Yohan 12 - KUNYANYA VUVU YƆ

Maria asra kumu flafla aki Yesu ní Betania

¹ Agi bigɔ ewe teglo tɔ baŋa Kutseolidɔzawe le e, Yesu atrɛ ní Betania, Lazaro, onyime liɛ gi Yesu ayɔnɔ adɔ ni bekpo ʋa mɛ ɛ, yɛ ɔma nɔ mɛ.

² Bɛtɔ bilagɔdɔ ɛki yɛ níklɔ, Marta esumu ní ɔkplɔ nɔ su; Lazaro fɛ eze ní banama gi beze ɔkplɔ nɔ su ni Yesu kusi i.

³ Lɛ Maria akɔ nad kumu flafla gi kwizi kedzi i, tukpa likpe akɔ abali ní Yesu kuklikpɔɔ xe akɔ yɛ siya sɛ etsoli i. Kumu yɔ ɔfũ nɔ ɛzi kepea petee me.

⁴ Yesu yɛ badɔkpasi ba mɛ tole, Yuda Iskariot, ɔniliɛ gi yɛ atrábu ye kɔ ɛ, apani si,

⁵ “Ege loso xe báda kumu liɔ ya gi kwiazi kibɔ pititi alafa tiata a, xe biakɔ kɛ ɔki bazianete ba na a?”

⁶ Apani nite, aní si akɔ lɛ mɛ aki bazianete ba pɔ̀ lɛ ese linu si onu oze. Yɛ klɔ kibɔɛ kepimia kalɛ lɛ izɛɛkpɛ awla kɛ mɛ ɛ.

⁷ Pɔ̀ Yesu apani si, “Mla yurɔ yɛ! kidiliɛ gi abitɛ ɛ, abitɛ kɛ aki mɛ livive we le.

⁸ Bazianete ba kɔ bali ní mlɔ su lipoe kakaa, pɔ̀ mátraze mlɔ su i tsinɔ ɔ.”

Yudanɛ ma bɛnya ni Lazaro su

⁹ Gi Yudanɛ glegle benu si Yesu ɔlɛ ní Betania ɛ, bɛtrɛ níklɔ aní Yesu tete loso pɔ̀ tɔ bɛɛmɔ Lazaro gi Yesu ayɔnɔ dɔni bekpo ʋa mɛ ɛ.

¹⁰ Lɛ Kusumu yo baka ʋidi ba bɛbitɛ batrɔtrɔ tɔ beye Lazaro fɛ ɛ,

¹¹ lɛ ese linu si, kɔkpɛ yɛ loso o, Yudanɛ glegle beekyi kede kpɛ ba xe bɛɛzi Yesu aʋa ɛɛŋa a.

Yesu eti eku ní Yerusalem ŋwisi ɔʋaŋa kinɛ

¹² Keletitia mɛ ɛ, linɔkpi ʋidi itɔ gi liba Kutseolidɔzawe le me e, linu si Yesu ɔlɛ kudeo me gi atrába Yerusalem.

¹³ Lɛ bɛkɔ siwlawla sɛ ɛ, xe bɛzɛtsani yɛ nì ozi si, “Hosana! Aya ɔkrira ɔniliɛ gi atrába ní Ɔkaɛ linyi ne me e! Aya ɔkrira Israel Okusi ye!”

¹⁴ Yesu amɔ tedzi obi lɛ emu atrɔ yɛ aʋa ŋwisi kiliɛ gi kuŋwlimi dradra kwipani kinɛ ɛ si,

¹⁵ “Mlakíse lifu u, mlɔ Zion bebi ʋa a! Mledi ke! mlɔ okusi ye atrába, ɔtini ní tedzi obi ye aʋa a.”

¹⁶ Yɛ badɔkpasi ba bénu le ese ní lipoe lɛ klɔ mɛ ɛ; pɔ̀ gi bɛyɔni Yesu ní yɛ kuklekleo me e, bɛplɛ aŋu si kuŋwlimi dradraa kwipani nite ní yɛ su lɛ eboa la ya bɛbitɛ ɛyurɔ yɛ ɛ.

¹⁷ Banama gi beze ní Yesu su u, xe axwa Lazaro edono ní ɔdrɔ lɔ mɛ ɛ, xe ayɔni yɛ adɔ ni bekpo ʋa mɛ ɛ, bɛzeehle liboe lɛ klɔ gi liba lɛ mɛ ɛ.

¹⁸ Lɛ loso linɔkpi le lizɛɛtsani yɛ, lɛ ese linu si benu si abitɛ linugutseboe lɛ ya.

¹⁹ Lɛ Farisianɛ ma bɛpani ki ba ahanuglɔ ba si, “Mlɛ mɔ, kuʋíbu kakli koŋu! Mledi, kelea petee kalɛ ni yɛ kude!”

Hela banɛ batɔ bɛpɛ si bɛɛmɔ Yesu

²⁰ Hela banɛ batɔ beze ní banama gi bɛtrɛ ní Yerusalem si beezesumu Aya ní liwe le me kusi i.

²¹ Bɛtrɛ ní Filipo gi ádɔ Betsaida ní Galilea ɛ, klɔ lɛ bɛpani si, “Ɔka, kwipɛ si kumɔ Yesu.”

²² Filipo kyɛ azɛɛsi Andrea lɛ batiaʋa bɛzɛsi Yesu i.

²³ Yesu ebu le onu aki ba si, “Lipoe le lina gi Ɔnɔɛ Yebi ye aazi kuklekle ʋidi i.

²⁴ Mɛɛsi mlɔ anukwarɛɛ si; limlɔbi tile e, nite ko liaze xe béglu le e, xe lítse e. Pɔ̀ xe litsé e, lɛ kɔ liayo ebi ní kisrɛsrɛ mɛ.

²⁵ Ɔniliɛ gi adimɛ ni yɛ ligbã nɛ ɛ, aalila lɛ; ɔniliɛ gi ɔ́dimɛ ni yɛ ligbã nɛ ni kelea lia mɛ ɛ, abla lɛ ɔki ligbã́ moblo le.

²⁶ Ɔnɔ kakaa gi apɛ si yiwa mɛ lixwɛ nɛ ɛ, lilɛ si okuni mɛ kude tɔ mɛ ɔnɔsumu ye aaze ni mɛ su níklɔ gi malɛ ɛ. Lɛ Mɔka Aya aakpɛ kubùbù ní ɔnɔ kakaa gi aawa mɛ axwɛ na su.

Yesu apani ní Yɛ kutseo su

²⁷ “Yesu apani si, “Abla ɛ, mɛ ɔna nɔ ɛxixa lɛ liboe woli pani i? Mipani si, ‘Kaka Aya kitɔ ɔnyɔsasaa lɔ ya ɔdɔ mɛ ɔza na a?’ Pɔ̀ lɛ loso maba atɔ miga ɔnyɔsasa lɔ ya kini mɔmɔɛ mɛ.”

²⁸ Kaka Aya, Kpɛ kukɔ́kɔ́ ní wɔ linyi ne su! Lɛ ole ɔtɔ eyi idɔni lifunu ne si, “Makpɛ kukɔ́kɔ́ ní lɛ su, lɛ maakpɛ kukɔ́kɔ́ lɛ su dzɛ ɛ.”

²⁹ Linɔkpii lɛ gi lize níklɔ ɛ, linu ole lo, lɛ batɔ bɛpani si dzeni eegu u, batɔ fɛ si Aya ɔxwɛdzɛ yɛ egu kunugu aki yɛ ɛ!

³⁰ Pɔ̀ Yesu asi linɔkpi le si, “Aní mɛ loso ole lo egu kunugu yo, pɔ̀ mlɔ loso o.

³¹ Abla kɔ ɛ, lipoe le lina gi Aya axwa litsi ni kelea mɛ banima a, lɛ aabu ba lipɔ ɔ; able lipoe le lina gi Aya aatí kelea lia ka ɔʋaŋa ɛ.

³² Xegi bemuni me ní lifune e, maahe ɔnɔ kakaa pɔni isu ya.”

³³ Gi apani nite e, abasi kutse uliɔ elu gi atrátsé e.

³⁴ Linɔkpi le libu le onu si, “Blɔ Ɔsã nɔ ɛsi blɔ si, Kristo ye aaze ligbã́ moblo. Kitɛ wɔasi blɔ si, ‘lilɛ si bemuni Ɔnɔɛ Yebi ye e’? ‘Nyaŋwɛ onu Ɔnɔɛ Yebi liɛ ya a’?”

³⁵ Yesu ebu le onu si, “Kuklekleo kwiaze ní mlɔ kusi kɔna ni lipoe kpekpemi itɔ. Mlatrɛ ní mlɔ kudeo aʋa gi kuklekleo kulɛ ɛ, tɔ kele kakíblo ni mlo o. Ɔnɔ gi ɛɛga litumu ne me e, óʋite niklɔ gi ɛɛtrɛ ɛ.

³⁶ Mlazi kuklekleo aʋa aŋa, ni lipoe lɛ mɛ gi mlɛmɔ kɔ ɛ, tɔ mlaaze kuklekle me banɔ.” Gi Yesu apani nite pɔ ɛ, asɛ lɛ azeekpo isu ya ní ba su i.

Yudanɛ ma kumɔziŋaa

³⁷ Lilɛ lɛ mɛ si Yesu anya abitɛ enugutseboe la ní ba aŋu mɛ, pɔ̀ bázɛ yɛ aʋa aŋa a,

³⁸ tɔ liboe le gi Aya yɛ oboedoplɛɛ Yesaya apani aplɛ liba lɛ mɛ si, “Ɔkaɛ, nyaŋwɛ azɛ wɔ liboe le gi kwipani aʋa aŋa a? Nyaŋwɛ Ɔkaɛ ebu yɛ kigaglaɛ abasɛ ɛ?”

³⁹ Lɛ loso bátani kuzi ŋa a, lɛ ese linu si Yesaya apani ní ɔkutɔ kyɛ si,

⁴⁰ “Aya eni ba bimbi ʋe lɛ aki si ba begyodi ba mɛ bá dra, tɔ ba bimbi ʋe biki mɔ lɛ bátranu eboe ese ni ba begyodi ʋa kyɛ ɛ, lɛ batrá kyi ba mɔkɔ ɔ xe maayɔni ba a.”

⁴¹ Yesaya apani te lɛ ese linu si amɔ Yesu yɛ kuklekleo lɛ apani ní yɛ su i.

⁴² Pɔ kyɛ ɛ, Yudanɛ baka glegle bɛzi Yesu aʋa ɛɛŋa; pɔ̀ kɔkpɛ Farisianɛ ma loso e, bápani lɛ su ní banɔ kusi i, ni lifu si biabu bá ya ní Yudanɛ ma itsa klɔ.

⁴³ Lɛ ese linu si bɛdimɛ ni kukpɔ̀kpɔ̀ dɔni banima kɔ sani dɔni Aya kɔ ɔ.

⁴⁴ Yesu apani ni ole gagla si, “Ɔniliɛ gi azɛ mɛ aʋa aŋa ɛ, aní mɛ tete aʋa azɛ aŋa a, pɔ̀ azɛ ɔniliɛ gi yɛ akpɛ mɛ kyɛ aʋa aŋa a.

⁴⁵ Ɔniliɛ gi amɔ mɛ ɛ, amɔ ɔniliɛ gi akpɛ mɛ kyɛ ɛ.

⁴⁶ Maba kelea mɛ ŋwisi kani kinɛ ɛ, tɔ ɔnɔ kakaa gi azɛ mɛ aʋa ŋa ɛ, ɔki wɔ litumu ne me e.

⁴⁷ “Xe ɔnutɔ enu mɛ eboe la pɔ̀ ɔ́bitɛ ní la aʋa ɛ, Mátraxwa litsi ni yɛ ɛ, Mába kelea mɛ si míbu banima lipɔ ɔ, pɔ̀ tɔ míbu ba a.

⁴⁸ Ɔniliɛ gi egbe me xe ɔ́zɛ mɛ liboe le e, ɔnutɔ ɔlɛ gi axwa litsi ni yɛ ɛ. Eboa la gi mapani i, la ɛtrabu yɛ lipɔ ní liwe gɔgɔ lɛ aʋa!

⁴⁹ Lilɛ lɛ mɛ, lɛ ese linu si mápani eboe la ní mɛ kigagla mɛ ɛ, pɔ̀ Kaka gi yɛ akpɛ mɛ ɛ, yɛ aki mɛ eboa la gi maapani i, ni kiliɛ gi maado la a.

⁵⁰ Lɛ mete si yɛ ɔsã nɔ izɛɛmani ligbã́ moblo le e. Liboe lɛ gi mapani i, lɛ linu lɛ klɔ gi Kakaa Aya asi mɛ si mipani i.”