Kubububasɛ yɔ 9 - KUNYANYA VUVU YƆ

¹ Lɛ Aya yɛ ɔxwɛdzɛ tsunɛ ɛ eme yɛ kakuklui ya ɛ, lɛ mamɔ ɔdzidziobi ɔtɔ, gi awɔli adɔ ní lifunu ne, xe ádɔ kesea aʋa ɛ, lɛ bɛkɔ safi ye gi izɛɛdra lizokpo gluglu le ɛki yɛ ɛ.

² Lɛ gi adra lizokpo gluglu le e, kunyɔɔ kwido edɔni niklɔ ŋwisi ligble ʋidi itɔ kunyɔ kinɛ ɛ, lɛ liwo le ni liwɔ lɛ mɛ bidɔ litumu kɔkpɛ kunyɔɔ gi kwido edɔ ni lizokpo gluglu le me loso o.

³ Lɛ akikli la edo ɛdɔ ní kunyɔɔ mɛ ba kesea aʋa a, lɛ bɛki la kigagla ŋwisi kiliɛ gi kigaglaɛ kilɛ ní kesea aʋa kutapiadzɔ awla kinɛ ɛ.

⁴ Bɛsi ba si, bakízizi siwa, awlakpa wɔwɔ loo ise itɔtɔ ní kesea aʋa, boŋu i, banama kùtu yo gi Aya yɛ lixaŋu nɛ limá ɛ.

⁵ Lɛ báki ʋa kigagla si tɔ, beye ba a, pɔ̀ tɔ bawa ba nyɔnyɔɛ badzidzi tietsu nyɔŋ. Lɛ kuyeʋiyeʋi uliɔ gi benu i, kulɛ ŋwisi kiliɛ gi katapiadzɔ kizɛɛta ɔnɔ ɔ, xe bizeeyeʋi i kinɛ.

⁶ Lɛ ní ewe ala klɔ mɛ ɛ, banima biapɛ́ kutse, pɔ̀ batrámɔ kɔ ɔ, lɛ biapɛ́ vevee si betse pɔ̀ kutseo kwiase ní ba su u.

⁷ Lɛ akikli la la kilɛlɛɛ mɛ ɛ, kilɛ ŋwisi isɔ gi bɛbla ɛki kigũ kutata kinɛ ɛ, lɛ bekume bidɔɛtɔ ŋwisi sika ekusikuto kinɛ ɛ, lɛ ba aŋu na mɛ alɛ ŋwisi banɔ aŋu mɛ kinɛ ɛ.

⁸ Ba siya sɛ silɛ ŋwisi badzɛ siya kinɛ ɛ, lɛ ba ene na alɛ ŋwisi gyata ʋa ene kinɛ ɛ.

⁹ Ba ete na mɛ alɛ ŋwisi ɔlaa kakɔ mɛ ewu bɛkpɛ kinɛ ɛ, lɛ ba siwlasasa sɛ siiyì ŋwisi kikee nì isɔ glegle gi bɛɛtrɛ kigũ kinɛ ɛ.

¹⁰ Lɛ ba ipi ne izɛɛta ŋwisi kutapiadzɔ ini nɛ kinɛ ɛ, lɛ ní ba ipi ne me kigaglaɛ kilɛ si biabu kini kí banɔ badzidzi tietsu.

¹¹ Lɛ okusi liɛ gi eze ba onu i, ye onu lizokpo gluglu le me ɔxwɛdzɛɛ, gi bizɛxwa ní si Hebri se me si Abadon, lɛ ní si Hela sɛ mɛ ɛ bizɛxwa yɛ si Apolion.

¹² “Babaa” tɔpu yɛ onu aza; bigɔ baba tiaʋa gi bɛtrába ɛ.

¹³ Lɛ Aya yɛ ɔxwɛdzɛ glonɛɛ eme yɛ kakuklui ya ɛ, lɛ menu ole ɔtɔ gi ɛɛpani dɔni sika yɛ ɔdɔpɔʋisuʋɔ lɔ, gi ɔlɛ ní Aya aŋu mɛ ɛ, lɔ asia tene na mɛ.

¹⁴ Ɛɛpani ki Aya yɛ ɔxwɛdzɛ glonɛɛ gi evu kakuklui ya ní awla la si, “Ble baxwɛdzɛ tiene ba, gi bɛnya ní Eufrate onipe ʋidi lo kutu i.”

¹⁵ Lɛ beble baxwɛdzɛ tiene ba gi balɛ ní kublabla mɛ ɛki ɔnyɔsasaa nɔ ya tututu u, ni liwe lɛ ya, ni ɔdzidzi liɛ ya, ani ligɔɛ lɛ ya aʋa a, tɔ biaye banima kapɛ tanɛa.

¹⁶ Menu gi bɛxwa ba baguta ba kiklaklaɛ mɛ si benu isɔ bakpɛkpɛ akpe akpe ede alafa tiaʋa.

¹⁷ Lɛ mamɔ isɔ ʋa ni banama gi bɛkpɛ ʋa a, ní kububasɛɔ mɛ, baguta ba bɛkpɛ bala kakɔ mɛ ewu gi ɛzã kyikyi ŋwisi kifu, ni bluu ŋwisi axu la, ni bitɔ gi biizã ŋwisi sɔlfa loo ɔmumɔɛ kinɛ ɛ. Ba isɔ ʋa etukpo la eze ŋwisi gyata kinɛ ɛ, lɛ kifu yɛ ni kunyɔɔ ani sɔlfa biido edɔ ní ba inugu le me e.

¹⁸ Lɛ banima kapɛ tanɛa ní kesea aʋa betse gani baxixa tiata ʋa ya mɛ, gi benu kifu yɛ, ni kunyɔɔ ani sɔlfa yɛ gi biido ɛdɔni ba inugu le me loso o.

¹⁹ Lɛ ese linu si isɔ ʋa kigaglaɛ kilɛ ní ba inugu le ni ba ipi ne me; lɛ ese linu si ba ipi ne e, ilɛ ŋwisi bagblaga kinɛ ɛ, gi etukpo alɛ ní lɛ onu u, gi bizɛkɔ ɛkpɛ banɔ ekyibi i.

²⁰ Pɔ̀ banɔ gɔgɔa ba, gi bétse gani nyɔnyɔɛ biwàdɔ tutaɛ ʋɛ ya mɛ kyɛ ɛ, badime si bekyi ní ba ina nɛ mɛ, dɔni ba ɔwla onu axwɛwawa la mɛ ɛ, bámɔni ifuɛfuɛ zimizi ne, sika yɛ ni klosalo ye, ni ɔla kyikyi yɛ ani akla kɔpɔni ise le babu ʋa kusumu u. Babua ʋa gi batrátani bidɔ kumɔ ɔ, loo eboe kunu loo kuga a.

²¹ Lɛ báyurɔ ba kunɔyeo, ba ehwiboe la, ba enyimeboe la ni ádzɛboe la, ni ba ezeboe la.