Kubububasɛ yɔ 18 - KUNYANYA VUVU YƆ

Yohanes amɔ si Babilonia Ayaʋi

¹ Lɛ ya kede e, mamɔ Aya yɛ ɔxwɛdzɛ dzedze gi eeple edɔni lifunu ne e, lɛ ozekɔ ʋidi ɔlɛ ní yɛ awla a, lɛ yɛ kusudraa kwiki si kesea petee keekle e.

² Akpɛ ozi ni ole gagla si, “Ayaʋi! Babilonia ʋidi ye ayaʋi! Lɛ ese linu si edzì ifuɛfuɛ zimizi ne e, lɛ ozekɔ, ni ɔfuɛfuɛ mɔdramɔdra kakaa lɔ okpo kɔ, ani kadzɔʋi kyrìkyrì nì ke kluklu kakaa ŋwisi opéte kinɛ ka ɔdɔ kɔ.

³ Lɛ ese linu si kesea petee kɛŋwɛ yɛ kihasi ye kɛ kuwledaa, lɛ kesea aʋa bekusi ba bɛwa kihasi ye ni yɛ, lɛ kesea aʋa bedzigà ba bedzi bexonete gani yɛ bikesinɔdɔ kpaŋukpaŋu ʋɛ mɛ.”

⁴ Lɛ menu ole dzedze dɔni lifunu ne gi ɛɛpani si i, “Mledo aza ní yɛ mɛ, mɛ banima, tɔ mlakíkpɛ ɔha ni yɛ kuzimizi yo, atɔ mláʋazɛ yɛ kinii tɔtɔ ɔ.

⁵ “Lɛ ese linu si yɛ kuzimizi yo kwimu ina lifunu ne e, lɛ Aya aplɛ aŋu ní yɛ eboe kyrikyri la aʋa.

⁶ Mlabitɛ akpɛ ní lɛ onu aki yɛ, ŋwisi kiliɛ gi yɛ fɛ abitɛ lɛ kinɛ ɛ; mledzini atsa aki yɛ ede taʋa kɔkpɛ kidiliɛ gi abitɛ ɛ. Kaŋwɛpliʋia lia mɛ gi akpɛ aki mlɔ ɛ, mlaki yɛ kɔ tuʋa tɔ ɔŋwɛ.

⁷ Mlebu kinie aki yɛ atɔ mlaki yɛ ɔna tata ŋwisi kubùbù yo ni exo ala gi aki isu ya kinɛ ɛ. Ní yɛ ɔna nɔ mɛ ɛ, izeefeke isu ya si, ‘Medi ŋwisi okusidzɛ; Ménu ɔdzɛ gi yenye etse e, lɛ mátrabemi monye liwewe e.’

⁸ Lɛ loso e, yɛ kini ye kiaba yɛ aʋa ní liwe tile aʋa a: kutse, kube ani kuʋɛ ɛ. Lɛ biakpɛ yɛ kifu gi kiakani yɛ petee, lɛ ese linu si Ɔka Aya, ɔniliɛ gi izɛxwa litsi ni yɛ ɛ, onu ɔnɔ gagla.

⁹ “Lɛ xe kesea aʋa bekusi ba a, gi bɛwa kihasi ye ni yɛ ɛ, xe bɛŋa yɛ exo la nì yɛ ɛ, xe bɛmɔ yɛ kunyɔɔ ɔ, gi ɛɛsɔ ɛ, biabemi ye lɛ biawa awowoe la ní yɛ litukpo.

¹⁰ Lɛ bialɛɛ ní ɔdzage no ke gi lifu ne liiku ba kɔkpɛ yɛ ɔzia mɔmɔ nɔ lɔ kinie e, gi ɛɛmɔ loso o, lɛ biabemi si, “Babaa, babaa kí wɔ, wɔ ɔma ʋidi no Wɔ Babilonia, wɔ gi wonu ɔma ʋidi ni ɔma gagla! Lɛ ese linu si wɔ kutuheheo kwiba ní ɔnyɔsasa tole me.

¹¹ “Lɛ kesea aʋa bedzigà ba biabemi, lɛ biawa awowoe la ní yɛ litukpo, lɛ ese linu si ɔnɔnɔ óʋidzi ba bidɔdada ʋɛ tɔ ɔ.

¹² Bidɔdadaɛ ʋɛ ya binu: Sika ni klosalo, ani akla gi ɛzi kedzi i, ni ihwia ni akla la plɔplɔ yɛ, ni basa gi bɛzi kedzi i, ni seda yɛ ni ise kakaa elu gi ilɛ flafla ɛ, ni kudɔkpa gi bɛbitɛ ni onyi ye line ne e, ni ise gi izɛ kedzi i, ni ɔla kyikyi yɛ ani ɔla kpikpi yɛ kɔpɔni akla dzedze la a;

¹³ awlakpaa la gi la mɛ bizebu kumu flafla edɔnɔ ɛ, ni bidɔ flafla ɛʋɛ gi bizɛɛkɔ ɛtɔ bidɔ mɛ ɛ, lifi ye adɔtu la ni kotoklobo ye, ni kuda ni kumu yɔ, ni kunɔ ni amu, ni egume ni iʋesi, ni isɔ ʋa ni kikee ʋa, ani banɔ dzidzi ʋa, kɔpɔni banɔ gbagbe ba.

¹⁴ “Lɛ biapani si ‘wɔ bilésedɔ mɛ, bido ní wɔ awla. Wɔ exo la petee ni wɔ isu ya bilulɔ dɔ mɛ petee bilila gi bitradzì ba liwewe tɔ ɔ.’

¹⁵ Bedzigà ba gi bɛzɛda kudɔkpaa liɔ ya ɛ, xe bɛmɔ ba exo la ɛdɔni yɛ klɔ ɛ, bialɛɛ ní ɔkutɔ ke gi lifu ne liiku ba a, gi bɛmɔ yɛ kinimɔmɔɛ ɛ. Biabemi, lɛ biawa awowoe la,

¹⁶ lɛ biasa awla onu si, “ ‘Babaa, babaa ki ɔma ʋidi no! Wɔ gi wɔkpɛ aklala plɔplɔ yɛ ɛ, ni basa kakaa gi bɛzi kedzi i, xe wɔɛtsi kifu yɛ ni sika ni akla a, gi ɛzi kedzi ani ihwia lɛ ɛ!

¹⁷ Wɔ exo glegle la ezizi ní ɔnyɔsasa tole me!’ “Lɛ initsahu le ɔka kakaa, ni ɔnɔ kakaa gi izekù initsahu le e, ni banama gi bizeku initsahu le e, ni kenia aʋa baxwɛwa ba, ani banama petee gi bizɛga kedzia ní axu la aʋa ɛ, bialɛɛ ní ɔkutɔ ke.

¹⁸ Lɛ xegi bɛmɔ kunyɔ ɛdɔ ni yɛ kukanikani yɔ mɛ ɛ, biakpɛ ozi si, ‘Ɔma ʋidi ɔtɔtɔ ɔ́srɔni ɔma lɔ ya a.’

¹⁹ Lɛ biakpɛ ovugbo lo ní ba siya sɛ mɛ gi bɛwa awowoe la ɛ, lɛ biakpɛ ozi xe biazebemi si i, “‘Babaa! Babaa kí wɔ, ɔma ʋidi no, gi lɔ mɛ banama petee awla gi initsahu le ize ni axu la aʋa ɛ, bekyi edzì bexonete gani yɛ exo la aʋa! Lɛ ní ɔnyɔsasa tole me e, bɛkyrɔ yɛ.

²⁰ Mlamɔ isami ní lɛ litukpo, Mlɔ banama gi mlalɛ ní lifunu ne e! Isami iku mlo mlɔ baʋaziŋa ba ni mlɔ Aya yɛ banɔkpɛkpɛ ba ni beboedoplɛ ba! Lɛ ese linu si Aya atsa liʋɛ nɛ aki yɛ kɔkpɛ kiliɛ gi agani mlɔ loso o.’ ”

²¹ Lɛ Aya yɛ ɔxwɛdzɛ gagla ɔtɔ efeke liklakpɔ ʋidi itɔ gi likeme ŋwisi lihɔkla kinɛ ɛ, lɛ aŋwia lɛ akpɛ ní axu la mɛ, lɛ apani si: Anyra ala elu bɛtrákɔ ɛŋwia Babilonia ɔma ʋidi no ɛkpɛ kesea, lɛ batrámɔ nɔ liwewe tɔ ɔ.

²² Lɛ batránu ɔsangu no beʋéʋe ba ni badziza ba, ni ketee bememe ba, ani kukuklui yɔ bememe ba ile le ní wɔ mɛ liwewe tɔ ɔ. Lɛ batrámɔ lixwɛxwɛ lɛ baxwɛwa ba ní wɔ mɛ tɔ ɔ. Lɛ batránu lihɔkla nɛ onu ní wɔ mɛ liwewe tɔ ɔ.

²³ Kani yɛ kuklekleo kutrákle ní wɔ mɛ liwewe tɔ ɔ. Lɛ batránu kunyimezeno ni kudzɛgbanɔ ole ní wɔ mɛ liwewe tɔ ɔ. Wɔ bedzigà ba ba beze kesea aʋa banɔ ʋidi ba. Gani wɔ kunɔfanɔɔ mɛ ɛ, kelea ima nɛ petee ilila lɛ kudeo.

²⁴ Lɛ bɛmɔ beboedoplɛ ba ni baʋaziŋa ba kɔpɔni banama petee gi beye ní kesea aʋa ɛ, ba ika lɛ ni wɔ mɛ ɛ.”