Yohan 1 - KUNYANYA VUVU YƆ

Liboe le lizɛki ligbã́ nɛ

¹ Ní okpese kɔ ɛ, Liboe le lize; Liboe le lize nì Aya, lɛ Liboe le linu Aya a.

² Dɔni kelea okpese kɔ ɛ, eze nì Aya.

³ Aya abitɛ kidɔ kakaa gani yɛ aʋa; kididɔ kíma gi bɛbitɛ ɛ, xe óze lɛ mɛ ɛ.

⁴ Ligbã́ nɛ lize yɛ mɛ, lɛ ligbã́ nɛ, lɛ lize kuklekleo ki banima a.

⁵ Kuklekleo kwikle ku ní litumu ne me, lɛ litumu ne lítani kɔ aʋa ku ŋa a.

⁶ Aya akpɛ yɛ ɔxwɛdzɛ gi bizɛxwa si Yohanes,

⁷ aba ŋwisi katsalia ɔŋaŋa kinɛ tɔ ɔdra kuklekleo su, tɔ gani yɛ aʋa ɛ, ɔnɔ kakaa aanu liboe le tɔ aazi ŋa.

⁸ Aní yɛ ɔtutɔ eze kuklekleo o; kiba aba si yidra kuklekleo su u.

⁹ Kuklekleo ɔtutɔ lɔ gi kuzekle kí banima petee e, kwitra ba kelea mɛ.

¹⁰ Aba kelea mɛ, pɔ gi Aya abitɛ kelea gani yɛ aʋa fɛ ɛ, kelea kámɔ yɛ egyesi i.

¹¹ Aba yɛ ɔtutɔ yɛ akɔanɛ ma klɔ, pɔ̀ yɛ ɔtutɔ yɛ akɔanɛ ma bázɛ yɛ ɛ.

¹² Pɔ̀ banɔaklɔ petee gi bɛzi yɛ ɛ, xe bɛzi yɛ linyi ne aʋa ɛɛŋa ɛ; ba ko akpɛ kigaglaɛ si bedzi Aya yɛ bebi.

¹³ Bédzi Aya yɛ bebi gani kipɔpɔ mɛ ɛ, loo onyime ni ɔdzɛ ba kutrɔtrɔ mɛ, loo gani obika yɛ kupɛpɛ mɛ; Aya ɔtutɔ onu ba Ɔka.

¹⁴ Liboe le lidzi ɔnɔ gi eyi nì lipomepɛpɛ ni anukwarɛ ɛ, lɛ eze ní blɔ kusi i. Kwimɔ yɛ kuklekleo, kuklekleo liɔ klɔ gi azɛ ŋwisi Yɛka yɛ obinyime tolee kinɛ ɛ,

¹⁵ Gi Yohanes amɔ yɛ ɛ, apani ní yɛ su nì ozi si, “Yɛ onu Ɔniliɛ su gi mapani si, ‘Yɛ aaba mɛ kede e, pɔ̀ emu asani mɛ ɛ, lɛ ese linu si ɔlɛ xe bɛpɔ mɛ ɛ.’”

¹⁶ Lipomepɛpɛ lɛ kusrɛsrɛɔ ní yɛ mɛ loso e, akrira blɔ petee, lɛ aki blɔ kukrira trɔ kukrira aʋa a.

¹⁷ Aya akí Ɔsã nɔ gani Mose aʋa, pɔ̀ lipomepɛpɛ ni anukwarɛ kɔ ɛ, Yesu Kristo aʋa biga edo.

¹⁸ Ɔnɔnɔ ɔ́mɔ Aya ʋídi i, Yebinyime tolee, gi ɔʋífili ní Yɛka su i, yɛ ebu Ɔka yɛ abasi blɔ.

Yohanes Kuni yo Ɔkpɛkpɛɛ apani si aní yɛ yenu Kristo ye

¹⁹ Lɛ ya linu Yohanes yɛ liboe me dradra lɛ, gi Yudanɛ ma baka ba ní Yerusalem bɛkpɛ kusumu yo bakaatɔ ni Lewianɛ batɔ ní Yohanes klɔ tɔ beʋi ye si, Nyaŋwɛ onu u?

²⁰ Yohanes ógbe liboe le onu kubúbú, pɔ̀ apani wee lɛ adra lɛ mɛ si, “Aní mɛ menu Kristo ye e.”

²¹ Lɛ beʋi ye si, “Kɔlɔ nyaŋwɛ wònu, wɔ wonu Eliya na a?” Yohanes ebu le onu si, “Owo aní yɛ menu u,” lɛ beʋi si, “Aya yɛ oboedoplɛ wònu na a?” Ebu le onu si, “Owo.”

²² Gɔgɔɛ beʋi ye si, “Kɔlɔ si blɔ ɔniliɛ gi wonu i, lilɛ si kuzɛ kunububu tsini banɔaklɔ gi bɛkpɛ blɔ ɛ. Liboe woli wɔɛpani ní isu ya su na a?”

²³ Yohanes ebu le onu nì Aya yɛ oboedoplɛ Yesaya liboe le si, “Mɛ menu ɔniliɛ gi yɛ ole lo eeyì ní ɔyaya klɔ si, ‘Mlebu kude gyɔgyɔ akí Ɔkaɛ tɔ ɔga!’ ”

²⁴ Farisianɛ bɛ kpɛ banima,

²⁵ lɛ beʋi Yohanes si, “Xe ani wɔ́ wonu Kristo ye e, loo Eliya, loo Aya yɛ oboedoplɛ ɛ, kɔ ege loso wuzɛɛkpɛ kuni iiki banima a?”

²⁶ Yohanes ebu le onu si, “Mɛɛkpɛ kuni iiki banima, pɔ̀ ɔnutɔ ɔlɛ ní mlɔ kusi gi mléte e.

²⁷ Yɛ atrába ní mɛ kede, pɔ̀ mégyeno gi maable yɛ afɔkpa ʋa igbé ne e.”

²⁸ Eboa la ya petee ɛba la mɛ ní Betania ní Yordan onipe lo oge lɔ kɔlɔ, niklɔ gi Yohanes azaakpɛ kuni yo aki banima ɛ.

Yesu yɛ onu Aya Yɛ keʋesibi ya

²⁹ Keletitia ɛ, Yohanes amɔ Yesu gi atrába yɛ ɔza lɔ ɛ, lɛ apani si, “Mledi imɔ Aya yɛ Keʋesibi ya gi akɔ̀ akɔ si kiakɔ kelea mɛ eboe zimizi na sɛnɔ ɛ.

³⁰ Yɛ onu ɔniliɛ klɔ su gi mapani si, ‘Onyime ɔtɔ atrába ní mɛ kede e, gi ekeme asani mɛ ɛ, lɛ ese linu si ɔlɛ xe ableke bɛpɔ mɛ ɛ.’

³¹ Mɛ ɔtutɔ méte ɔniliɛ klɔ gi onu u, pɔ̀ kidiliɛ loso gi maba si míkpɛ kuni iiki banima ɛ, kɛ kinu si tɔ mikɔ ebu ye basɛ Israel banɛ ma.”

³² Lɛ Yohanes adra Yesu su si, “Mamɔ Ɔfuɛfuɛ nɔ gi eeple ŋwisi abronuma kinɛ ɛ, dɔni lifunu ne lɛ eze yɛ aʋa ɛ.

³³ Nya mátrate yɛ, pɔ̀ Aya a, gi yɛ akpɛ mɛ si mikpɛ kuni yo aki banima ɛ, apani asi mɛ si, ‘Wɔtramɔ Ɔfuɛfuɛ nɔ gi eeple dɔ onyime ɔtɔ aʋa ɛ; yɛ onu ɔniliɛ klɔ gi aakɔ̀ Ɔfuɛfuɛ Dradra lɔ kpɛ kuni kí banima a.’

³⁴ Lɛ Yohanes apani si, Mamɔ lɛ, lɛ mɛɛdra lɛ mɛ ɛsi mlɔ si yɛ onu Aya Yebinyime e.”

Yesu Yɛ badɔkpasi tɔpu ba

³⁵ Agi kelea kɛti i, Yohanes alɛ ní klɔ dzɛ nì yɛ badɔkpasi tiaʋa,

³⁶ Gi amɔ Yesu gi azɛɛza ɛ, apani si, “Mledi, Aya yɛ Keʋesibi ya!”

³⁷ Lɛ gi Yohanes yɛ badɔkpasi tiaʋa ba benu yɛ liboe le e, bekuni Yesu kude e.

³⁸ Gi Yesu ekyi xe amɔ si bali ni yɛ kude e, eʋi ba si, “Ege mlɛpɛ ɛ?” Bebu le onu si, “Rabi” Lɛ ese linu si Ɔdɔbasɛ yɛ “Nifɔ onu wɔ oze klɔ ɔ?”

³⁹ Lɛ Yesu ebu le onu si, “Mlaga di,” bize ŋwisi kemize inyɔ tine me kinɛ ɛ, Lɛ yɛ ni ba bɛtrɛ xe bɛzɛ mɔ niklɔ gi Yesu eze e, lɛ beze ní yɛ su kele gɔgɔa petee e.

⁴⁰ Ba mɛ tole gi enu Yohanes yɛ liboe le e, xe eze ni Yesu kude e, yɛ eze Andrea Simon Petro yeneminyime.

⁴¹ Lɛ onu klɔ ʋa ɛ, apɛ́ yeneminyime Simon amɔ, lɛ asi yɛ si, “Kwimɔ Mesiya yɛ.” Le ese linu si, “Kristo ye.”

⁴² Lɛ Andrea agbani Simon amani Yesu i. Yesu edi ye lɛ apani si, “Wɔ linyí linu si Simon, Yohanes Yebi, pɔ̀ biaxwa wɔ si Kefas.” Gi lɛ ese linu si Petro gi lɛ ese ní si Hela sɛ mɛ linu “liklakpɔ ɔ.”

Yesu axwa Filipo ani Natanael

⁴³ Agi kelea kɛti i, Yesu atrɔ si yɛ atrɛ ní Galilea. Amɔ Filipo lɛ asi yɛ si, “Kuni mɛ kude!”

⁴⁴ Filipo adɔ́ Betsaida, ɔma lɔ klɔ mɛ gi Andrea ni Petro bɛdɔ ɛ.

⁴⁵ Filipo amɔ Natanael lɛ asi yɛ si, “Kwimɔ ɔniliɛ klɔ su gi Mose aŋwlimi akpɛ ní Ɔsã nɔ keplekpaa mɛ ɛ, xe Aya yɛ beboedoplɛ ba fɛ bɛŋwlimi plɛ ɛ. Yɛ onu Yesu Nazaret ɔnɛɛ, Yosef yebinyime.”

⁴⁶ Lɛ Natanael eʋi si, “Kidɔ gbã ɛtɔ kíatani kudɔ ní Nazaret na a?” Lɛ Filipo ebu le onu si, “Ga ba tɔ ga di,”

⁴⁷ Agi Yesu amɔ Natanael gi atrába yɛ klɔ ɛ, apani yɛ su si, “Israel obi ɔtutɔ iliɛ ya; asia áma yɛ mɛ ɛ!”

⁴⁸ Lɛ Natanael eʋi Yesu si, “Kitɛ mɛ wote me e?” Yesu ebu le onu si, “Mamɔ wɔ gi woze ní ogbose lo ese e, xe ableke Filipo axwa wɔ ɔ.”

⁴⁹ Natanael ebu le onu si, “Rabi, wɔ́ wonu Aya Yebi ye! Wɔ́ wonu Israel Okusi ye!”

⁵⁰ Lɛ Yesu apani si, “Wɔziŋa gi masi wɔ si mamɔ wɔ ní ogbose lo ese e? Wɔtramɔ eboe gi ekeme sani lɛ ya a!”

⁵¹ Lɛ atrɛ lɛ aʋa si, “Sugba mɛɛsi mlɔ si, mlɛtramɔ lifunu ne si lidra lɛ Aya yɛ baxwɛdzɛ ba gi beemu u, xe beeple dɔ ní Ɔnɔɛ Yebi ye aʋa a.”