Kubububasɛ yɔ 20 - KUNYANYA VUVU YƆ

Bɛkpɛ Ozimizi ye Bibɔ Agɔ Akpe Tole

¹ Lɛ mamɔ Aya yɛ ɔxwɛdzɛ ɔtɔ gi eeple dɔni lifunu ne e, gi evu lizokpo gluglu le lɛ safi ye ni bibɔɛ ʋɛ gi bizɛɛkpɛ banima ɛ, biʋidiitɔ ní awla la.

² Evu keni ya mɛ ɔgblaga ʋidi ye, ɔgblaga kokoe, gi onu Ozimizi ye loo Satana ɛ, lɛ anya yɛ kɔki agɔ akpe tole e.

³ Lɛ aŋwia yɛ akpɛ ní lizokpo gluglu le me e, xe ada bidɔ mɛ ní lɛ onu i, lɛ asamu lɛ aʋa ɛ, atɔ okímeni kelea mɛ banima tɔ ɔ, kɔna ni lipoe lɛ klɔ gi agɔ akpe tole la onu ɛɛza ɛ, pɔ̀ lɛ ya kede e, lilɛ si, biable yɛ lipoe kpekpemi itɔ ko o.

⁴ Lɛ mamɔ ekusigbo gi banama a, gi bɛki kigagla si baxwa etsi la ɛ, ba bedi ní la aʋa. Lɛ mamɔ banama onu gi bɛti etukpo la kɔkpɛ Yesu yɛ katsalia kuŋaŋaa ani kɔkpɛ Aya yɛ liboe le loso e, ba esobo la. Ba benu banama gi bésu ɔŋuga yɛ loo yɛ etugu na a, lɛ bázɛ yɛ lixaŋu kpɛkpɛ lɛ ní ba kutu yo loo ní ba kuwlakpɔɔ ɔ. Bedzi ligbã́ lɛ bɛŋa kukusi yo ni Kristo agɔ akpe tole.

⁵ Banama gi betse e bédzi ligbã́ tɔɔ, kɔna ni lipoe lɛ gi agɔ akpe tole la ɛza ɛ. Lɛ ya linu kuyɔyɔ tɔpu yɔ dɔni bekpo ʋa mɛ.

⁶ Banɔ gi bɛkrira ni banɔ dradra ba benu banama gi biamɔ ba kapɛa ní kuyɔyɔ tɔpu yɔ dɔni bekpo ʋa mɛ̀ mɛ ɛ. Kutse ʋla kutrámɔ kigagla ní ba aʋa a, boŋu i, biadzi Aya ni Kristo yɛ kusɔliɔ kɔ baka ba, lɛ biaŋa kukusi yo ni yɛ kɔki agɔ akpe tole.

Bɛŋa Satana aʋa

⁷ Lɛ xe agɔ akpe tole la onu ɛza ɛ, biabu Satana ní yɛ lizokpo gluglu le me,

⁸ lɛ aatrɛ, tɔ yizeemeni kelea petee, dɔni kesea igó tine ne aʋa a, gi inu, Gog ani Magog, tɔ biakpɛ ba likpɔ ki kigũ. Ba gi ba kisrɛsrɛ mɛ kiaze ŋwisi axuta la siklami sɛ kinɛ ɛ.

⁹ Bɛga klani kesea petee lɛ bɛkpɛ Aya yɛ banima ba likpɔkpɛkpɛ lɛ ni yɛ ɔma ʋidi lo gi alɔ ni kusi yo e. Pɔ̀ kifu yɛ kidɔ ní lifunu ne lɛ kiba ɛkani ba ɛ.

¹⁰ Lɛ bevu Ozimizi ye gi yɛ emeni ba ɛ, ɛŋwia ɛkpɛ ní lifuha ɛlɛ gi liisɔ mɛ ɛ. Niklɔ gi bɛŋwia ɔŋuga yɛ ni asia na oboedoplɛɛ ɛkpɛ ɛ, lɛ biawa ba nyɔnyɔɛ elesi ni kemize tsini kanɔmɛ anɔmɛ ɛ.

Aya axwa litsi ni bekpo ʋa

¹¹ Lɛ mamɔ likusigbo pititi ʋidi itɔ ni ɔniliɛ gi odi ní lɛ aʋa ɛ. Lifune ni kesea bise ní yɛ aŋu na mɛ, lɛ bámɔ ʋɛ tɔ ɔ.

¹² Lɛ mamɔ bekpo ʋa, banɔtsitsi ni banuvɔ, gi balɛ ní likusigbo le ɔtɔ nɔ ɛ, lɛ bɛdra kuplekpaa ɛ. Lɛ bɛdra keplekpa dzedze gi ka kenu ligbã nɛ keplekpaa. Lɛ bɛxwa litsi ni bekpo ʋa ní kidiliɛ gi bɛŋwlimi i kpɛ ní kuplekpa liɔ klɔ mɛ ní ba axwɛwawa la su u.

¹³ Lɛ axu la ebú banama ma gi bɛwɔ ní la mɛ ɛkɔ, lɛ kutseo ni bekpo ʋa mɛ kyɛ bebu banama gi balɛ ní bɛ mɛ ɛkɔ ɔ, lɛ bɛxwa litsi ni ɔnɔ kakaa ní kidiliɛ gi abitɛ ɛ onu.

¹⁴ Lɛ bɛkɔ kutseo ni bekpo ʋa mɛ ɛŋwia ɛkpɛ ní lifuha lɛ mɛ ɛ. Lifuha ɛlɛ ya linu kutse ʋlaa.

¹⁵ Lɛ xegi báŋwlimi ɔnutɔ yɛ linyi ne akpɛ ní ligbã́ nɛ keplekpaa mɛ ɛ, kɔ bɛŋwia yɛ ɛkpɛ ní lifuha lɛ mɛ ɛ.