Kubububasɛ yɔ 6 - KUNYANYA VUVU YƆ

Keʋesibi ya keble bidɔ bɛ ya gi bɛkɔ ɛtsala keplekpaa ɛ

¹ Lɛ gi meedi i, Keʋesibi ya keble bidɔ tugloele ʋe gi bɛkɔ ɛtsala keplekpa ɛ, bɛ bitɔpu ʋɛ. Lɛ menu gi bidɔ bitɛbitɛ gbagbe tune ʋe bɛ mɛ tule biipani ni ole ŋwisi dzeni eegu kinɛ si, “Ba!”

² Lɛ mamɔ isɔ pititi ɔtɔ ɔ, ɔniliɛ gi ɛɛkpɛ yɛ ɛ, evu kunyaa ní awla, lɛ bɛki yɛ likusikuto, lɛ edo atrɛ ŋwisi ɔguta kinɛ ɛ, tɔ yɛ amɔ kaʋaŋaŋa.

³ Lɛ gi Keʋesibi ya keeble bidɔ ʋla ʋɛ gi bɛ bɛkɔ ɛtsala keplekpa ɛ, menu bidɔ bitɛbitɛ gbagbe ʋla bɛ gi bipani si, “Ba!”

⁴ Lɛ isɔ dzedze, gi azã kyikyi edo e, lɛ ɔniliɛ gi ɛɛkpɛ yɛ ɛ, bɛki yɛ kigaglaɛ, si tɔ aabu kusuyɔɔ zanɔ ní kesea aʋa, tɔ banima biaye ba ahanuglɔ ba. Lɛ bɛki yɛ ihɛ inugu tiʋa ʋidi ɔtɔ.

⁵ Lɛ gi Keʋesibi ya keble bidɔ tanɛ ʋɛ ɛ, gi bɛkɔ ɛtsala keplekpaa ɛ, menu gi bidɔ bitɛbitɛ gbagbe tanɛ ʋɛ bipani si “Ba!” Lɛ gi mefeke aŋu na ɛ, mamɔ isɔ kpikpi, lɛ ɔniliɛ gi ɛɛkpɛ yɛ ɛ, evu bidɔ gi bizɛɛkɔ ɛta bidɔ tɔ bedi bɛ kinyipu ye ní awla a.

⁶ Lɛ menu kiditɔ ŋwisi ole dɔni bidɔ bitɛbitɛ gbagbe tune ʋe kusi si; “amu kekpo tiele ki liwe tile axwɛwawa, ani adeʋi kukpo tuta ki liwe tile axwɛwawa, pɔ̀ wukímuni kumu yɔ ni wain yɛ kudzi yo kɔ ɔ.”

⁷ Lɛ gi keʋesibi ya keble bidɔ nene ʋe e, menu bidɔ gbagbe nene ʋe ole lo gi ɛɛpani si i, “Ba!”

⁸ Lɛ mamɔ isɔ gi yɛ kusupeo kwixwa fuu ŋwisi ɔnɔ gi eetse kinɛ ɛ, lɛ ɔniliɛ gi ɛɛkpɛ yɛ ɛ, yɛ linyi ne linu Kutse, lɛ Bekpo ʋa mɛ ɔlɛ ni yɛ kude e. Lɛ bɛki ba kigagla a ní kesea kapɛ nenea aʋa, tɔ bakɔ ihɛ inugu tiʋa, ni kuʋɛ ani bànya kɔpɔni baŋuga ʋa tɔ bakɔ eye banima.

⁹ Lɛ gi keble bidɔ tsunɛ ʋɛ ɛ, mamɔ banama gi beye kɔkpɛ Aya yɛ liboe le ni katsalia gi bɛŋa lifumose e loso, ba esobo la ní adɔpɔʋisuʋɔ lɔ ese.

¹⁰ Lɛ bɛkpɛ ozi ni ole gagla si: “Ɔkaɛ gi ɛɛŋa aʋa a, Ɔdradra yɛ ni anukwarɛ onete, gakɔna nì lipoe woli koŋ wɔtraxwa litsi ni kelea banima a, xe wɔaʋi kuwle ní blɔ litukpo na a?”

¹¹ Lɛ bɛki ba mɛ ɔkakaa liwu pititi gblamadza, lɛ bɛsi ba si, baplɛ litɔ kese lipoe kpekpemi itɔ, zɛkɔna ni lipoe lɛ klɔ gi ba ahanuglɔ banɔsumu ba ani ba benemi ba ya, gi bɛtráye e ŋwisi kiliɛ gi beye ba kinɛ ɛ, ba kiklaklaɛ mɛ kiana.

¹² Lɛ gi meedi i, eble bidɔ glonɛ ʋɛ, lɛ kesea kɛhwa nyani nyani. Liwo le lidɔ litumu ŋwisi kusa kpìkpì kinɛ ɛ, lɛ ɔdzidziɛ fɛ ekyi ŋwisi ika kinɛ ɛ.

¹³ Lɛ lifunu ne badzidziebi ʋa bɛwɔli dɔ kesea ŋwisi kiliɛ gi esebi yoyo ala gi ázã ɛ, izɛwɔli xe liwɔ ʋidi itɔ liifu kinɛ ɛ.

¹⁴ Lɛ bɛklɔʋi lifunu ne eza nɔ ŋwisi kagaplekpa gi bɛklɔʋi kinɛ ɛ, lɛ bebu lito kakaa ni kunisi yo kese kakaa ɛzanɔ ní bɛ izeklɔ.

¹⁵ Lɛ kesea aʋa bekusi ba ni bekusiebi ba ani baguta ba baka ba, bexonete ba ni bamanete ba, ni ɔnɔsumu kakaa kɔpɔni banama gi balɛ ní isuwla mɛ ba petee bezekpo ní ipɛgla nɛ ni aklakpɔ la kusi ní eto la mɛ ɛ.

¹⁶ Lɛ bɛsi eto la ni aklakpɔ la si, “Mlakpa adɔ blɔ aʋa, atɔ mlekpo blo ní ɔniliɛ klɔ gi odi ní likusigbo le aʋa ɛ, yɛ aŋu mɛ, dɔni Keʋesibi ya ka kusuyeʋio onu!

¹⁷ Lɛ ese linu si ba kusuyeʋio liwe ʋidi ne lina, lɛ nyaŋwɛ aatani kulɛ ɛ ní ba onu na a?”