Kubububasɛ yɔ 3 - KUNYANYA VUVU YƆ

Liboe lɛ gi aŋwlimi i aki Aya yɛ ɔxwɛdzɛɛ gi eedi Sardis ɔsɔli ha lɔ aʋa ɛ

¹ “Ŋwlimi ki Aya yɛ ɔxwɛdzɛɛ gi eedi Sardis ɔsɔli ha lɔ aʋa si i: Ɔniliɛ awla gi Aya yɛ ifuɛfuɛ tigloele le ni badzidziebi tigloele ba balɛ ɛ, yɛ ɛɛpani eboe ala ya si: Mete wɔ axwɛwawa la, linyi lilɛ wɔ awla si, wɔlɛ ligbã́ pɔ̀ wotse e.

² Nyime tɔ kpɛ bidɔ ɛmɛ gi bigɔ ɔ, xe biatse e, kigagla, lɛ ese linu si mámɔ si wɔ axwɛwawa la ɛna ní mɛ Aya aŋu mɛ ɛ.

³ Lɛ loso e, plɛ aŋu ní kidiliɛ gi wɔzɛ ɛ, xe wonu i aʋa, atɔ bitɛ lɛ aʋa, tɔ kyi ɔna mɛ. Xegi wɔ́ma ní aŋu plɛplɛ mɛ ɛ, maaba do ní wɔ aʋa ŋwisi oze kinɛ ɛ, lɛ wɔtrate ɔnyɔsasa nɔ mɛ gi maado ní wɔ aʋa a.

⁴ Pɔ̀ banɔ klakla atɔ balɛ ní Sardis, gi bélulu ba ewu la a. Ba biakpɛ ewu pititi lɛ biaga ni mɛ: lɛ ese linu si ba begyeno o.

⁵ Ɔniliɛ gi aŋa aʋa ɛ, biakpɛ liwu pititi kí yɛ ŋwisi ba kiniɛ ɛ, lɛ mátratsoli yɛ linyi ne ni ligbã́ nɛ keplekpaa mɛ liwewe, pɔ̀ madra yɛ linyi ne su ní Mɔka ni yɛ baxwɛdzɛ ba aŋu mɛ ɛ.

⁶ Ɔniliɛ gi kutu kuli yɛ ɛ, onu liboe lɛ gi Ɔfuɛfuɛ nɔ ɛɛpani iiki Isɔliha lɛ ɛ.

Liboe lɛ gi aŋwlimi i aki Aya yɛ ɔxwɛdzɛɛ gi eedi Filadelfia ɔsɔli ha lɔ aʋa ɛ

⁷ “Ŋwlimi ki Aya yɛ ɔxwɛdzɛɛ liɛ gi eedi Filadelfia ɔsɔli ha lɔ aʋa si i: Ɔniliɛ gi onu ɔdradra yɛ ni anukwarɛɛ onete ye, ɔniliɛ gi yɛ awla Dawid yɛ safi ye ɔlɛ ɛ, ɔniliɛ gi izɛdra xe ɔnɔnɔ ɔʋítani kudà a, xe izɛda a, xe ɔnɔnɔ ɔʋítani kudra ɛ, yɛ eboe la la ya si:

⁸ Mete wɔ axwɛwawa la! Dike, madra opupo gi ɔnɔnɔ ɔ́tratani kudà aki wɔ ɔ: lɛ ese linu si mete si kigagla sisami itɔ ko kilɛ ní wɔ awla a, pɔ̀ wɔbitɛ ní mɛ liboe le aʋa a, lɛ wɔ́nada si wote mɛ linyi ne e.

⁹ Dike, matraki si banama gi benu Satana yɛ ɔtsaklɔ banima ɛ, banama gi bizɛxwa isu ya si benu Yudanɛ ɛ, pɔ̀ xe bénu u, boŋu i benu basia nɛ, dike maaki si biabakpɛ litukpo kese aki wɔ, lɛ biazɛ lɛ si malɔ wɔ.

¹⁰ Kiliɛ gi wovu mɛ isã nɛ ní awla a, xe wɔkpɛ ikù nɛ ni litɔplɛplɛkese loso e, mɛfɛ maawe wo ní litsixwaxwa lɛ lipoe lɛ gi litrába kelea petee aʋa mɛ ɛ, gi lɛ biafeke banama a, gi balɛ ní kesea aʋa odi i me.

¹¹ Matraba kpekpemii. Vu kidiliɛ gi kilɛ ní wɔ awla mɛ gagla a, tɔ ɔnɔnɔ ɔkizɛ wɔ likusikuto le ní wɔ awla a.

¹² Ɔniliɛ gi aŋa aʋa ɛ, maabitɛ yɛ tɔ aaze ɔgbase ní mɛ Aya yɛ lisɔligba lɛ mɛ. Lɛ ɔ́trasɛ ní niklɔ liwewe tɔ ɔ. Maaŋwlimi mɛ Aya yɛ linyi ne trɔ ní yɛ aʋa. Lɛ maaŋwlimi mɛ Aya yɛ ɔma ʋidi no lɔ linyi ne, gi onu Yerusalem vuvu yɛ gi eeple dɔ ní mɛ Aya gi ɔlɛ ní lifunu ne klɔ trɔ ní yɛ aʋa a. Lɛ maaŋwlimi mɛ linyi vuvu nɛ trɔ ni yɛ aʋa a.

¹³ Ɔniliɛ gi kutu kulɛ yɛ ɛ, onu liboe lɛ gi Ɔfuɛfuɛ nɔ ɛɛpani iiki isɔliha lɛ ɛ.

Liboe lɛ gi aŋwlimi aki Aya yɛ ɔxwɛdzɛɛ gi eedi Laodikea ɔsɔli ha lɔ aʋa ɛ

¹⁴ “Ŋwlimi ki Aya yɛ ɔxwɛdzɛɛ gi eedi Laodikea ɔsɔli ha lɔ aʋa si i: Ɔniliɛ gi bizɛxwa si Amen i, gi yɛ onu anukwarɛɛ ni katsalia ɔtutɔ lɔ ɛ, ɔniliɛ gi gani yɛ aʋa Aya abitɛ kidɔ kakaa ɛ, yɛ eboe la la ya si:

¹⁵ Mete wɔ axwɛwawa la si, wɔ́yɔ fɛ, lɛ wɔ́zɛ kifu fɛ. Nya mapɛ si tɔ wɔayɔ loo wɔazɛ kifu.

¹⁶ Pɔ̀ gi wɔgblɔ̀ ɛ, wɔ́zɛ kifu, xe wɔ́yɔ fɛ loso e, matrapi wɔ ebu ní mɛ onugu lo me.

¹⁷ Lɛ ese linu si, wuzɛɛpani si, “Menu oxonete, lɛ bidɔ bilɛ ní mɛ awla a, lɛ kididɔ kiziã mɛ ɛ.” pɔ̀ wóte si, ɔzianete ni ɔsigaganete, opiplinete, kaŋupo ani ɔnɔ gi awɔ liyà yɛ wònu u.

¹⁸ Migba wɔ tɔ dzi sika, gi bɛwlɔ ní kifu mɛ ɛ, xe yɛ su adra a, ní mɔklɔ, tɔ wɔadzi oxonete, ni kusa pititi gi wɔanyime e, atɔ wɔakɔ okpo wɔ liyà lɛ mɛ, ani kimbi ye kuwa, tɔ wɔala ní wɔ bimbi ʋe aʋa tɔ wɔamɔ bidɔ.

¹⁹ Mizɛɛtɛni banama gi malɔ ɛ, lɛ mizeehe kutu iiki ba; lɛ loso e, kpɛ ikù nɛ tɔ kyí ɔna mɛ.

²⁰ Dike, malɛɛ ní opupo lo onu gi mɛɛsa opupo lo e; xe ɔnutɔ enu mɛ ole lo o, xe adra opupo lo e, maati iku yɛ aʋa, lɛ maaŋa bidɔ nì yɛ ɛ, lɛ yɛ fɛ aaŋa bidɔ nì mɛ ɛ.

²¹ Ɔniliɛ gi aŋa aʋa ɛ, maaki yɛ kudeonu gi aaze pɔni mɛ ní mɛ likusigbo le aʋa a, ŋwisi kiliɛ gi mɛ fɛ maŋa aʋa a, xe medi ni Mɔka ní yɛ likusigbo le aʋa kinɛ ɛ.

²² Ɔniliɛ gi kutu kuli yɛ ɛ, onu liboe lɛ gi Ɔfuɛfuɛ nɔ ɛɛpani ki Isɔliha lɛ ɛ.”