Kubububasɛ yɔ 22 - KUNYANYA VUVU YƆ

Aya yɛ onipe ɔlɔ gi izɛki ligba nɛ ɛ

¹ Lɛ Aya yɛ ɔxwɛdzɛɛ abasi mɛ onipe gi lɔ kuni yo kuzɛɛkɔ ligbã́ nɛ ɛ, gi ɛɛtsi kifu yɛ ŋwisi azinzi kinɛ ɛ, gi ɛɛkpɛ dɔni Aya ni Keʋesibi ya ba likusigbo le su i.

² Lɛ ɛɛkpɛ ɛza ni ɔma ʋidi no lɔ ablɔ ʋidi ye yɛ kusio e. Lɛ ní onipe lo ige tiʋa lɛ aʋa ɛ, ligbã́ nɛ ose lo ɔlɛɛ, gi izeeyo lɔ esebi la eyo liɔfɔ ni taʋa ligɔ kakaa, tule ni ɔdzidzi kakaa mɛ ɛ. Lɛ ose lo lɔ awlakpa la ɛ, enu kuwa gi kwiaki amade na petee e aayɔ dɔni ba bànya ʋa mɛ.

³ Lɛ ifixoxo etɔ́tɔ itráze tɔɔ ɔ, lɛ Aya ni Keʋesibi ya ba likusigbo le liaze ní ɔma ʋidi no me e, lɛ yɛ banɔsumu ba biasumu ye.

⁴ Biamɔ yɛ aŋu na mɛ, lɛ yɛ linyi ne liaze ní ba kutu yo.

⁵ Kele katráblo tɔɔ, lɛ batrázia kani kuklekle loo liwo le kuklekleo tɔɔ, lɛ ese linu si Ɔkaɛ Aya aaki ba kuklekle o. Lɛ biaŋa kukusi yo dɔni kanɔmɛ tsinɔ kanɔmɛ ɛ.

⁶ Lɛ Aya yɛ ɔxwɛdzɛɛ asi mɛ si, “Eboa la ya ɛ, enu eboe aʋa gi biazɛ ŋa a, lɛ enu anukwarɛ eboe. Lɛ Ɔkaɛ Aya, gi yɛ izɛki yɛ beboedoplɛ ba yɛ Ɔfuɛfuɛ nɔ ɛ, yɛ akpɛ yɛ ɔxwɛdzɛɛ tɔ obu eboa la gi ɛtrába la mɛ kpekpemii basɛ yɛ banɔsumu ba a.”

Yesu atrába

⁷ “Dike, matraba kpekpemi i! Biakrira ɔniliɛ gi evu keplekpaa lia ya mɛ eboedoplɛ la ní awla ɛ.”

⁸ Mɛ Yohanes mɛ menu ɔniliɛ gi enu u, xe amɔ eboa la ya a. Lɛ gi menu u, xe mamɔ na ɛ, madɔ ní kesea ní ɔxwɛdzɛɛ ikli lɛ onu tɔ misù ye ɔniliɛ gi yɛ ɛbasɛ mɛ bidɔ bɛ ya ɛ.

⁹ Pɔ̀ asi mɛ si, “Wukíbitɛ lɛ ɛ, mɛ kyɛ wɔ ɔhanuglɔ ɔnɔsumu menu, mɛ ni wɔ benemi ba beboedoplɛ ba ani banama gi bevu keplekpaa lia ya mɛ eboe la ní awla ɛ. Sù Aya!.”

¹⁰ Lɛ asi mɛ si, “Wukítsi eboa la gi akpasi ní kuboedoplɛ keplekpaa lia ya onu u, lɛ ese linu si lipoe le lina pɔ́.

¹¹ Mlaki si ɔniliɛ gi izɛbitɛ eboe zimizi i, ɔtrɛ ní yɛ eboe zimizi na aʋa a. Mlaki si ɔniliɛ gi izɛbitɛ anyaniboe ɔtrɛ ní yɛ anyaniboe la aʋa a. Mlaki si ɔniliɛ gi yɛ bede ʋa bɛɛgyɔ ɛ, oze ní yɛ kude gyɔgyɔɔ aʋa. Mlaki si ɔniliɛ gi adra ɛ, ɔtrɛ ni yɛ kudradraa aʋa a.”

¹² “Dike, matraba kpekpemii, lɛ matsini mɛ liʋɛ nɛ ɛmanɔ, lɛ maatsa liʋɛ ki ɔnɔ kakaa ní kidiliɛ gi abitɛ onu u.

¹³ Mɛ menu Alfa ni Omega, Ɔtɔpu yɛ ni Ɔgɔgɔ yɛ, Okpese klɔ ni Ɔgù klɔ.

¹⁴ “Biakrira banama gi beplo ba ewu la, tɔ biamɔ kude tɔ biaŋa ligbã́ nɛ ose lo lɔ biyoyo ʋe, ani tɔ biaga kuvunu yo tɔ biati uku ní ɔma ʋidi no me e.

¹⁵ Banama gi balɛ ní ɔma ʋidi no kede e, ba benu kudroʋio, behwinete ba, banama gi bizɛbitɛ enyimeboe ni ádzɛboe, banama gi bizeye banɔ ɔ, banama gi bizesu babu ʋa a, kɔpɔni banama onu gi asia na izeeze ɔgyi i, xe bizɛɛsɛ asia na a.

¹⁶ “Mɛ Yesu mɛ menu ɔniliɛ gi makpɛ mɛ ɔxwɛdzɛɛ si obu eboa la ya basɛ wɔ, tɔ wɔaŋa katsalia ki isɔliha lɛ ɛ. Mɛ menu Dawid yɛ ogù no ni yɛ osobi ye ani livlɛ lɛ ɔdzidziobi ye gi eekle e.

¹⁷ Ɔfuɛfuɛ nɔ ni ɔdzɛɛ gi bɛgbanɔ ɛ, bɛpani si, “Ba!” Lɛ ɔniliɛ gi eenu i, ɔpani si “Ba!” Ɔniliɛ gi olile eeku i, ɔba, ɔniliɛ gi apɛ́ ɛ, ɔzɛ ligbã́ nɛ kuni yo liʋɛmɔtsa.

Ɔgù klɔ

¹⁸ Mɛɛgba ɔnɔ kakaa gi eenu kuboedoplɛ uliɔ ɔ, gi kulɛ ní keplekpaa lia mɛ si i: xe ɔnutɔ akɔ kiditɔ apɔni eboa la ya ɛ, Aya aakɔ̀ baxixa ʋa su gi bɛŋwlimi bidɔ mɛ ní keplekpaa lia ya mɛ ɛ, aakɔ̀ pɔnɔ ɔki yɛ.

¹⁹ Lɛ xe ɔnutɔ aabu eboe atɔ ní kuboedoplɛ uliɔ gi kukpasi ní keplekpa lia ya mɛ ɛ, kɔlɔ Aya aabu yɛ ɔŋa klɔ kapɛa dɔni ligbã́ nɛ ose lo ní ɔma dradra lɔ gi bɛŋwlimi kpɛ ní keplekpaa lia ya mɛ ɛ, mɛ.

²⁰ Ɔniliɛ gi ɛɛŋa katsalia ɛki eboa la ya ɛ, apani si; “Ee, matraba kpekpemi!” Atɔ liba lɛ mɛ. Ɔkaɛ Yesu ba!

²¹ Ɔkaɛ Yesu Kristo yɛ lipomepɛpɛ nɛ lize ni Aya yɛ banima. Tɔ liba lɛ mɛ.