Kubububasɛ yɔ 8 - KUNYANYA VUVU YƆ

Keʋesibi ya keble bidɔ gloele ʋe

¹ Lɛ gi keble bidɔ gloele ʋe e, lifunu ne ligɔ tsriɖiɖi kɔki ŋwisi ɔnyɔsasa kapɛ kinɛ ɛ.

² Lɛ mamɔ Aya yɛ baxwɛdzɛ tiegloele aba gi bizɛlɛ ní Aya aŋu mɛ ɛ, lɛ bɛki ba kukúklui tugloele.

³ Lɛ Aya yɛ ɔxwɛdzɛ dzedze ɔbalɛɛ ní ɔdɔpɔʋisuʋɔ lɔ su, lɛ evu sika kezi gi ka mɛ bizɛɛkpɛ lifi ye kifu yɛ ɛ. Bɛki yɛ lifi ye kpaŋu si tɔ aakɔ ɔpɔni banɔ dradra ba petee ba Aya kuxwaxwaa ní sika yɛ ɔdɔpɔʋisuʋɔɔ lɔ gi ɔlɛ ní likusigbo le ɔtɔ nɔ ɛ aʋa.

⁴ Lɛ lifi ye kunyɔɔ ni banɔ dradra ba ba Aya kuxwaxwa ɛ, biyɔ ɛdɔni Aya yɛ ɔxwɛdzɛɛ iwla lɛ mɛ trɛ ní Aya yɛ aŋu mɛ ɛ.

⁵ Lɛ Aya yɛ ɔxwɛdzɛɛ akɔ kezia lia mɛ gi bizɛɛkpɛ lifi ye kifu yɛ ɛ, lɛ ebu kifu yɛ ní ɔdɔpɔʋisuʋɔ lɔ aʋa akpɛ ní ka mɛ xe akɔ aŋwia akpɛ ní kesea aʋa ɛ; lɛ dzeni ye ekpese kulaʋi i, lɛ dzeni ye egu i, lɛ dzeni ye ekpese kifu yɛ kubu i xe kesea kyɛ kekpese kuhwa ɛ.

Aya yɛ baxwɛdzɛ ba beme ba Kukúklui yɔ

⁶ Lɛ Aya yɛ baxwɛdzɛ tiegloele ba gi bevu kukúklui tugloele ko e, bɛbla si beme ko.

⁷ Gi Aya yɛ ɔxwɛdzɛ tɔpu yɛ eme yɛ kakuklui ya ɛ, amukla ni kifu gi kipisa ni ika ɛ, bɛŋwia bɛ ɛkpɛ kesea aʋa a. Lɛ kesea kapɛ tanɛa kɛkani i, ise le kapɛ tanɛa kɛkani, lɛ siwa wɔwɔ sɛ petee kyɛ sikani i.

⁸ Lɛ Aya yɛ ɔxwɛdzɛ ʋla yɛ eme yɛ kakuklui ya a, lɛ kiditɔ, gi kilɛ ŋwisi lito ʋidi itɔ ɔ, gi liisɔ kinɛ ɛ, bɛŋwia bɛ ɛkpɛ ní axu la mɛ, lɛ axu la kapɛ tanɛa kekyi dzi ika ɛ,

⁹ lɛ bidɔgbagbee ʋe e, gi bilɛ ní axu la mɛ ɛ, bɛ kapɛ tanɛa ketse, lɛ initsahu le lɛ kapɛ tanɛa fɛ kɛyaʋi i.

¹⁰ Lɛ Aya yɛ ɔxwɛdzɛ tanɛɛ eme yɛ kakuklui ya ɛ, lɛ ɔdzidziobi ʋidi ɔtɔ, gi azaasɔ ŋwisi ɔbia kinɛ ɛ, awɔli adɔ ní lifune lɛ awɔli adɔ ní inipe le kapɛ tanɛa ani inide ne aʋa ɛ.

¹¹ Ɔdzidziobi ye yɛ linyi ne linu si Kutitii lɛ inipe le ni inide ne kapɛ tanɛa kedzi kuni tiitii, lɛ banɔ glegle betse kɔkpɛ kuni yo gi kwidzi tiitii loso o.

¹² Lɛ Aya yɛ ɔxwɛdzɛ néne ye eme yɛ kakuklui ya ɛ, lɛ asa liwo le kapɛ tanɛa ni ɔdzidzi yɛ yɛ kapɛ tanɛa ani badzidziebi ʋa ba kapɛ tanɛa bidɔ, niteme si ba kapɛ tanɛa kedzi litumu, lɛ liwe le lɛ kapɛ tanɛa kedzi litumu, lɛ elesi la kapɛ tanɛa fɛ ɛ kedzi litumu.

¹³ Lɛ gi meedi i, menu kadzi katɔ, gi keepruru ní liwɔ lɛ mɛ ɛ, kɛɛpani ni ole gagla ɔtɔ si, “Babaa, babaa, babaa ki banama gi balɛ ní kesea aʋa ɛ, kɔkpɛ kukuklui uliɔ gi Aya yɛ baxwɛdzɛ tiata ʋa gi bɛgɔ ɛ bɛtráme loso.”