Kubububasɛ yɔ 16 - KUNYANYA VUVU YƆ

Kubɔziʋio gi kɔ mɛ Aya yɛ kusuyeʋio kukpasi i

¹ Lɛ menu ole gagla ɔtɔ dɔni lisɔligba lɛ mɛ gi ɛɛsi Aya yɛ baxwɛdzɛ tiegloele ba si i, “Mlatrɛ tɔ mlazeenye Aya yɛ kusuyeʋi yo kubɔziʋi tugloele ko abali ní kesea aʋa.”

² Lɛ Aya yɛ ɔxwɛdzɛ tɔpu yɛ atrɛ ɛ, lɛ enye yɛ kabɔziʋia abali ní kesea aʋa ɛ, lɛ banima bɛdɔ ebì gi ezeyeʋi gagla ɛ, ba banama su gi ɔŋuga yɛ yɛ gyesi ye ɔlɛ ɛ ani banama gi besumu yɛ litugu ne e.

³ Lɛ Aya yɛ ɔxwɛdzɛ ʋla yɛ enye yɛ kabɔziʋia abali ní axu la aʋa ɛ, lɛ kuni yo kwikyi dzi ika ŋwisi okpo ɔtɔ yɛ ika kinɛ ɛ, lɛ kidɔ gbagbe kakaa gi kilɛ ní axu la mɛ ɛ kitse.

⁴ Lɛ Aya yɛ ɔxwɛdzɛ tanɛɛ enye yɛ kabɔziʋia abali ní inipe le ani inide ne aʋa ɛ, lɛ bikyí dzi ika ɛ.

⁵ Lɛ menu gi Aya yɛ ɔxwɛdzɛ liɛ gi odi ní bèni ʋa onu i ɛɛpani si, “Wɔ linɛ ligyɔ ní litsi tsatsa ɛlɛ ya mɛ. Wɔ gi wɔlɛ ɛ, xe woze e, wɔ Ɔnɔ dradra yɛ, lɛ ese linu si nite wɔtsa litsi le e;

⁶ lɛ ese linu si bɛbali wɔ banɔ dradra ba ni wɔ beboedoplɛ ba ba ika lɛ, lɛ wɔki ba ika lɛ, tɔ baŋwɛ ŋwisi kiliɛ gi ligyeni ba kinɛ ɛ.”

⁷ Lɛ menu ole ɔtɔ dɔni ɔdɔpɔʋisuʋɔ lɔ mɛ gi ɛɛpani si i, “Ee, Ɔkaɛ Aya kigaglaɛ petee ɔkaɛ, wɔ etsixwaxwa la enu anukwarɛɛ ni eboe gyɔgyɔ.”

⁸ Lɛ Aya yɛ ɔxwɛdzɛ néne ye enye yɛ kabɔziʋia abali ní liwo le aʋa ɛ, lɛ bɛki liwo le kigagla tɔ, likani banima nì kifu u.

⁹ Lɛ liwo le lɛ kuhuhu yo kwikani banima ɛ, lɛ bexo ifi ikpɛ Aya yɛ linyi ne, Aya gi yɛ amɔ kigagla ní baxixa ʋa ya aʋa ɛ, pɔ̀ lɛ badimɛ si bekyi ní ba ina nɛ mɛ, xe biakɔ kukpɔ̀kpɔ̀ ki yɛ ɛ.

¹⁰ Lɛ Aya yɛ ɔxwɛdzɛ tsunɛɛ enye yɛ kabɔziʋia abali ní ɔŋuga yɛ yɛ likusigbo le aʋa ɛ, lɛ yɛ kaʋaŋaa kɛdɔ litumu ne e. Lɛ banima bɛtà ba binemi ʋe kɔkpɛ ɔzia mɔmɔ nɔ loso o,

¹¹ lɛ bexo ifi le ekpɛ lifunu ne Aya a, kɔkpɛ ba kuyeʋiyeʋi yo ni ba ebi la loso, pɔ̀ kyɛ ɛ, badimɛ si bekyi ní ba kiboebitɛɛ mɛ ɛ.

¹² Lɛ Aya yɛ ɔxwɛdzɛ glonɛɛ enye yɛ kabɔziʋia abali ní Eufrate onipe ʋidi lo aʋa ɛ, lɛ lɔ mɛ kuni yo kwiti i, tɔ bialulɔ kudeo aki kewetu ya bekusi ba.

¹³ Lɛ mamɔ ifuɛfuɛ zimizi tita, gi ilɛ ŋwisi akpɔkplɔ ʋa kinɛ ɛ, gi ido edɔ ní keni ya mɛ ɔgblaga yɛ yɛ onugu lo me e, ni ɔŋuga yɛ yɛ onugu lo me, ani asia na oboedoplɛɛ yɛ onugu lo me.

¹⁴ Inu ifuɛfuɛ zimizi gi izɛɛbitɛ enugutseboe la a, lɛ izɛɛtrɛ ní kelea mɛ bekusi ba klɔ ní kelea petee me e, tɔ bɛkpɛ ba likpɔ ɛki kigũ yɛ ní Aya kigaglaɛ petee pɔ́ Ɔkaɛ, yɛ liwe ʋidi le aʋa a.

¹⁵ “Dike, matraba ŋwisi oze kinɛ ɛ! Biakrira ɔniliɛ klɔ gi izeeze ni aŋu i, xe izɛɛkɔ yɛ ewu la ɛplɛ isu ya su u, tɔ ɔkiga liya, xe biamɔ yɛ kuye me ɛ.”

¹⁶ Lɛ bɛkpɛ bekusi ba likpɔ ní niklɔ gi bizɛxwa ní si Hebri se me si Armagedon.

¹⁷ Lɛ Aya yɛ ɔxwɛdzɛ gloele enye yɛ kabɔziʋia kpɛ ní liwɔ lɛ mɛ ɛ, lɛ ole gagla ɔtɔ eyi dɔni lisɔligba lɛ mɛ ní likusigbo le su si, “Bɛbitɛ lɛ pɔ!”

¹⁸ Lɛ dzeni ye kifutsitsi yɛ, yɛ kulaʋiɔ ni yɛ kugugu yo kwiyi i, lɛ kesea kɛhwa gagla gi kɔ elu kuʋíba eʋídi dɔni lipoe lɛ gi banima bali ní kesea aʋa ɛ, biba bɛ mɛ ɛ, kesea kɛhwa gaglaa koŋ.

¹⁹ Ɔma ʋidi no ɛlɛ ní kupɛ tuta mɛ, lɛ kesea aʋa ima ʋidi ne iiyaʋi. Lɛ Aya aplɛ aŋu ní Babilonia ʋidi ye aʋa ɛ, lɛ akɔ yɛ kepliʋia gi ka mɛ yɛ kusuyeʋio kuda kulɛ ɛ, lɛ akɔ ka aki yɛ si ɔŋwɛ.

²⁰ Lɛ kunisi yo kese kakaa kɛlila ɛ, lɛ bámɔ litoe tɔtɔ tɔ ɔ.

²¹ Lɛ amukla ʋidi, gi la kunyipu yo kwiaze ŋwisi ɔklagbotu tole e, ɛdɔ ɛdɔni lifunu ne xe ɛdɔ ni banima aʋa ɛ. lɛ banima bexo ifi le kpɛ Aya kɔkpɛ amukla na kuxixa loso, lɛ ese linu si la kinie kɛ onu kikeme koŋ.