Kubububasɛ yɔ 4 - KUNYANYA VUVU YƆ

Likusigbo le ní lifunu ne

¹ Lɛ ya kede e, gi meedi i, dike mamɔ opupo ɔtɔ gi ɛdra edu ní lifunu ne e. Lɛ ole tɔpu ɔnɔ gi menu i, egu kunugu yo ni me ŋwisi kakuklui kinɛ si: Ga ba lifunu ne ní ya, tɔ mibasɛ wɔ eboe ala gi ɛtraba la mɛ ní la ya kede e.

² Kyɔŋ klɔ ko e Aya yɛ Ɔfuɛfuɛ nɔ eeku ní mɛ mɛ̀, lɛ mamɔ likusigbo gi bedu ní lifunu ne, lɛ ɔnutɔ odi ní lɛ aʋa ɛ.

³ Ɔniliɛ klɔ gi odi ní lɛ aʋa ɛ, yɛ isu ya iitsi kifu yɛ, kiwɔwɔ ni kikyikyi ŋwisi akla zi kedzi gi bizɛɛxwa si yaspis likla ani kanelia likla kinɛ ɛ, lɛ ɔkũ yɛ, gi ɔlɛ ŋwisi emerald likla loo ŋwisi liwlakpa wɔwɔ kinɛ ɛ, aklani likusigbo le e.

⁴ Lɛ ekusigbo avitaʋa ni tene dzedze ɛklani likusigbo le, lɛ banɔtsitsi avitaʋa ni tiene bedi ní ekusigbo ala klɔ aʋa ɛ. Bɛkpɛ bidɔ pititi, lɛ bekume sika ekusikuto ní ba etukpo la a.

⁵ Lɛ dzeni ye azeebu kifu yɛ xe azaalaʋi i, xe azeegu adɔni likusigbo le me e. Lɛ ní likusigbo le ɔtɔ nɔ ɛ, kani tiegloele bɛɛsɔ. Ba benu Aya yɛ ifuɛfuɛ tigloele le.

⁶ Ní likusigbo le ɔtɔ nɔ ɛ, kiditɔ gi kilɛ ŋwisi axu la a, afini gi la mɛ ɛzrɔ ɔ, xe eekle nianiania ŋwisi azinzi kinɛ ɛ. Lɛ bidɔ gbagbe tune, gi biyi bimbi ʋe, ɔtɔ ni kede, bize ní kusio ani klani likusigbo le.

⁷ Lɛ kidɔgbagbe tɔpu yɛ kilɛ lɛ ko ŋwisi gyata yɛ kinɛ ɛ, lɛ kidɔ gbagbe ʋla ɛ kilɛ ŋwisi ligumenyime kinɛ ɛ, lɛ kidɔ gbagbɛ tanɛ ɛ kɛ aŋu na mɛ alɛ ŋwisi ɔnɔ aŋu mɛ kinɛ ɛ, lɛ kidɔ gbagbe nene ke e, kilɛ ŋwisi kadzi gi keepruru kinɛ ɛ.

⁸ Bidɔ gbagbe tune ʋe bikákaa siwlasasa tuglo silɛ ki bɛ, lɛ bimbi ʋe bilɛ klani bɛsu ní bɛ siwlasasa sɛ ese fɛ. Lɛ biʋízemɔni elesi ni kemize, bizɛɛkpɔ̀ Aya si: “Kusudra, kusudra, kusudra kunu Ɔkaɛ, Aya kigaglaɛ petee Ɔkaɛ kunɛ, Yɛ gi eze e, xe ɔlɛ ɛ, xe atrába ɛ!”

⁹ Lɛ xe bidɔ gbagbe ʋe biki ɔniliɛ gi odi ní likusigbo le aʋa kusudra kubùbù yo ni ɖasedodo e, xe ɔlɛ ligbã́ nɛ dɔni kanɔmɛ tsini kanɔmɛ ɛ,

¹⁰ kɔlɔ banɔtsitsi avitaʋa ni tiene ba bɛdɔ ní kesea ní ɔniliɛ klɔ gi odi ní likusigbo le aʋa yɛ aŋu mɛ ɛ, kɔ bɛkpɔ̀ ɔniliɛ gi ɔlɛ ligbã́ nɛ tsini kanɔmɛ anɔmɛ ɛ. Kɔ bɛkɔ ba ekusikuto la ɛplɛ ní likusigbo le ɔtɔ nɔ, kɔ bɛpani si:

¹¹ “Blɔ Ɔkaɛ nì Aya, wɔ wogyeno si, wɔazɛ kusudra ni kubùbù yo ani kigaglaɛ. Lɛ ese linu si wɔ wɔbitɛ kidɔ kakaa, lɛ bilɛ lɛ ese linu si wɔbitɛ bɛ ní wɔ kupɛ́pɛɔ onu.”