Kubububasɛ yɔ 2 - KUNYANYA VUVU YƆ

Liboe lɛ gi aŋwlimi i aki Aya yɛ ɔxwɛdzɛɛ gi eedi Efeso ɔsɔli ha lɔ aʋa ɛ

¹ “Ŋwlimi kí Aya yɛ ɔxwɛdzɛɛ gi eedi Efeso ɔsɔli ha lɔ aʋa si i: Ɔniliɛ gi evu badzidziebi tiegloele ʋa ní yɛ kaŋawla mɛ ɛ, xe ɛɛga ní sika kani yɛ ise tigloele le kusi yo e, yɛ apani eboe ala ya si:

² Mete mlɔ kiboebitɛɛ ni mlɔ axwɛwawa gagla la, ani mlɔ igyi dodo le. Lɛ mete si mlaʋítani banɔ zimizi ba eboe la kudimɛ nɔ ɔ, lɛ mlefeke banama gi bizɛɛpani si i, ba benu banɔkpɛkpɛ ba, pɔ̀ bénu idi, lɛ mlɛmɔ ba si basia nɛ benu u.

³ pɔ̀ mlɛkpɛ iku nɛ, lɛ mlɛga kuyeʋiyeʋi me kɔkpɛ mɛ linyi ne loso, pɔ̀ fɛ mlépe e.

⁴ Pɔ̀ mamɔ kiditɔ gi kípɛ ní mlɔ su u, mlɛyurɔ kulɔlɔ tɔpu liɔ gi kwize ní mlɔ awla ɛki mɛ ɛ.

⁵ Mlaplɛ aŋu ní niklɔ gi mlɛwɔli dɔnɔ ɛ, mlekyi ɔna mɛ tɔ mlabitɛ kidiliɛ gi mlɛzɛɛbitɛ tsa ɛ, pɔ̀ xegi mlékyi ɔna mɛ ɛ, maaba mlɔklɔ lɛ maaba efeke mlɔ kani yɛ ose lo ní lɔ ozeklɔ.

⁶ Pɔ̀ liboe lɛ ya litrɔ ní mlɔ aʋa si, mlɛtrɔ Nikolaitianɛ ma ba kiboebitɛɛ ahwafi, gi mɛkyɛ matrɔ ahwafi la ɛ.

⁷ Ɔniliɛ awla gi kutu kulɛ ɛ, onu liboe lɛ gi Ɔfuɛfuɛ nɔ ɛɛpani ki isɔliha lɛ ɛ si: Ɔniliɛ gi aŋa aʋa ɛ, maaki yɛ kude si ɔŋa ligbã́ nɛ ose lo lɔ ebi yoyo la, gi ɔlɛ ní Aya yɛ Paradiso ye me e.

Liboe lɛ gi aŋwlimi i aki Aya yɛ ɔxwɛdzɛɛ gi eedi Smirna ɔsɔli ha lɔ aʋa ɛ

⁸ “Ŋwlimi ki Aya yɛ ɔxwɛdzɛɛ gi eedi Smirna ɔsɔli ha lɔ aʋa si i: Ɔniliɛ gi yɛ onu ɔtɔpu yɛ ni ɔgɔgɔɛ ɛ, ɔniliɛ gi etse e, pɔ̀ xe ayɔ edzì ligbã́ nɛ ɛ, yɛ eboe la la ya si:

⁹ Mete wɔ ɔzia nɔ ani wɔ lipi le pɔ̀ oxonete wonu! Mete banama gi bizɛxwa isu ya si Yudanɛ bénu u, gi ba bizɛɛpani enugumeboe mani wɔ su tɔ beezizi wɔ su u, pɔ̀ bénu Yudanɛ ɛ, gi ba ɔtsaklɔ onu Satana yɛ ɔnɛ ɛ.

¹⁰ Wukíse ɔziã nɔ klɔ gi wɔtramɔ ɔ. Dike, Ozimizi ye atrákpɛ mlɔ mɛ banɔ batɔ ligba, atɔ yikeni mlo edi, lɛ mlamɔ kutuhehe ewe liɔfɔ. Pɔ̀ mleze ní anukwarɛɛ aʋa zɛkɔna ni kutse me ke e, tɔ maakí mlɔ ligbã́ nɛ likusikuto le.

¹¹ “Ɔniliɛ gi kutu kulɛ kí yɛ ɛ, onu liboe lɛ gi Ɔfuɛfuɛ nɔ ɛɛpani iiki Isɔliha lɛ ɛ. Ɔniliɛ gi aŋa aʋa ɛ, ɔ́tramɔ kutse ʋlaa kɔ ɔziã a.

Liboe lɛ gi aŋwlimi i aki Aya yɛ ɔxwɛdzɛɛ gi eedi Pergamo ɔsɔli ha lɔ aʋa ɛ

¹² “Ŋwlimi tsisi Aya yɛ ɔxwɛdzɛɛ gi eedi Pergamo ɔsɔli ha lɔ aʋa si i: Ɔniliɛ awla gi ihɛ nunu gblamadzaɛ inugu tiʋa lɛ ɔlɛ ɛ, yɛ eboe la la ya si:

¹³ Mete ɔma nɔ klɔ mɛ gi wɔlɛ́ ɛ, niklɔ gi Ozimizi ye edu yɛ likusigbo le e. Pɔ̀ wovu mɛ linyi ne ní awla gagla a, lɛ wɔ́nada wɔ kuziŋa ní mɛ mɛ̀, ní ewe a la mɛ gi beye Antipa fɛ ɛ, gi yɛ aŋa anukwarɛɛ katsalia aki mɛ ɛ, ní mlɔ ɔma ʋidi lo me gi níklɔ Ozimizi ye ɔlɛ ɛ.

¹⁴ Pɔ̀ eboe atɔ alɛ ní wɔsu u; lɛ ese linu si banama gi bevu Baalam kudɔbasɛ yɔ ní awla ɛ, balɛ ní wɔ su, gi yɛ abasɛ Balak si, omeni Israel bebi ba onu tɔ babitɛ eboe zimizi gani bidɔ ŋaŋa gi bɛki babu ʋa mɛ ɛ, ani tɔ bawa kihasi ye.

¹⁵ Niteme ke banama gi bevu Nikolaitia nɛ ma bidɔbasɛbasɛ mɛ ní awla ɛ, kyɛ bákpasi ní mlɔ kusi.

¹⁶ Lɛ loso kyi ní wɔ ɔna mɛ; xe aníte e, maaba wɔ klɔ kpekpe, lɛ maakɔ ihɛ liɛ gi ɔlɛ ní mɛ onugu lo me e, maakɔ yɛ ɔta kigũ nì ba.

¹⁷ Ɔniliɛ gi kutu kulɛ yɛ ɛ, onu liboe lɛ gi Ɔfuɛfuɛ nɔ ɛɛpani iiki Isɔliha lɛ ɛ. Ɔniliɛ gi aŋa aʋa ɛ, maaki yɛ mana liɛ gi bekpo e yɛ ɔtɔ, lɛ maaki yɛ likla pititi, gi bɛŋwlimi linyi vuvu itrɔ lɛ aʋa a, linyi gi ɔnɔ dzedze ɔtɔtɔ ɔ́trate e, sani ɔniliɛ gi yɛ azɛ lɛ ɛ.

Liboe lɛ gi aŋwlimi i aki Aya yɛ ɔxwɛdzɛɛ gi eedi Tiatira ɔsɔli ha lɔ aʋa ɛ

¹⁸ “Lɛ ŋwlimi ki aya yɛ ɔxwɛdzɛɛ gi eedi Tiatira ɔsɔli ha lɔ aʋa si i: Aya Yebi ye, ɔniliɛ gi yɛ bimbi ʋe bilɛ ŋwisi kifu u, gi kiisɔ kinɛ ɛ, xe yɛ ikli lɛ ilɛ ŋwisi ɔlaakyikyi gi bɛkpɛ kifu mɛ kinɛ ɛ, yɛ apani eboa la si:

¹⁹ Mete wɔ axwɛwawa la, wɔ kunɔlɔɔ, ni wɔ kuziŋaa ani wɔ kunɔsumu yo kɔpɔni wɔ kukenidi yo, lɛ wɔɛkpɛ ikù nɛ abla ɛsani kiliɛ gi lize kutɔpu yɔ ɔ.

²⁰ Pɔ̀ mamɔ liboe lɛ ya ní wɔ su si, wɔki ɔdzɛ liɛ klɔ Isabel gi ɛɛxwa isu ya si ye nu oboedoplɛ ɛ, kudeonu. Gani yɛ bidɔbasɛbasɛ ʋɛ mɛ ɛ, eemeni mɛ banɔsumu ba ɛkpɛ ní kihasi ye me, ani tɔ baŋa bidɔ bɛ ya gi bɛki babu ʋa ɛ.

²¹ Maki yɛ lipoe, si okyi yɛ ɔna mɛ dɔni yɛ kihasiwawaɛ mɛ; pɔ̀ ɔ́dimɛ ɛ.

²² Lɛ loso, matrasa yɛ plɛ ɔnyanya ɔtɔsi aʋa, lɛ banama gi bɛwa kihasi ye ni yɛ ɛ, xegi békyi adɔ ni ba kiboebitɛ liɛ ya mɛ ɛ, maakɔ kupepe ʋidi ukpɛ ní ba mɛ ɛ.

²³ Maaye yɛ bebi ba. Lɛ Isɔliha lɛ petee iate si, mɛ menu ɔniliɛ gi izɛɛpami ina nɛ ni begyodi ʋa mɛ, lɛ maatsa lɛ ɔki mlɔ mɛ ɔkakaa ní yɛ kiboebitɛɛ onu u.

²⁴ Abla mɛɛsi mlɔ banɔ gɔgɔ ba ní Tiatira, mlɔ banama gi mlévu bidɔ basɛbasɛɛ bɛ ya ní awla a, xe bákpasi Ozimizi ye yɛ eboe kpokpo la a, gi áma ní la mɛ ɛ. Mátratrɔ lidɔtu dzedze tɔtɔ ní mlɔ aʋa tɔ ɔ.

²⁵ Kidiliɛ gi kilɛ ní mlɔ awla ɛ, mlevu kɛ mɛ gagla a, kɔzɛna ni lipoe lɛ gi maaba ɛ.

²⁶ Lɛ ɔniliɛ gi aŋa aʋa a, xe izɛɛbitɛ ní mɛ kupɛpɛɔ aʋa a, zɛkɔna ni ɔgù kɔ ɛ, maaki yɛ kigagla ní amade na aʋa.

²⁷ ‘Aagbani ba ni ɔwla gagla, lɛ ayaʋi ba xwitsixwitsi ŋwisi kufukpo kinɛ’, ŋwisi kiliɛ gi mɛ fɛ mamɔ kigagla dɔni Mɔka klɔ kinɛ ɛ.

²⁸ Lɛ maakɔ livlɛ lɛ ɔdzidziobi ye aki yɛ.

²⁹ Ɔniliɛ gi kutu kulɛ yɛ ɛ, onu liboe lɛ gi Ɔfuɛfuɛ nɔ ɛɛpani iiki Isɔliha lɛ ɛ.