Kubububasɛ yɔ 5 - KUNYANYA VUVU YƆ

Keʋesibi ya kɛdra keplekpaa

¹ Lɛ mamɔ keplekpaa, gi bɛŋwlimi bidɔ ní ka kupɛɔ tuʋa petee e, xe bɛtsala ka onu ní ikɔ tigloele ní ɔniliɛ klɔ ɔ, gi odi ní likusigbo le aʋa ɛ, yɛ kaŋawla mɛ.

² Lɛ mamɔ Aya yɛ ɔxwɛdzɛ gagla ɔtɔ gi ɛɛkla ni ole gagla ɔtɔ si: “Nyaŋwɛ egyeno gi aable bidɔ bɛ ya a, gi bɛkɔ ɛtsala keplekpaa a, xe aadra keplekpaa lia ya ɛ?”

³ Pɔ̀ ɔnɔnɔ óze ní lifunu ne loo kesea aʋa loo ní kesea ese e, gi aatani keplekpa kudra loo aatani ka mɛ kudi i.

⁴ Lɛ mebemi mɔmɔmɔ, lɛ ese linu si bámɔ ɔnɔnɔ gi ana a, xe aadra keplekpaa loo aadi ka mɛ ɛ.

⁵ Pɔ̀ lɛ banɔtsitsi ba mɛ tole asi mɛ si; “Wukíbemi; dike, ɔniliɛ gi bizɛxwa si gyata yɛ ɛ, gi ádɔ Yuda okú no me e, gi agyɔ ádɔ ní Dawid igù ne me e, aŋa aʋa. Yɛ aatani keplekpaa ni bidɔ tugloelee ʋɛ gi bɛkɔ ɛ tsala keplekpaa onu i, kudra.”

⁶ Lɛ mamɔ Keʋesibi gi kɛɛŋwi ŋwisi kiye beye ka na a, gi kalɛɛ ní likusigbo le kusio, lɛ bidɔ bitɛbitɛ gbagbe tune ʋe ni banɔtsitsi ba bɛklani ka ɛ. Eyi asia tegloele ni bimbi tugloele, gi binu Aya yɛ ifuɛfuɛ tigloele le, gi bɛkpɛ tsisi ní kesea petee aʋa a.

⁷ Lɛ aba, xe azɛ keplekpaa ní ɔniliɛ ɛ, gi odi ní likusigbo le aʋa ɛ, yɛ kaŋawla mɛ.

⁸ Lɛ gi azɛ keplekpaa ɛ, bidɔ gbagbe tune ʋe ni banɔtsitsi avitaʋa ni tiene ba bɛdɔ kesea ní keʋesibi ya aŋu mɛ. Ba mɛ ɔkakaa evu ɔʋinta ní awla, lɛ bevu sika kuzi gi kwiyi ni lifi ye e, gi onu banama a, gi beesumu Aya ba Aya kuxwaxwa a.

⁹ Lɛ bɛza ɔdzi vuvu gi lɔ eboe la enu si: “Wɔ wogyeno si wɔazɛ keplekpaa, xe wɔable bidɔ bɛ klɔ gi bɛkɔ ɛtsala ka a, lɛ ese linu si beye wo, lɛ wɔ ika lɛ ɛ, wɔkɔ lɛ odzi banɔ aki Aya dɔni limade kakaa, ni siya kakaa, ni banɔ kakaa, ní kese kakaa aʋa.

¹⁰ Wɔbitɛ ba si beze kukusi ni kusumu yo baka gi biazesumu blɔ Aya a, lɛ biaŋa aʋa ní kesea aʋa.”

¹¹ Lɛ medi xe menu Aya yɛ baxwɛdzɛ kpaŋukpaŋu atɔ ɔ, gi ba kiklakla mɛ kisani akpe ni akpe liɔfɔ ede akpe liɔfɔ ba ole lo o. Bɛklani likusigbo le ni bidɔ bitɛbitɛ gbagbe ʋe ani banɔtsitsi ba.

¹² Bɛɛza ɔdzi ni ole gagla si: “Keʋesibi ya lia gi beye e, ka kegyeno si kazɛ kaʋaŋaa, ni exo, ni kuboete, ni kigagla, ni kubùbù, ni kusudra ani kukpɔ̀kpɔ̀!”

¹³ Lɛ menu gi kidɔ bitɛbitɛ kakaa gi kilɛ ní lifunu ne e, ni kesea aʋa, ni kesea ese, ni axu la mɛ, ani kudɔkpaa liɔ klɔ gi kukpasi ní kɔ mɛ ɛ, kwiza ɔdzi si: “Ki Ɔniliɛ gi odi ní likusigbo le aʋa a, ni Keʋesibi ya, ba binɛ binu kukpɔ̀kpɔ̀ɔ ni kubùbù yo ani kusudra ni kaʋaŋaa, dɔni kanɔmɛ tsini kanɔmɛ anɔmɛ!”

¹⁴ Lɛ bidɔ bitɛbitɛ gbagbee tune ʋe e, bipani si, “Liba lɛ mɛ!” Lɛ banɔtsitsi avitaʋa ni tiene ba bɛdɔ kesea lɛ bɛkpɔ̀ Aya ɛ.