Yohan 10 - KUNYANYA VUVU YƆ

Yesu onu Oʋesigbanɔ Gbã ɛ

¹ Yesu apani si, “Mɛɛsi mlɔ anukwarɛɛ: ɔniliɛ gi ɔ́ʋiga kevunu ya tiku iʋesi le kukaa mɛ ɛ, pɔ̀ xe izeemuiga ɔkɔ dzedze e tiku i, onu oze ni odètsa.

² Ɔniliɛ gi izeetiku gani kevunu ya ɛ, yɛ onu oʋesigbanɔ yɛ.

³ Kevunu ya opepe ye aadra kevunu ya ɔki yɛ: iʋesi le izeenu yɛ ole lo xe axwa yɛ iʋesi le linyi ne e, lɛ aatu ɔtɔ ni lɛ kudono o.

⁴ Xe ebu le edono e, aaze lɛ ɔtɔ nɔ, lɛ iʋesi le iakuni yɛ kude, lɛ ese linu si íte yɛ ole lo.

⁵ Itrákuni banɔ dzedze kude liwewe e: boŋu i, íase ní banɔ baklɔ ba su lɛ ese linu si íte ba ile le e.”

⁶ Yesu ebu abee liɛ ya aki bà, pɔ̀ bénu yɛ ese e.

⁷ Lɛ loso Yesu apani dzɛ si, “Mɛɛsi mlɔ anukwarɛɛ si, Mɛ menu kevunu ya aki iʋesi le.

⁸ Banama pɔ́ gi bɛba kpɛ ɔtɔ ɛki mɛ ɛ, bezè bedetsa, lɛ iʋesi le ínu kutu iiki ba a.

⁹ Mɛ menu kevunu ya, ɔniliɛ gi aaga mɛ aʋa xe aatiku kuka mɛ ɛ, aamɔ kubúbú; aatiku lɛ aado lɛ aamɔ ɔdɔŋakɔ gbã a.

¹⁰ Oze ye kɔ ɛ, izɛɛba tɔ yizuru, yiye ni tɔ yizizi bidɔ. Maba tɔ mlaamɔ ligbã́, ligbã́ ní lɛ kisrɛsrɛ mɛ.

¹¹ “Mɛ menu oʋesigbanɔ gbã ɛ. Oʋesigbanɔ gbã ɛ, izɛɛkɔ yɛ ligbã́ nɛ ɛkɔ ní yɛ iʋesi le litukpo o.

¹² Xe apaa onete ɔtɔ gi ónu oʋesigbanɔ ɔ, xe ónu lɛ onete fɛ ɛ, xe amɔ agbodogli ye e, gi atrába ɛ, aase iʋesi le su kɔ agbodogli ye evu iʋesi le kɔ ìgɔgɔ lɛ ìhle e.

¹³ Apaa onetee aase lɛ ese linu si apaa onete ko onu u, lɛ ɔ́kɔ lɛ mɛ ɔki iʋesi le e.

¹⁴ “Mɛ menu oʋesigbanɔ gbã ɛ; lɛ mete mɛ iʋesi le e, lɛ mɛ iʋesi le fɛ ite me e:

¹⁵ ŋwisi kiliɛ gi Ɔka yɛ ete me e, xe mɛ fɛ mete Ɔka yɛ ɛ, xe makɔ mɛ ligbã́ nɛ akyɛ ní iʋesi le litukpo e.

¹⁶ Iʋesi dzedze ilɛ gi inu mɛ inɛ ɛ, gi imá ní iʋesi lɛ ya kusi i. Lilɛ si migbani lɛ kyɛ manɔ; ianu mɛ ole lo, lɛ iadzi oʋesiha tole ki oʋesigbanɔ tole e.

¹⁷ Mɔka Aya alɔ mɛ lɛ ese linu si madimɛ si maakɔ mɛ ligbã nɛ kɔ, tɔ maadzini le kuzɛ.

¹⁸ Ɔnɔnɔ ɔ́trazi mɛ ligbã nɛ ní mɛ awla a. Makɔ lɛ akyɛ ní mɛ ɔtutɔ mɛ kupɛ́pɛɔ onu. Kigagla kiliɛ ní mɛ awla si mikɔ lɛ kyɛ, lɛ kigagla kiliɛ ní mɛ awla si midzini le kuzɛ ɛ. Lɛ ya ɔsã Mɔka aki mɛ si mibitɛ ɛ.”

¹⁹ Kɔkpɛ eboa la ya gi Yesu apani loso e, kulɛlɛ kwiku ní Yudanɛ ma kusi dzɛ.

²⁰ Bamɛ beglegle bɛzɛɛpani si, “Ozimizi ye yɛ ɔkpasi ní yɛ mɛ! Eewle! Ege loso mlɛta yɛ kutu u?”

²¹ Pɔ̀ batɔ bɛpani si, “Ɔniliɛ mɛ gi ozimizi ye ɔkpasi i, ɔ́tratani kunugu yo kugu nite me e! Kitɛ ozimizi ye aaki si kuŋupoo kwiamɔ ɔ?”

Yudanɛ ma bázɛ Yesu aʋa ɛɛŋa a

²² Gi Lisɔligba lɛ onu kudradra Liweŋaŋa nɛ lina ní Yerusalem i, lize kásasi le.

²³ Yesu azɛɛga aza ní Lisɔligba lɛ kapɛa lia gi bizɛxwa si Salomo Ɔviva nɔ mɛ ɛ,

²⁴ lɛ Yudanɛ ma gi bɛklani yɛ ɛ, beʋi ye si, “Kɔzɛna ni lipoe woli onu wɔavu blo odu liboe me modramodra na a? Xe wɔ wonu Kristo ye e, dra lɛ mɛ ki blɔ faã.”

²⁵ Yesu ebu le onu si, “Masi mlɔ kóko, pɔ̀ mlázi mɛ aʋa aŋa a. Axwɛ ana gi mawa gani Mɔka Aya yɛ kigaglaɛ mɛ ɛ, ɛɛpani ní mɛ onu kooko;

²⁶ pɔ̀ mlázi mɛ aʋa aŋa a, gi aní mɛ iʋesi mlenu loso o.

²⁷ Mɛ iʋesi le izeenu liboe lɛ gi mizɛɛsi lɛ ɛ; Mete le, lɛ izeeku ni mɛ kude e.

²⁸ Maki lɛ ligbã́ moblo le, lɛ ítratse liwewe e. Ɔnɔnɔ ɔ́tratani lɛ kuʋa kuzɛ ní mɛ awla a.

²⁹ Mɔka gi yɛ akɔ lɛ aki mɛ ɛ, ekeme asani ba petee, lɛ ɔnɔnɔ ɔ́tratani lɛ kuʋa kuzɛ ní Mɔka awla a.

³⁰ Mɛ ni Mɔka Aya kunu kidɔ tile.”

³¹ Lɛ Yudanɛ ma bɛtá akla dzɛ si bɛɛsa yɛ ɛ.

³² Pɔ̀ Yesu asi ba si, “Mabitɛ bidɔ gbã glegle ní mlɔ kusi gi Kaka Aya aki mɛ si mibitɛ ɛ, bɛ mɛ biwoli su mlɛpɛ si mlɛɛsa mɛ akla na ɛ?”

³³ Yudanɛ ma bebu le onu si, “Kúpɛ si kusa wɔ akla kɔkpɛ wɔ eboe gbã na, pɔ̀ kɔkpɛ wɔ ebusioboe la loso o! Ɔnɔ ko wo nu, pɔ̀ wɔpɛ si wubitɛ isu ya si wo nu Aya a!”

³⁴ Yesu ebu le onu si, “Aní kiŋwlimi bɛŋwlimi kpɛ ní mlɔ tutɔ mlɔ ɔsã nɔ mɛ si, Aya apani si, ‘Mlalɛ ŋwisi Aya ba na a.’

³⁵ Kwite si kuŋwlimi yɔ kuli kɔ mɛ kɔ tsini kanɔmɛ anɔmɛ; lɛ Aya axwa banɔaklɔ si balɛ ŋwisi Aya ba, gi benu banɔaklɔ gi ba Aya aki yɛ liboe le e.

³⁶ Mɛ kɔ ɛ, kikyá Aya akya mɛ xe atsisi mɛ ní kelea mɛ ɛ. Kitɛ mɛ mlaatani kudo si medo libusioboe gi mapani si menu Aya Yebi i?

³⁷ Kɔlɔ mlakízi mɛ aʋa aŋa a, xe máʋibitɛ ní Mɔka Aya yɛ kupɛpɛɔ aʋa a.

³⁸ Pɔ̀ xe mabitɛ ní kɔ aʋa ɛ, xe mlázi mɛ aʋa aŋa fɛ ɛ, mlazi mɛ axwɛwawa la tete xunyɔ aʋa aŋa, tɔ mlaate le dɔni abla kɔtsinɔ si Kakaa Aya ɔlɛ ní mɛ mɛ̀ lɛ malɛ ní Kakaa Aya mɛ ɛ.”

³⁹ Dzɛ ɛ, bɛpɛ si beevu Yesu, pɔ̀ edo ní ba awla a.

⁴⁰ Lɛ Yesu edzi atsa Yordan Onipe lo o, xe atrɛ niklɔ gi Yohanes azaakpɛ kuni yo aki banima kutɔpu yɔ ɛ, lɛ eze ní niklɔ ɛ.

⁴¹ Banɔ glegle bɛba yɛ klɔ. lɛ bɛpani si, “Yohanes ɔ́bitɛ linugutseboe tɔtɔ, pɔ̀ liboe kakaa gi apani ní onyime liɛ ya su i, lilɛ lɛ mɛ.”

⁴² Lɛ banɔ glegle níklɔ, bɛzi yɛ aʋa ɛɛŋa ɛ.