Kubububasɛ yɔ 15 - KUNYANYA VUVU YƆ

Aya yɛ baxwɛdzɛ tiegloele ba ni baxixa tiegloele ʋa

¹ Lɛ mamɔ gyesi ʋidi dzedze ní lifunu ne, gi liki si mɛ onugu etse e. Aya yɛ baxwɛdzɛ tiegloele gi bevu baxixa tiegloele gɔgɔ ʋa ní awlaa. Ba ya benu ba gɔgɔ ʋa lɛ ese linu si gani ba mɛ ɛ, kɔ Aya yɛ kusuyeʋi gaglaa kɔ onu kwidu i.

² Lɛ mamɔ kiditɔ gi kilɛ ŋwisi axu la a, pɔ̀ alɛ ŋwisi azinzi yɛ kinɛ ɛ, gi yɛ mɛ azã kyikyii ŋwisi kifu kinɛ ɛ. Lɛ mamɔ banɔ batɔ gi balɛ ni axu la kutu yɔ ɛ, ba benu banama gi bɛŋa ɔŋuga yɛ ni yɛ litugu ne ani yɛ linyi ne lɛ aaŋwi na aʋa a. Bevu isangu ne gi Aya aki ba ní awla a.

³ Lɛ bɛza Mose, Aya yɛ ɔnɔsumu ye yɛ ɔdzi nɔ ani Keʋesibi ya ka ɔdzi nɔ si, “Ɔka, Aya kigaglaɛ petee onete, wɔ axwɛwawa la ekeme lɛ enu enugutseboe. Wɔ bede ʋa benu bede gi bɛgyɔ ɔ, lɛ benu anukwarɛɛ, Wɔ wonu kelea petee Okusi ye lipoe kakaa.

⁴ Ɔkaɛ, nyaŋwɛ ɔlɛ gi ɔ́trase wo o, xe ɔ́trakpɔ̀ wɔ linyi ne e? Lɛ ese linu si wɔ tole ko wɔdra. Ima nɛ petee iaba wɔ aŋu mɛ ɛ, lɛ iaba sumu wo, lɛ ese linu si bebu wɔ kiboebitɛ gyɔgyɔ ɛbasɛ ɛ.”

⁵ Lɛ ya kede e, medi, lɛ mamɔ si bɛdra lisɔligba lɛ, gi linu kusɔliɔ kɔ likatsa lɛ ɛ.

⁶ Lɛ Aya yɛ baxwɛdzɛ tiegloele ba, gi bevu baxixa tiegloele ʋa ní awla ɛ, bedo edɔ ní lisɔligba lɛ mɛ. Bɛkpɛ ewu pititi gi ɛɛdra a, xe eeŋle e, lɛ bɛkɔ sika asaba ɛklani ba ete na mɛ ɛ.

⁷ Lɛ bidɔgbagbe tune ʋe ɔmɛ tole akɔ sika kubɔziʋi tugloele aki Aya yɛ baxwɛdzɛ tiegloele ba ɛ. Kubɔziʋi tugloele uliɔ ya mɛ Aya gi ɔlɛ ligba nɛ kɔtsini kanɔmɛ anɔmɛ ɛ, yɛ kusuyeʋio kukpasi.

⁸ Lɛ kunyɔɔ, gi kwidɔ Aya yɛ kuklekleo ni yɛ kigaglaɛ mɛ ɛ, kwiyi lisumugba lɛ mɛ, nite me si ɔnɔnɔ ɔ́tani lisɔligba lɛ mɛ kutiku, zɛkɔna ni lipoe lɛ gi baxixa ʋa gi Aya yɛ baxwɛdzɛ tiegloele ba bevu i, ba onu ɛza.