Kubububasɛ yɔ 21 - KUNYANYA VUVU YƆ

Yerusalem vuvu yɛ

¹ Lɛ mamɔ lifunu vuvu ni kese vuvu, lɛ ese linu si lifunu tɔpu nɛ ni kese tɔpu ya bɛ onu biza, lɛ axu la amá tɔɔ ɔ.

² Lɛ mamɔ ɔma dradra nɔ gi onu Yerusalem vuvu yɛ, gi eeple dɔni lifunu ne ní Aya klɔ ɛ, lɛ bɛlulɔ lɔ ŋwisi ɔdzɛ, gi bɛbitɛ kublabla ɛkɔ ki yenye kinɛ ɛ.

³ Lɛ menu ole gagla ɔtɔ ɛdɔni likusigbo le su si “Abla ɛ, Aya yɛ ozeklɔ ɔlɛ ní banima kusi lɛ yɛ aaze ní basu. Biaze yɛ banɔ, lɛ Aya ɔtutɔ lɔ aaze ní ba su lɛ aaze ba Aya.

⁴ Lɛ aatsoli kube kakaa kube ni ba aŋu mɛ. Kutse loo awowoe la kuwawa loo kubemi loo kuyeʋiyeʋi kútraze tɔɔ ɔ, lɛ ese linu si eboe kokoo la ɛɛza.”

⁵ Lɛ ɔniliɛ gi odi ní likusigbo le aʋa ɛ, asi mɛ si, “Mɛɛbitɛ kidɔ kakaa si kidzi kivuvu u!” Lɛ apani si, “Ŋwlimi liboe lɛ ya plɛ, lɛ ese linu si eboe ala ya enu anukwarɛ eboe ni eboe gi biazɛ la aʋa ŋa a.”

⁶ Lɛ asi mɛ si, “Bɛbitɛ lɛ pɔ́! Mɛ menu Alfa ni Omega, gi lɛ ese linu si okpese klɔ ni ɔgù klɔ. Ɔniliɛ gi olile eeku i, maaki yɛ tɔ aaŋwɛ kuni liʋɛmotsa dɔni ligba nɛ kuni yo kɔ linitɔ lɛ mɛ ɛ.

⁷ Ɔniliɛ gi aŋa aʋa ɛ, aazɛ kaŋase alia ya, lɛ maaze yɛ Aya, lɛ yɛ aaze mobi i.

⁸ Pɔ̀ befufluse ba ni banama gi báziŋa a ani banama gi bizɛbitɛ anyaniboe la a, bakpɛnɛ ba, banama gi bizɛbitɛ ádzɛboe la ni enyimeboe la a, banama gi bizɛɛbitɛ ehwiboe la a, banama gi bizeesumu babu ʋa a, kɔpɔni basia nɛ ma petee ba ozeklɔ onu lifuha lɛ gi liisɔ ni kifu yɛ akla na a mɛ. Lɛ ya linu kutse ʋlaa a.”

⁹ Lɛ Aya yɛ baxwɛdzɛ tiegloele ba, gi ba awla kubɔziʋi tugloeleo o, gi kwiyi ní baxixa tiegloele gɔgɔ ʋa ba mɛ tole aba, lɛ apani nì mɛ si, “Ba, tɔ mibasɛ wɔ ɔdzɛɛ gi bɛkpɛ kuwlawlaa gi onu Keʋesibi ya yedze e.”

¹⁰ Lɛ efeke me ní Ɔfuɛfuɛ nɔ mɛ atsini lito ʋidi gyɔgyɔ ɛtɔ aʋa ɛ, lɛ ebu ɔma dradra nɔ, Yerusalem, gi eeple dɔni lifunu ne ní Aya klɔ ɛ, abasɛ mɛ.

¹¹ Eekle ni Aya yɛ kusudraa, lɛ lɔ kuklekleo kulɛ ŋwisi líhuiʋi zi kedziatɔ kinɛ ɛ, ŋwisi yaspis likla, gi lɛ mɛ lidra ŋwisi azinzi kinɛ ɛ.

¹² Ligli gyɔgyɔ ʋidi itɔ liklani lɔ, lɛ kuvunu liɔfɔ ni tuʋa kulɛ ní lɔ su, lɛ Aya yɛ baxwɛdzɛ liɔfɔ ni tiaʋa balɛɛ ní lɔ kuvunu yo o. Bɛŋwlimi Israɛl bebi ʋa ba iku liɔfɔ ni tiʋa lɛ enyina ní lɔ kuvunu yo.

¹³ Kuvunu tuta kulɛ ní kewetu ya kapɛa, tuta ni kaʋaa, tuta ní kalaa ni tuta ní keweku ya.

¹⁴ Ɔma ʋidi no lɔ egli la alɛɛ ní ixɔ liɔfɔ ni tiʋa aʋa, lɛ ni ixɔ liɔfɔ ni tiʋa lɛ aʋa ɛ, bɛŋwlimi Keʋesibi ya ka banɔkpɛkpɛ liɔfɔ ni tiaʋa ba enyi na ɛtrɔ ɔ.

¹⁵ Aya yɛ ɔxwɛdzɛ liɛ gi apani ni mɛ ɛ, evu sika kigyigyeseʋi gi atrákɔ egyigyi ɔma ʋidi no ni lɔ kuvunu yo ni lɔ egli la a.

¹⁶ Ɔma nɔ lɔ kidzedzee me ni lɔ kinenee me bisɔ̀. Egyigyi ɔma nɔ nì kigyigyeseʋi ye lɛ bize itiplɛkɔ akpe tole ni alafa tietsu; lɔ kidzedzee me ni kinenee me ani lɔ kimumu ye me bisɔ.

¹⁷ Lɛ egyigyi ɔma nɔ lɔ ligli le, lɛ amɔ si lɛ kitritri ye me e, kize kuklikpɔ alafa tiaʋa ní ɔnɔ kugyigyi yo onu, gi kɔsu axwɛ Aya yɛ ɔxwɛdzɛɛ ɛɛwa ɛ.

¹⁸ Lɛ kidiliɛ gi bɛkɔ ɛtrɔ ligli le e, kinu yaspis likla, lɛ ɔma nɔ onu sika dradra yɛ, gi yɛ mɛ adra ŋwisi azinzi yɛ kinɛ ɛ.

¹⁹ Lɛ bɛkɔ akla zikedzi ede ede dzedze la, ɛkɔ ɛlulɔ ɔma nɔ lɔ ɔxɔ lɔ, gi lɔ aʋa egli la alɛ ɛ. Ɔxɔ kpɛkpɛ tɔpu nɔ onu yaspis, ɔʋla lɔ onu safir, ɔtanɛ nɔ onu xalkedon, onene no onu smaragd,

²⁰ otsunɛ nɔ onu sardonik, oglonɛ nɔ onu kanelia, ogloele lo onu krisolit, ɔgɔtɔʋa yɛ onu beril, ɔgɔtolee onu topas, liɔfɔɛ onu krisopras, liɔfɔ ni tolee onu hiakint, liɔfɔ ni ɔʋlaɛ onu ametis.

²¹ Lɛ kuvunu liɔfɔ ni tuʋa kunu ehuʋi pititi liɔfɔ ni taʋa, kevunu kakaa kenu lihuʋi pititi tile, lɛ ɔma nɔ ablɔ ʋa ɛ, benu sika gbã yɛ gi yɛ mɛ adra ŋwisi azinzi mɛ kinɛ ɛ.

²² Lɛ mámɔ lisɔligba ɛ tɔtɔ ní lɔ mɛ ɛ, lɛ ese linu si Ɔka Aya, kigaglaɛ petee onetee ni Keʋesibi ya ba benu ba lisɔligba lɛ.

²³ Lɛ ɔma nɔ ɔ́ziã liwo le loo ɔdzidzi yɛ, tɔ aakle ɔbali ní lɔ aʋa, lɛ ese linu si Aya yɛ kusudraa kuzɛɛki lɔ kuklekle o, lɛ Keʋesibi ya kenu lɔ kani yɛ.

²⁴ Lɛ kesea aʋa banima biaga ní lɔ kuklekleo onu u, lɛ kesea aʋa bekusi ba biakɔ ba exo la ni ba kusudraa mani lɔ mɛ ɛ.

²⁵ Lɛ batráda lɔ ipupo le liwewe lɛ ese linu si kele kátrablo ní niklɔ ɔ,

²⁶ Kesea aʋa banima biamani ba exo la ni ba kubùbù yo ní lɔ mɛ.

²⁷ Lɛ kidɔkakaa gi kɛsu kídra ɛ, kítrati iku ní lɔ mɛ ɛ, lɛ ɔnɔ gi izɛɛbitɛ anyaniboe loo izɛɛsɛ asia kyɛ ɔ́trátiiku isani banama tètè gi ba enyi na akpasi ní Keʋesibi ya ka ligbã́ nɛ keplekpaa mɛ ɛ.