Kubububasɛ yɔ 17 - KUNYANYA VUVU YƆ

Kutuheheo ki Ɔwawadzee

¹ Lɛ Aya yɛ baxwɛdzɛ tiegloele ba ya awla gi kubɔziʋi tugloeleo kwize e, ba mɛ tole apani asi mɛ si, “Ba tɔ mibasɛ wɔ kutuhehe kuliɔ gi bɛtráki ɔwawadze ʋidi ye e, gi odi ní bèni glegle ʋa aʋa ɛ.

² Kesea aʋa bekusi ba bɛwa kihasi ye ni yɛ, lɛ yɛ kihasi ye kuda ɛ, kwimu banama gi balɛ ní kesea aʋa ɛ.”

³ Lɛ Aya yɛ ɔxwɛdzɛɛ efeke me ní Ɔfuɛfuɛ nɔ mɛ atsini ɔyaya klɔ, lɛ mamɔ ɔdzɛ ɔtɔ gi odi ní ɔŋuga kyikyi ɔtɔ, gi bɛŋwlimi ebusionyi na ní yɛ su petee e, xe etukpo tegloele ni asia liɔfɔ alɛ yɛ aʋa ɛ.

⁴ Ɔdzɛɛ enyime basa gi bɛzi kedzi, lɛ alulɔ isu ya ni sika ni akla gi ɛɛzi kedzi ani ihwia pititi, lɛ evu sika kadaŋwɛpliʋi, gi keyi ni anyaniboe ni yɛ kihasi ye kɛ eboe kluklu la.

⁵ Linyii nɛ gi bɛŋwlimi ni yɛ ketu ya linu si: LIBOE KPOKPO BABILONIA ƲIDI YE BAWAWADZE BA PETEE ONEE NI ANYANIBOE LA NI KESEA AƲA LA ONEE.

⁶ Lɛ mamɔ si ɔdzɛɛ emu kuda gi kunu banɔ dradra ba ba ika lɛ ɛ, banama gi bɛŋa katsalia ɛki Yesu i, ba ika lɛ. Gi mamɔ yɛ nite e, mawɔ yaa.

⁷ Lɛ Aya yɛ ɔxwɛdzɛɛ eʋi me si, “Ege lɛ loso wɔwɔ yaa nite e? Ki tɔ mibu liboe kpokpoe lɛ gi lilɛ ní ɔdzɛɛ ni ɔga liɛ gi yɛ aʋa odi i, gi etukpo tegloele ni asia liɔfɔ alɛ yɛ ɛ, ese aki wɔ.

⁸ Ɔŋuga yɛ gi wɔmɔ ɛ, eze azanɔ, pɔ̀ ɔ́ma tɔ ɔ, lɛ atrádo edɔ ní lizokpo gluglu le me, lɛ aatrɛ gi iikyrɔ ɛ. Lɛ banama gi balɛ ní kesea aʋa gi báŋwlimi ba enyi na akpɛ ní ligbã́ nɛ keplekpaa mɛ ɛ, dɔni lipoe lɛ gi bɛbitɛ kelea ɛ, ba inugu iatse xe bɛmɔ ɔŋuga yɛ, lɛ ese linu si ɔŋuga yɛ eze edi, pɔ̀ ɔ́ma tɔ ɔ, pɔ aadzi ba dzɛ.

⁹ “Lɛ ya liziã kuboesenu nu: Etukpo tegloele la enu kutokpa tugloele, gi kɔ aʋa ɔdzɛɛ odi i. Edzì enu bekusi tiegloele:

¹⁰ Bamɛ tietsu bɛwɔli, tole ɔlɛ, ɔgɔgɔɛ ɔʋíba sukɔ, lɛ xegi aba ɛ, lilɛ si ɔŋa kukusi yo lipoe kpekpemi itɔ

¹¹ Lɛ ɔŋuga yɛ, gi eze edi i, xe ɔ́ma tɔɔ ɛ, yɛ onu okusi ɔgɔtɔʋa yɛ. Onu tiegloele ba ɔmɛ tole lɛ ɛtrɛ ní kukyrɔkyrɔ mɛ ɛ.

¹² “Lɛ asia, liɔfɔa la gi wɔmɔ ɛ enu bekusi liɔfɔ pɔ̀ baʋízɛ ba kukusi yo sukɔ ɔ, pɔ̀ biaki ba kukusi ki ɔnyɔsasa tole ko lɛ biaŋa kukusi yo, kɔpɔni ɔŋuga yɛ.

¹³ Litukpo me trɔtrɔ tile lilɛ ní ba awla, lɛ linu si biakɔ ba kigaglaɛ ni ozeklɔ ki ɔŋuga yɛ.

¹⁴ Biata kigũ ni Keʋesibi ya, pɔ̀ Keʋesibi ya kiaŋa ba aʋa a; lɛ ese linu si Yɛ onu Baka ba aʋa Ɔkaɛ ni Bekusi ba aʋa Okusi ye. Lɛ banama gi biapɔni yɛ ɛ, ba benu yɛ banɔxwaxwa ba ni yɛ banɔ kyakya ba kɔpɔni banama gi balɛ ni yɛ kude ni anukwarɛɛ mɛ ɛ.”

¹⁵ Lɛ Aya yɛ Ɔxwɛdzɛɛ asi mɛ si, “Kuni yo gi wɔmɔ ɔ, gi kɔ aʋa ɔwawadzee odi i, kunu banɔ, linɔkpi ani kelea mɛ kuse ani siya ede ede.

¹⁶ Lɛ ɔŋuga yɛ ni asia liɔfɔa la gi wɔmɔ ɛ, biatrɔ ɔwawadzee ahwafi. Biaki si aakyrɔ lɛ biabu ye liya a, biatà yɛ kisugyaɛ, lɛ biakpɛ yɛ kifu yɛ.

¹⁷ Lɛ ese linu si Aya akpɛ lɛ ba ina nɛ mɛ, si babitɛ ní Aya yɛ batrɔtrɔ ʋa aʋa, gi ba petee biadimɛ tɔ biakɔ ba kaʋaŋaa aki ɔŋuga yɛ, zɛkɔna ni lipoe lɛ klɔ gi Aya yɛ eboe la aaba la mɛ ɛ.

¹⁸ “Ɔdzɛɛ gi wɔmɔ ɛ, yɛ onu ɔma ʋidi ɔ lɔ klɔ, gi ɛɛŋa kukusi yo ní kesea aʋa bekusi ba aʋa a.”