ litukpo le me kókò si ɔkpɛ Yesu awla a.

³ Yesu etè si Kakaa Aya akɔ kidɔ kaka akpɛ ní yɛ kigaglaɛ ese; etè si yɛ adɔ Aya kɔ lɛ yedzitrɛ ní Aya kɔ ɔ.

⁴ Nite si ayɔ ní ɔdɔŋakplɔ nɔ su, ebu yɛ awu la aʋa liwu le, lɛ akɔ kavlɔa sama yɛ kasaa ɛ.

⁵ Lɛ enye kuni akpɛ ni kezi katɔ mɛ ɛ, xe ekpese yɛ badɔkpasi ba kuklikpɔɔ kuplo e, lɛ etsoli ko ni kavlɔa gi asama ní kasaa ɛ.

⁶ Gi lina Simon Petro aʋa ɛ, eʋi Yesu si, “Ɔkaɛ, kiplo wɔ si wúplo mɛ kuklikpɔ na a?”

⁷ Yesu ebu le onu si, “Wɔtranu kidiliɛ gi mɛɛbitɛ ese abla a, pɔ̀ wɔanu lɛ ese ní lɛ kede e.”

⁸ Petro apani si, “Mátradimɛ liwewe si wɔaplo mɛ kuklikpɔ ɔ!” Lɛ Yesu ebu le onu si, “Xe wɔ́ki méplo wɔ kuklikpɔ ɛ, wɔtraze mɛ ɔdɔkpasi tɔ ɔ.”

⁹ Simon Petro ebu le onu si, “Ɔkaɛ, wukíplo mɛ kuklikpɔɔ tètè e, boŋu i, plo mɛ kuwlakpɔɔ ni litukpo le fɛ!”

¹⁰ Yesu asi yɛ si, “Ɔnɔ kaka gi ewlo koko e, yɛ isu ya idra lɛ ɔ́ziã si owlo tɔ ɔ, pɔ̀ kɔ kuklikpɔ ko aaplo o. Mlɔ pɔ́ mlɔ isu ya idra ɔnɔ tole ko ɔ́dra a.”

¹¹ Yesu kɔ ete ɔniliɛ gi yɛ atrákpɛ yɛ awla ɛ; lɛ loso apani si, “Mlɔ pɔ́, mlɔ isu ya idra a ɔnɔ tole ko ɔ́dra a.”

¹² Agi Yesu eplo ba kuklikpɔɔ pɔ́ ɛ, edzini yɛ liwu le aʋa liwu le akpɛ lɛ edzi atrɛ ní yɛ ozeklɔ ní ɔkplɔ nɔ su i. Lɛ Yesu eʋi ba si, “Dani mlenu kidiliɛ gi mabitɛ aki mlɔ ese e?”

¹³ “Mlɛzɛxwa mɛ si, ‘Ɔdɔbasɛ’ ni ‘Ɔkaɛ’, nite ɖii lilɛ si mlabitɛ, lɛ ese linu si niteme ɔnɔ menu u.

¹⁴ Xe Mɛ mlɔ Ɔkaɛ ni Ɔdɔbasɛ yɛ, meplo mlɔ kuklikpɔ ɛ, lilɛ si mlɔ fɛ, mleplo mlɔ ahanuglɔ ba kuklikpɔɔ.

¹⁵ Maplɛ liŋwitsɛ aki mlɔ, tɔ mlɔ kyɛ mlabitɛ nite ɖii gi mabitɛ aki mlɔ ɛ.

¹⁶ Mɛɛsi mlɔ anukwarɛɛ: ɔnɔdzidzi ɔ́tɔtɔ óʋikeme sani yɛ ɔkaɛ ɛ, lɛ ɔxwɛdzɛ ɔ́tɔtɔ fɛ ɛ, óʋikeme sani ɔniliɛ gi akpɛ yɛ ɛ.

¹⁷ Abla gi mlete anukwarɛ liɛ ya ɛ, biakrira mlɔ xe mlɛkpɛ lɛ ni axwɛwawa mɛ ɛ.

¹⁸ “Aní mlɔ petee mɛɛsɛ ɛ; Mete banɔaklɔ gi makya ɛ. Pɔ̀ lilɛ si kuŋwlimi yɔ kuba kɔ mɛ gi kwipani si i, ‘Ɔniliɛ gi ɛɛkpɛ awla kezi me ni mɛ ɛ, ayɔ kedu ní mɛ su.’

¹⁹ “Mɛɛsi mlɔ abla xe ableke liaba lɛ mɛ ɛ, tɔ xe liba lɛ mɛ ɛ, mlaazi ŋa si ‘Mɛ menu Ɔniliɛ gi ɔlɛ dɔni kelea okpese klɔ ɔ.’

²⁰ Mɛɛsi mlɔ anukwarɛɛ, ɔniliɛ gi azɛ ɔnɔ kakaa a gi makpɛ ɛ, azɛ mɛ fɛ; lɛ ɔniliɛ gi azɛ mɛ ɛ, azɛ ɔniliɛ gi yɛ akpɛ mɛ ɛ.”

Yesu apani si ɔnutɔ atrákpɛ Yɛ awla

²¹ Gi Yesu apani eboa la ya pɔ́ ɛ, axixa ní yɛ ɔna nɔ mɛ lɛ apani si, “Mɛɛsi mlɔ anukwarɛɛ; mlɔ mɛ tole atrákpɛ mɛ awla a.”

²² Lɛ badɔkpasi ba bedi ba ahanuglɔ ba aŋu na mɛ ni kupisa ní ɔniliɛ gi ɛɛsɛ su u.

²³ Badɔkpasi ba mɛ tole, iliɛ klɔ gi Yesu alɔ ɛ, eze ní yɛ su.

²⁴ Simon Petro abasi yɛ awla lɛ edo yɛ ɔdali si, “Ʋi ye ɔniliɛ su gi ɛɛpani i.”

²⁵ Lɛ ɔdɔkpasi liɛ klɔ ɛ eti apɔni Yesu lɛ eʋi si, “Ɔkaɛ, nyaŋwɛ onu ɔniliɛ klɔ ɔ?”

²⁶ Yesu ebu le onu si, “Ɔniliɛ gi maakɔ lìklã ɛ lɛ ya tu ní oni no me xe maakɔ lɛ kɔ ɛ; yɛ onu ɔniliɛ klɔ.” Lɛ aya lìklã nɛ, xe etu le ní oni no me, lɛ akɔ lɛ aki Yuda Iskariot, Simon yebinyime e.

²⁷ Gi Yuda azɛ lìklã nɛ ko e, lɛ Satana eku ní yɛ mɛ ɛ. Yesu asi yɛ si, “Kɔsi tɔ bitɛ kidiliɛ gi wɔpɛ si wubitɛ ɛ!”

²⁸ Pɔ̀ banama gi beze ní ɔdɔŋakplɔ nɔ su i, bénu kidiliɛ loso gi Yesu apani aki yɛ nite ese e.

²⁹ Agi Yuda klɔ kibɔɛ kize e, badɔkpasi batɔ bɛkɔ lɛ si kisí Yesu asi yɛ si ɔzeedzi kudɔkpa liɔ gi biazia ki Liweŋaŋa nɛ ɛ, loo tɔ ɔzɛɛki bepiplinete ba kiditɔ.

³⁰ Lɛ gi Yuda azɛ lìklã nɛ ko e, edo kyɔŋ. Lize elesi.

Yesu aki ɔsã vuvu

³¹ Gi Yuda edo e, Yesu apani si, “Abla ɛ Ɔnɔɛ Yebi ye yɛ Kukɔkɔɔ kwiaŋwi, abla ɛ Aya yɛ kukɔkɔɔ kwiaŋwi gani Obi ye me.

³² Lɛ xe Aya yɛ kukɔkɔɔ kwiŋwi gani Obi ye me e, kɔlɔ Aya aabu Ɔnɔɛ Yebi ye kukɔkɔɔ basɛ gani yɛ ɔtutɔ mɛ, lɛ aabitɛ lɛ kyɔŋ ɔ.

³³ Mɛ bebi ba, mátraze ní mlɔ su lipoe gblamadza tɔ ɔ. Mlɛtrapɛ́ mɛ; pɔ̀ liboe lɛ klɔ gi masi Yudanɛ baka ba ɛ, lɛ mɛɛsi mlɔ abla si, ‘Mlátratani niklɔ gi mɛɛtrɛ ɛ, kutrɛ.’

³⁴ “Lɛ abla ɛ, mɛɛki mlɔ ɔsã vuvu: mlalɔ mlɔ ahanuglɔ ba. Ŋwisi kiliɛ gi malɔ mlɔ kinɛ ɛ, nite lilɛ si mlalɔ mlɔ ahanuglɔ ba.

³⁵ Xe gi mlɛlɔ mlɔ ahanuglɔ ba ɛ, kɔlɔ ɔnɔ kakaa aatè si mɛ badɔkpasi mlenu.”

Yesu apani si Petro aanada si yete Ye

³⁶ Lɛ Simon Petro eʋi Yesu si, “Nifɔ wɔɛtrɛ, Ɔkaɛ ɛ?” Yesu ebu le onu si, “Niklɔ gi mɛɛtrɛ ɛ, mlátratani mɛ kude kukuno abla pɔ̀ mlakuni mɛ kude lɛ kede e.”

³⁷ Petro eʋi si, “Ɔkaɛ, ege lɛ loso mátratani wɔ kude kukuno abla a?” “Malɛ kublabla mɛ si maatse ní wɔ litukpo!”

³⁸ Lɛ Yesu ebu le onu si, “Wɔnya li ní kublabla mɛ si wɔatse ní mɛ litukpo o? Mɛɛsi wɔ anukwarɛɛ si xe ableke ologlo lo aamè e, wɔanada tata si wote me.