Kubububasɛ yɔ 19 - KUNYANYA VUVU YƆ

Linɔkpi ʋidi itɔ likpɔ̀ Aya

¹ Lɛ ya kede e, menu ole gagla ɔtɔ gi ɔlɛ ŋwisi linɔkpi ʋidi itɔ ní lifunu ne lɛ ole gi liikpɛ ozi lo si, “Haleluya! Kubúbú ni kusudra ani kigaglaɛ binu blɔ Aya yɛ binɛ,

² lɛ ese linu si yɛ etsixwaxwa la enu anukwarɛ lɛ ɛɛgyɔ ɔ. Ebu ɔwawadze ʋidi ye lipɔ gi yɛ ezizi kesea ni yɛ kihasi ye. Eʋi yɛ banɔsumu ba ba kuwleo adɔ ni yɛ iwla mɛ.”

³ Lɛ bɛkpɛ ozi lo dzɛ si, “Haleluya! Ɔdzɛɛ yɛ kunyɔɔ kwiyɔ emu ní lifunu ne tsinɔ kanɔmɛ anɔmɛ.”

⁴ Lɛ bakatsitsi avitaʋa ni tiene ba ani bidɔgbagbe tune ʋe bɛdɔ kesea, lɛ besumu Aya, gi odi ní likusigbo le aʋa ɛ. Lɛ bɛkpɛ ozi lo si, “Amen, Haleluya!”

⁵ Lɛ ole eyi dɔni likusigbo le su si, “Mlakpɔ̀ blɔ Aya, mlɔ yɛ banɔsumu ba petee, mlɔ banama gi mlezeese ye e, mlɔ banuvɔ ni betsitsi.”

⁶ Lɛ menu ole ɔtɔ ŋwisi linɔkpi ʋidi itɔ ile, ŋwisi inipe glegle kuni kinɛ ɛ, ani ŋwisi dzeni kugugu gagla kinɛ gi bɛkpɛ ozi lo si, “Haleluya! Lɛ ese linu si Ɔkaɛ, blɔ Aya kigaglaɛ petee onete ɛɛŋa kukusi yo.

⁷ Mlaki tɔ kumɔ isami tɔ kuyo, tɔ mlaki yɛ kukpɔ̀kpɔ̀! Lɛ ese linu si keʋesibi ya ka kudzɛgbanɔɔ lipoe le lina, lɛ yɛ ɔdzɛɛ gi atrágbanɔ ɛ alulɔ yɛ isu ya aki lɛ.

⁸ Lɛ bɛki yɛ aklala pititi gi eeŋle si ɔkpɛ ɛ.” Aklala pititi yɛ onu banɔdradra ba eboe gyɔgyɔ la gi bɛbitɛ ɛ.

⁹ Lɛ Aya yɛ ɔxwɛdzɛɛ asi mɛ si, “Ŋwlimi si, ‘Biakrira banama gi bɛxwa si ba ba Keʋesibi ya ka kudzɛgbanɔɔ ɔdɔŋakplɔ nɔ su i!’ ” Lɛ apɔnɔ dzɛ si, “Eboa la ya enu Aya yɛ anukwarɛɛ eboe.”

¹⁰ Gi menu nite e, madɔ kesea ní yɛ ikli lɛ onu, tɔ misumu ye. Pɔ̀ asi mɛ si, “Wukíbitɛ lɛ ɛ! wɔ ɔhanuglɔ ɔnɔsumu menu, wɔ ni wɔ benemi ba gi mlevu Yesu yɛ katsalia mɛ ni awla ɛ. Sù Aya! Lɛ ese linu si anukwarɛ liɛ gi Yesu abasɛ ɛ, bɛ binu kidiliɛ gi Ɔfuɛfuɛ nɔ ɔ, gi eeze ní beboedoplɛ ba mɛ, ebu ibasɛ ɛ.”

Isɔ pititi yɛ ɔkpɛkpɛɛ

¹¹ Lɛ mamɔ lifunu ne gi lidra edu u, lɛ mamɔ isɔ pititi ɔtɔ, gi yɛ ɔkpɛkpɛɛ yɛ bizɛxwa si Anukwarɛɛ onete ni ɔnɔ aʋa gi biaziŋa ɛ. Izɛxwa litsi, lɛ izɛta kigũ ní kude gyɔgyɔ aʋa.

¹² Yɛ bimbi ʋe bilɛ ŋwisi kifu gi kiisɔ gaglaa kinɛ ɛ, lɛ ekume ekusikuto glegle ní yɛ litukpo le. Bɛŋwlimi linyi itɔ ní yɛ su gi ɔnɔnɔ óte sani yɛ ɔtutɔ ko o.

¹³ Akpɛ liwu gi bɛkpɛ ní ika lɛ mɛ ɛ, lɛ yɛ linyi ne linu si, Aya yɛ liboe le.

¹⁴ Lɛ lifunu ne baguta ba lihakpɔ lɛ gi bɛkpɛ isɔ pitititi ʋa ɛ, balɛ ni yɛ kude, lɛ bɛkpɛ aklala pititi ewu gi la su ɛɛdra a, xe eeŋle e.

¹⁵ Lɛ dɔni yɛ onugu lo me e, ihɛ inugu tiʋa izeedo gi yɛ izɛɛkɔ ɛɛŋa kuseo aʋa a. “Lɛ aaŋa amade na aʋa ni ɔwla gagla.” Yɛ izɛɛka wain yɛ ní Aya kigaglaɛ petee onetee yɛ kusuyeʋi gaglaa, kɔ wain yɛ ɔkaklɔ.

¹⁶ Lɛ ni yɛ liwu le ni yɛ litagba nɛ su i, bɛŋwlimi linyii nɛ ya; BEKUSI BA AƲA OKUSI NI Baka Ba aʋa Ɔka!

¹⁷ Lɛ mamɔ Aya yɛ ɔxwɛdzɛ tole ɔtɔ gi ɔlɛɛ ní liwo le me e, lɛ akpɛ ozi ni ole gaglaa atsisi kudzɔʋi yɔ petee gi kuze pruru u, ní liwɔ lɛ mɛ si, “Mlakpɛ isu likpɔ kí Aya yɛ ɔkplɔ ʋidi lo,

¹⁸ atɔ mlaata bekusi ba, ni baguta ba baka ba, banɔ ʋidi ba, isɔ ʋa, ni ba bakpɛkpɛ ba, banima petee, banama gi balɛ ba isuwla mɛ ni banama gi benu banɔ dzidzi i, banɔ bɔtsɔbɔtsɔ ani banɔ gbɔgbɔ ba kigyaɛ.”

¹⁹ Lɛ mamɔ ɔŋuga yɛ ni kesea aʋa bekusi ba ani ba baguta ba gi bɛkpɛ isu likpɔ ɔ, si bɛta kigũ ni ɔniliɛ klɔ gi ɔlɛ ní isɔɛ aʋa a ani yɛ baguta ba.

²⁰ Pɔ̀ bevu ɔŋuga yɛ ni asia na oboedoplɛɛ, gi yɛ azaabitɛ inugutseboe la ní yɛ onu i. Gani eboa la ya elu me e, emeni banama gi bɛzɛ ɔŋuga yɛ lixaŋu kpɛkpɛ lɛ ɛ, xe bɛkpɛ litukpo kese ɛki yɛ litugu ne e. Bɛkɔ ba bagbagbe tiaʋa ba ɛŋwia ɛkpɛ ní lifuha lɛ gi liisɔ ni kifu yɛ akla na mɛ ɛ.

²¹ Lɛ bɛkɔ ihɛ gblamadza yɛ gi izedo edɔni ɔniliɛ klɔ gi ɛɛkpɛ isɔɛ yɛ onugu lo me e, bɛkɔ yɛ eye banɔ gɔgɔ ba ɛ, lɛ kudzɔʋi yɔ petee kwizɛɛta ba kigyɛ.